FIFA
កីឡាអន្តរជាតិ
អន្តរជាតិ
FIFA ដកអាជ្ញាកណ្តាលអាស៊ីម្នាក់ពី World Cup ដោយសារជាប់ករណីស៊ីសំណូក
× សហព័ន្ធកីឡាបាល់ទាត់អន្តរជាតិ FIFA បានដកសិទ្ធិអាជ្ញាកណ្តាលលោក Fahad Al-Mirdasi ចេញពីការប្រកួតពានរង្វាន់ World Cup ឆ្នាំ ២០១៨ នៅរុស្ស៊ី បន្ទាប់ពីរកឃើញថាមានជាប់ពាក់ព័ន្ធករណីកំណត់លទ្ធផលប្រកួត។ នេះបើតាមការផ្សាយរបស់ FIFA.com ។
FIFA សម្រេចដកអាជ្ញាកណ្តាលវ័យ៣២ឆ្នាំរូបនេះ នៅក្រោយពេលសហព័ន្ធកីឡាបាល់ទាត់អារ៉ាប៊ីសាអ៊ូឌីត (SAFF) ដាក់បំរាមមិនឲ្យមានសកម្មភាពកាត់ក្តីនៅលើទីលានអស់មួយជីវិត។
Al-Mirdasi បានសារភាពថាខ្លួនព្យាយាមរៀបចំលទ្ធផលទុកមុននៅក្នុងការប្រកួតវគ្គផ្តាច់ព្រ័ត្រពាន King’s Cup វាងក្រុម Al-Ittihad និង Al -Faisaly។ បន្ទាប់ពីពិចារណាលើភ័ស្តុតាង និងចម្លើយសារភាពខាងលើនេះ FIFA បាននិយាយថាលក្ខខណ្ឌរបស់អាជ្ញាកណ្តាល សញ្ជាតិអារ៉ាប៊ីសាអ៊ូឌីតរូបនេះមិនគ្រប់គ្រាន់ដើម្បីជ្រើសរើសទៅកាត់សេចក្តីនៅ World Cup នៅខែក្រោយទៀតនោះទេ។
ក្រៅពីលោក Al-Mirdasi អង្គភាពគ្រប់គ្រងកីឡាបាល់ទាត់ពិភពលោកក៏បានបញ្ឈរជើងអាជ្ញាកណ្តាលពីររូបទៀត រួមមានលោក Mohammed Al-Abakry និងលោក Abdulah Al-Shalwai ដែលត្រូវបានគេរកឃើញថាមានជាប់ពាក់ព័ន្ធជាមួយ Al-Mirdasi ដែរ។
FIFA បានប្រកាសឈ្មោះអាជ្ញាកណ្តាល និងជំនួយការអាជ្ញាកណ្តាលចំនួន ៣៦រូប រូចមកហើយកាលពីខែមីនាកន្លងទៅ ដើម្បីយកទៅកាត់សេចក្តីក្នុងព្រឹត្តិការណ៍កីឡាបាល់ទាត់ពិភពលោក ឆ្នាំ២០១៨ នៅរុស្ស៊ី ដែលក្នុងនោះមិនមានអាជ្ញាកណ្តាលមកពីចក្រភពអង់គ្លេសឡើយ៕
Tag:
បាល់ទាត់
FIFA World Cup
អាជ្ញាកណ្តាល
Fahad Al-Mirdasi
© រក្សាសិទ្ធិដោយ thmeythmey.com