ខ្មែរក្រហម
ជាតិ
លោក ប៊ូ ម៉េង ប្រកាសជំហរអព្យាក្រឹត ដោយមិនចូលរួមបាតុកម្មប្រឆាំងលោក កឹម សុខា
× លោក ប៊ូ ម៉េង ដែលជាអតីត ជនរងគ្រោះម្នាក់នៅក្នុង គុកទួលស្លែង ឬមន្ទីរ ស-២១ ក្នុងរបបកម្ពុជាប្រជាធិបតេយ្យ និងជាអនុប្រធានសមាគមន៍ជនរងគ្រោះក្នុងរបបកម្ពុជាប្រជាធិបតេយ្យ «ក្សេមក្សាន្ដ» ផងនោះ បានធ្វើការអះអាងថា គាត់នៅអព្យាក្រឹត ហើយនឹងមិនចូលរួមក្នុងបាតុកម្មនោះទេ។ នេះបើយោងតាមសេចក្ដីប្រកាសរបស់លោក កាលពីថ្ងៃទី៣ ខែមិថុនា កាលពីម្សិលមិញ។
លោកបន្តថា ក្នុងករណី លោក ជុំ ម៉ី ប្រកាសធ្វើបាតុកម្មនោះ គឺគាត់ធ្វើក្នុងនាមរបស់គាត់ផ្ទាល់ មិនមែនតាងនាមឲ្យសមាគមន៍ «ក្សេមក្សាន្ដ» នោះទេ ហើយសមានគមន៍ក៏ធ្លាប់បានចេញ សេចក្ដីថ្លែងការណ៍ ម្ដងរួចហើយ អំពីបញ្ហានេះ កាលពីថ្ងៃទី១ ខែមិថុនា។ ដោយលោកបានបញ្ជាក់ថា សមាគមន៍នេះ មានគោលការណ៍ ផ្សះផ្សាជាតិ មិនមានគោលបំណង បំបែកបំបាក់ជាតិនោះទេ។
លោក ប៊ូ ម៉េងបានបន្តទៀតថា ហេតុដែលលោកធ្វើសេចក្ដីថ្លែងការណ៍នេះឡើង ព្រោះតែងតែមានពាក្យចចាមអារាមថា លោកនឹងចូលរួមធ្វើបាតុកម្មនោះ។
ចំណែកលោក ជុំ ម៉ី ដែលជាអតីតជនរងគ្រោះ នៅក្នុងគុកទួលស្លែងដូចគ្នានេះដែរ បានកំណត់ពេលធ្វើបាតុកម្ម ប្រឆាំងនឹងលោក កឹម សុខា ប្រធានស្ដីទីគណបក្សសង្គ្រោះជាតិ។ ហើយបាតុកម្មនោះ នឹងត្រូវធ្វើឡើងនៅថ្ងៃទី៩ ខែមិថុនាខាងមុខនេះ ដែលនឹងមានអ្នកមនុស្ស ២ម៉ឺននាក់ចូលរួមក្នុងបាតុកម្មនោះ។
ការប្រកាសធ្វើបាតុកម្មនេះ គឺធ្វើឡើងដើម្បីឲ្យ លោក កឹម សុខា ធ្វើការសុំទោសចំពោះ ពាក្យដែលលោកធ្លាប់បាននិយាយថា ទួលស្លែងកឺជាគុកសិប្បនិម្មិត រៀបចំឡើងដោយវៀតណាម ដោយគ្មានការធ្វើទារុណកម្ម និងការសំលាប់មនុស្ស ក្នុងរបបកម្ពុជាប្រជាធិបតេយ្យនោះទេ។
ចំពោះលោក កឹម សុខា វិញគឺលោកបានបដិសេធ ដោយមិនធ្វើការសុំទោសអ្វីទាំងអស់ ព្រោះលោកបានអះអាងថា លោកមិនដែលនិយាយដូច្នេះនោះទេ ដោយ លោកជឿជាក់ថា សឡលេងរបស់លោកត្រូវបានគេកាត់ត ហើយលោកក៏ធ្លាប់បានបញ្ជាក់ដែរថា លោកក៏ជាជនរងគ្រោះម្នាក់ ក្នុងរបបនោះផងដែរ៕
© រក្សាសិទ្ធិដោយ thmeythmey.com