ជាតិ
នយោបាយជាតិ
សង្គ្រោះជាតិ នៅសល់ឱកាសត្រឹមថ្ងៃនេះ
× ការចុះឈ្មោះគណបក្សនយោបាយនៅគណៈកម្មាធិការជាតិរៀបចំការបោះឆ្នោត (គ.ជ.ប.) ដើម្បីចូលរួមប្រកួតប្រជែងការបោះឆ្នោត ត្រូវបិទបញ្ចប់នៅរសៀលថ្ងៃទី១៤ ខែឧសភា ឆ្នាំ២០១៨នេះហើយ។ ចំពោះអតីតគណបក្សសង្គ្រោះជាតិ កុំថាឡើយបានចុះឈ្មោះនៅគ.ជ.ប. ជាមួយគេឯង តែសូម្បីរស់ឡើងវិញ នៅមិនទាន់រស់ផង។
ការបោះឆ្នោតថ្ងៃទី២៩ ខែកក្កដា ឆ្នាំ២០១៨ នឹងមិនមានអតីតគណបក្សសង្គ្រោះជាតិនោះទេ ប្រសិនបើអតីតគណបក្សប្រឆាំងដ៏ធំមួយនេះ មិនបានចុះឈ្មោះនៅគ.ជ.ប. ក្នុងថ្ងៃនេះ។ លោក ហង្ស ពុទ្ធា អ្នកនាំពាក្យគ.ជ.ប. ប្រាប់សារព័ត៌មានថ្មីៗតាមទូរសព្ទយ៉ាងដូច្នេះថា៖«បើគណបក្សហ្នឹង មិនបានដាក់ពាក្យនៅថ្ងៃហ្នឹងទេ គឺស្មើនឹងមិនបានចូលរួមប្រកួតក្នុងការបោះឆ្នោត»។
យ៉ាងណាក៏ដោយ លោក សម រង្ស៊ី អតីតប្រធានគណបក្សសង្គ្រោះជាតិ នៅតែនិយាយពីក្រៅប្រទេសមកថា លោក និងក្រុមអ្នកប្រឆាំង នឹងបន្តការតស៊ូ ដើម្បីឲ្យគណបក្សសង្គ្រោះជាតិ រស់ឡើងវិញ ហើយបានចូលរួមក្នុងការបោះឆ្នោត។ ផ្ទុយមកវិញ លោក សម រង្ស៊ី បានអំពាវនាវកុំឲ្យប្រជាពលរដ្ឋទៅបោះឆ្នោត បើគ្មានគណបក្សសង្គ្រោះជាតិ។
គណបក្សស្របច្បាប់ទាំងអស់នៅកម្ពុជាបច្ចុប្បន្ន មានដល់៤១ឯណោះ។ លោក ហង្ស ពុទ្ធា អះអាងថា រហូតមកដល់ព្រឹកថ្ងៃទី១៤នេះ ក្នុងចំណោមគណបក្សទាំង៤១ មានគណបក្ស១២ហើយ ដែលបានយកពាក្យទៅដាក់នៅគ.ជ.ប. ខណៈគណបក្ស២ទៀត កំពុងបំពេញបែបបទ៕
© រក្សាសិទ្ធិដោយ thmeythmey.com