ខ្មែរក្រហម
ជាតិ
នយោបាយជាតិ
លោក ជុំ ម៉ី៖ បាតុកម្មអហឹង្សាគឺសំដៅតែចំពោះបុគ្គល កឹម សុខា ប៉ុណ្ណោះ
× សារជាថ្មីម្តងទៀត លោក ជុំ ម៉ី តំណាងអតីតជនរងគ្រោះគុកទួលស្លែងបានអំពាវនាវឲ្យមានការគាំទ្រ និងចូលរួមក្នុងមហាបាតុកម្មអហឹង្សាប្រឆាំងលោក កឹម សុខា ប្រធានស្តីទីគណបក្សសង្គ្រោះជាតិដែលបាននិយាយថា «គុកទួលស្លែងជាសិប្បនិម្មិត»។ គម្រោងមហាបាតុកម្មនេះ នឹងប្រព្រឹត្តទៅនៅថ្ងៃអាទិត្យទី៩ ខែមិថុនា ឆ្នាំ២០១៣ នៅទីលានប្រជាធិបតេយ្យ។
លោក ជុំ ម៉ី បានបញ្ជាក់ថា មហាបាតុកម្មប្រឆាំងបុគ្គល កឹម សុខា គឺជាការបង្ហាញឲ្យឃើញថា ទាំងអស់គ្នាពិតជាមានការឈឺចាប់ចំពោះសំដីអ្នកនយោបាយរូបនេះដែលបានថ្លែងថា «គុកទួលស្លែងជាសិប្បនិម្មិត» ព្រោះម្នាក់ៗសុទ្ធតែបានឆ្លងកាត់របបប្រល័យពូជសាសន៍ដូចគ្នា។
នៅក្នុងសេចក្តីអំពាវនាវរបស់ខ្លួន លោក ជុំ ម៉ី បានសរសេរថា៖ «សូមមេត្តាចូលអហឹង្សា និងសំដៅឆ្ពោះតែចំពោះបុគ្គល លោក កឹម សុខា តែម្នាក់ប៉ុណ្ណោះ ក្នុងបំណងគ្រាន់តែបង្ខំឲ្យបុគ្គលរូបនេះមកទទួលខុសត្រូវនូវអ្វីដែលខ្លួនបាននិយាយបំភ្លៃភស្តុតាងប្រវត្តិសាស្ត្រ។ ក្រៅពីបុគ្គល លោក កឹម សុខា ទោះកូនចៅ ឬសាច់ញាតិក្រុមគ្រួសាររបស់លោក កឹម សុខា គណបក្សនយោបាយ និងអ្នកគាំទ្រ យើងមិនត្រូវប៉ះពាល់ជាដាច់ខាត»។
យោងតាមវីដេអូឃ្លីបដែលថ្លែងពីប្រទេសសឹង្ហបុរី លោក កឹម សុខា បានបញ្ជាក់ថា លោកនឹងត្រឡប់មកកាន់កម្ពុជាវិញនៅថ្ងៃទី៧ ខែមិថុនា ស្អែកនេះ ដើម្បីប្រឈមមុខតទល់ទៅនឹងក្រុមដែលត្រៀមធ្វើទុកបុកម្នេញលើលោកតាមរូបភាពផ្សេងៗ ។
នាសន្និសីទសារព័ត៌មានក្នុងរាជធានីភ្នំពេញកន្លងមកលោក កឹម សុខា បានបញ្ជាក់លោកមិនដែលនិយាយថាគ្មានរបបប្រល័យពូជសាសន៍ម្តងណាឡើយ ហើយលោកក៏មិនធ្លាប់និយាយថា គ្មានការកាប់សម្លាប់ ឬការធ្វើទារុណកម្មនៅក្នុងរបបនោះដែរ បន្ថែមពីលើនេះ លោកអះអាងថា លោកមិនដែលនិយាយថា គុកទួលស្លែងជាគុកសិប្បនិម្មិតម្តងណាឡើយ៕
© រក្សាសិទ្ធិដោយ thmeythmey.com