កីឡាអន្តរជាតិ
អន្តរជាតិ
Ronaldo ឆ្លើយទៅកាន់អ្នកកាសែតថា៖ «ខ្ញុំខ្ពស់ជាង Salah» Ronaldo និង Salah កាលពីប្រជែងគ្នាឲ្យក្រុមជម្រើសជាតិក្នុងវគ្គជម្រុះ World Cup កន្លងមក
× Cristiano Ronaldo ព្យាយាមមិនឆ្លើយសំណួរប្រៀបធៀបណាមួយជាមួយ Mohamed Salah ពីសំណាក់អ្នកកាសែត ខណៈដែលកីឡាករសំខាន់ទាំងពីរត្រូវតទល់គ្នាដើម្បីប្រជែងពាន UEFA Champions League វគ្គផ្តាច់ព្រ័ត្រឲ្យក្រុមរៀងខ្លួនរវាង Real Madrid និង Liverpool នៅរាត្រីថ្ងៃទី២៧ ខែឧសភា។
អ្នកទាំងពីរ Ronaldo និង Salah បានបង្កើតភាពអស្ចារ្យរៀងៗខ្លួនដោយអាចនាំក្រុមជម្រើសជាតិរបស់ពួកគេឈានទៅកាន់ការប្រកួតពានរង្វាន់ World Cup នៅរុស្ស៊ី និងជួយក្លិបឡើងមកកាន់វគ្គផ្តាច់ព្រ័ត្រពានកំពូលអឺរ៉ុបសម្រាប់រដូវកាល២០១៧-២០១៨នេះ ដែលនឹងធ្វើឡើងក្នុងទីក្រុងកៀរ ប្រទេសអ៊ុយក្រែន។
ខ្សែប្រយុទ្ធឆ្នើមរបស់ Real Madrid អាចរកគ្រាប់បាល់ស៊ុតបញ្ចូលទីពីគ្រប់ការប្រកួត ៤៣គ្រាប់រដូវកាលនេះ ខណៈតារាស៊ុតរបស់ Liverpool រកគ្រាប់បាល់បាន៤៤គ្រាប់ និងជាប់ជាកីឡាករសម្រេចទីច្រើនជាងគេ Golden Boots ពីក្របខណ្ឌ Premier League ផង។
ដោយសារហេតុផលខាងលើនេះ ទើបធ្វើឲ្យបណ្តារអ្នកសារព័ត៌មានល្បីៗ បានចោទសួរ និងប្រៀបធៀបរវាងអ្នកទាំងពីរ ដោយអ្នកខ្លះយល់ឃើញថាក្នុងចំណោម Salah និង Ronaldo មានម្នាក់នឹងឈ្នះពាន Ballon d'Or ប្រសិនបើក្រុមរបស់គេលើកពាន Champions League។
អតីតសមាជិក Manchester United វ័យ៣២បានប្រាប់ BT Sport បែបកំប្លែងថា៖«មានអ្នកចង់ប្រៀបធៀបខ្ញុំជាមួយកីឡាករផ្សេងទៀត ខ្ញុំខុសពីអ្នកផ្សេង។ Salah ក៏ខុសពីអ្នកគ្រប់គ្នាដែរ។ ដូច្នេះយើងខុសគ្នា។ គាត់លេងជើងឆ្វេង ខ្ញុំលេងជើងស្តាំ ខ្ញុំខ្ពស់ គាត់ទាបជាងខ្ញុំបន្តិច។ យើងមានភាពខុសគ្នាទាំងស្រុង។ ខ្ញុំទទួលស្គាល់ថាគាត់មានរដូវកាលដ៏អស្ចារ្យ ប៉ុន្តែអ្វីៗនឹងសម្រេចនៅថ្ងៃសៅរ៍នេះ»។ នេះបើតាមការផ្សាយរបស់ DailyMail។
ខ្សែប្រយុទ្ធសញ្ជាតិអេហ្ស៊ីបវ័យ២៥ឆ្នាំ កំពុងសម្លឹងរកការឈ្នះពានរង្វាន់អឺរ៉ុបដ៏សំខាន់ជាលើកដំបូងរបស់ខ្លួនជាមួយហង្សក្រហម ស្របពេលដែលវីរបុរសរបស់ព័រទុយហ្គាល់រំពឹងថា នឹងឈ្នះពានរង្វាន់ជើងឯកដ៏ធំនេះជាលើកទី៥ និងជាលើកទី៣ជាប់គ្នាសម្រាប់ក្លិបយក្សអេស្ប៉ាញ។
ប្រសិនបើ Ronaldo អាចលើកពាននេះបានមែននោះគឺជារឿងដែលមិនគួរឲ្យជឿ ហើយរូបគេនឹងស្ថិតក្នុងសៀវភៅប្រវត្តិសាស្ត្រក្នុងនាមកីឡាករបាល់ទាត់ជោគជ័យបំផុតលើលោក៕
Tag:
បាល់ទាត់
Cristiano Ronaldo
Mohamed Salah
UEFA Champions League
© រក្សាសិទ្ធិដោយ thmeythmey.com