«និន្នាការប្រឆាំងចិន» ពេញនិយមសម្រាប់បក្សប្រឆាំងក្នុងពេលឃោសនាបោះឆ្នោត

អន្តរជាតិ

«និន្នាការប្រឆាំងចិន» ពេញនិយមសម្រាប់បក្សប្រឆាំងក្នុងពេលឃោសនាបោះឆ្នោត

07, May 2018 , 10:59 pm

រូបភាព

មេដឹកនាំសម្ព័ន្ធបក្សប្រឆាំងលោក មហាធៀ មហាម៉ាត់

ដោយ: ថ្មីៗ

និន្នាការប្រឆាំងចិន (Sinophobia) ក្លាយជាសន្លឹកបៀសំខាន់ក្នុងរដូវកាលឃោសនាបោះឆ្នោតនៅក្នុងបណ្តាប្រទេសជាច្រើនលើពិភពលោកពីអាស៊ីដល់អាហ្វ្រិក។ បក្សប្រឆាំងប្រឹងលើកយកបញ្ហាប្រឈមក្នុងគម្រោងវិនិយោគរបស់ចិនឃោសនាទាញយកប្រជាប្រិយភាពនយោបាយ។

មេដឹកនាំសម្ព័ន្ធបក្សប្រឆាំង Pakatan Harapan និងជាអតីតនាយករដ្ឋមន្ត្រីម៉ាឡេស៊ីទី៤ វ័យ ៩២ឆ្នាំលោក មហាធៀ មហាម៉ាត់ សន្យាត្រួតពិនិត្យកិច្ចព្រមព្រៀងឬគម្រោងវិនិយោគនានាដែលរដ្ឋាភិបាលម៉ាឡេស៊ីបច្ចុប្បន្នបានបង្កើតជាមួយចិន បើបក្សលោកជាប់ឆ្នោតថ្ងៃ ៩ ខែឧសភា។

បក្សប្រឆាំងនេះចោទថា រដ្ឋាភិបាលដឹកនាំដោយសម្ព័ន្ធបក្សកាន់អំណាច Barisan Nasional កំពុងលក់ប្រទេសម៉ាឡេស៊ីឲ្យទៅចិន។ មេដឹកនាំបក្សនេះស្វាគមន៍តែក្រុមហ៊ុនចិនណាដែល ដាក់ទុនបើកក្រុមហ៊ុននៅម៉ាឡេស៊ី, ជួលប្រជាជនក្នុងស្រុក, នាំចូលបច្ចេកវិទ្យា និងផ្ទេរចំណេះជំនាញវិជ្ជាជីវៈដល់ពលរដ្ឋម៉ាឡេស៊ី មិនមែននាំប្រជាជនចិនចូលមកជំនួសដូចឥឡូវទេ។

ត្រង់ថា វាមានឥទ្ធិពលកម្រិតណាចំពោះអ្នកបោះឆ្នោតនោះ វានៅតែស្រពេចស្រពិល។ ប្រជាជនម៉ាឡេស៊ីហាក់មិនសូវខ្វល់ពីបញ្ហាវិនិយោគទុនចិនប៉ុន្មានទេ តែខ្វល់ពីការកើនឡើងនៃការចំណាយលើជីវភាព ពីការបង្កើនពន្ធទំនិញ និងសេវាឯណោះទៅវិញ។

នៅកម្ពុជាវិញក៏មិនខុសគ្នាដែរ។ អតីតមេបក្សប្រឆាំងលោក សម រង្ស៊ី ក៏បានផ្ញើសារនយោបាយមួយដែលមានបញ្ជាក់ក្នុងលិខិតមួយច្បាប់ផ្ញើទៅកាន់សារព័ត៌មាន Phnom Penh Post ពាក់ព័ន្ធនឹងទំនាក់ទំនងរវាងកម្ពុជា និងចិន បើទោះជាលោកនិរទេសខ្លួននៅបរទេសក៏ដោយ។ អ្នកនយោបាយរូបនេះអះអាងថា ទំនាក់ទំនងបច្ចុប្បន្ន គឺចិនជាអ្នកឈ្នះ ខណៈកម្ពុជាជាអ្នកចាញ់យ៉ាងស្ងៀមស្ងាត់។ សារនយោបាយរបស់លោកស្រដៀងគ្នានឹងមេដឹកនាំម៉ាឡេស៊ីដែរគឺបញ្ហានៃការវិនិយោគរបស់ចិន និងការទាញយកប្រយោជន៍ច្រើនសន្ធឹកពីគម្រោងនានាដូចដីសម្បទាន ព្រៃឈើ និងធនធានរ៉ែ។

លោកអះអាងថា ប្រជាជនខ្មែរមិនមានឱកាសទទួលចំណេះជំនាញ វិជ្ជាជីវៈថ្មីអ្វីទេពីការវិនិយោគនេះ ព្រោះក្រុមហ៊ុនចិនមិនបាននាំបច្ចេកវិទ្យាមកស្រុកខ្មែរ ហើយបែរជាបន្តប្រជាជនខ្លួនមកធ្វើការជំនួសប្រជាជនកម្ពុជាទៅវិញ។ វាប្រៀបដូចជាការ ខ្ចីដីប្រើ ហើយទាញយកផលចំណេញទៅស្រុកវិញប៉ុណ្ណោះ។

ការបញ្ចេញនិន្នាការប្រឆាំងចិន ឬវៀតណាមមិនមែនជារឿងថ្មីសម្រាប់អ្នកនយោបាយខ្មែរទេ ឲ្យតែមានការបោះឆ្នោតមកដល់។ ប៉ុន្តែលើកនេះ សារនយោបាយចេញស្របពេលក្តីបារម្ភរបស់ប្រជាជនកម្ពុជាចំពោះកំណើនវិនិយោគិននិងជនជាតិចិនកើនឡើងដែរ។ វាគួរឲ្យសោកស្តាយត្រង់ថា សារនយោបាយត្រូវបរិបទតែទាស់កាលៈទេសៈ។

បន្ទាប់មកគឺនៅឥណ្ឌូណេស៊ី។ កាលពីឆ្នាំមុន វាមានពាក្យចរចាអារ៉ាមដែលធ្វើឲ្យប្រជាជនឥណ្ឌូណេស៊ីបារម្ភ និងចាប់ផ្តើមឃើញលំហូរវិនិយោគទុន និងកំណើនប្រជាជនចិនក្នុងផ្លូវអវិជ្ជមាន។ នោះគឺ ការផ្សព្វផ្សាយថា ប្រជាជនចិននៅឥណ្ឌូណេស៊ីកើនដល់ ២០លាននាក់ ដែលព័ត៌មានចរចាអារ៉ាមនេះបង្ខំឲ្យរដ្ឋាភិបាលចេញបកស្រាយភ្លាម។ រដ្ឋាភិបាលបង្ហាញតួលេខផ្លូវការដែលបញ្ជាក់ថា ប្រជាជនចិនធ្វើការនៅឥណ្ឌូណេស៊ីមានប្រហែល ២សែននាក់ប៉ុណ្ណោះ។

ក្នុងការបោះឆ្នោតប្រធានាធិបតីឥណ្ឌូណេស៊ីឆ្នាំក្រោយ ការឃោសនានយោបាយប្រឆាំងចិនក៏ប្រហែលជានឹងក្លាយជារឿងពេញនិយមជាថ្មីដែរ ខណៈដែលរដ្ឋាភិបាលដឹកនាំដោយប្រធានាធិបតី ចូកូ វីដូដូកំពុងពង្រឹងទំនាក់ទំនងការទូតនិងពាណិជ្ជកម្មជាមួយមហាយក្សចិននេះ។

មួយទៀតគឺ នៅរដ្ឋអាហ្វ្រិកស៊ីមបាវ៉េ។ មេដឹកនាំបក្សប្រឆាំង Nelson Chamisa ថ្មីៗនេះក៏បាន សន្យាបណ្តេញអ្នកវិនយោគចិនពីប្រទេស ឲ្យតែពលរដ្ឋបោះឆ្នោតឲ្យខ្លួនធ្វើជាប្រធានាធិបតីនៅខែកក្កដា ខាងមុខ។

អ្នកនយោបាយបក្សប្រឆាំងអះអាងពេញៗមាត់ថា ក្រុមហ៊ុនចិនចូលចិត្តកេងប្រវ័ញ្ច ប្រពឹត្តអំពើពុករលួយ ហើយរាល់ការវិនិយោគបម្រើតែប្រយោជន៍ក្រុមអភិជនមួយក្តាប់តូចដែលដឹកនាំរដ្ឋាភិបាល ខណៈរាស្ត្រសាមញ្ញបានត្រឹមរងទុក្ខប៉ុណ្ណោះ។ ប៉ុន្តែ វាមិនមែនងាយស្រួលដូចការសន្យាឯណា។ មុននឹងបណ្ដេញក្រុមហ៊ុនចិនចេញរួច ស៊ីមបាវ៉េប្រហែលត្រូវរកលុយមកសងបំណុលដែលរដ្ឋាភិបាលលោក រ៉ូបឺត មូហ្កាបេ ជំពាក់ចិនកន្លងមកឲ្យអស់សិនដែរ។

ការជំរុញឲ្យមានការពង្រឹងការគ្រប់គ្រង និងអនុវត្តច្បាប់លើការវិនិយោគបរទេសជារឿងសមរម្យ ហើយវាក៏អាចធានាពី ប្រយោជន៍ទៅវិញទៅមកយូរអង្វែងផង។ ចំណែកការបញ្ឆេះកំហឹង ឬលើកទឹកចិត្តឲ្យស្អប់ខ្ពើមជាតិសាសន៍នេះ ឬសាសន៍នោះ រួមទាំងការបណ្តេញអ្នកវិនិយោគបរទេស ឬលុបចោលកិច្ចព្រមព្រៀងវិនិយោគចោលនោះមិនមែនជារឿងត្រឹមត្រូវឡើយ។ វាក៏អាចមានផលអវិជ្ជមានច្រើនទាំងលើសេដ្ឋកិច្ច នយោបាយ និងសន្តិសុខថែមទៀត៕