ជាតិ
រាល់ព័ត៌មានតាមប្រព័ន្ធ «អ៊ីនធឺណិត» ស្ថិតក្រោមការឃ្លាំមើលរបស់ក្រសួងបី ពិឆ្វេងទៅស្តាំ៖ សម្តេច ស ខេង រដ្ឋមន្ត្រីក្រសួងមហាផ្ទៃ លោក ខៀវ កាញ្ញារីទ្ធ រដ្ឋមន្ត្រីក្រសួងព័ត៌មាន និងលោក ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍
× រាល់ការផ្សព្វផ្សាយរបស់គេហទំព័រនានា រួមទាំងបណ្តាញទំនាក់ទំនងសង្គមផង ដូចជា ហ្វេសប៊ុក ជាដើម ត្រូវស្ថិតនៅក្រោមក្រសែភ្នែកមន្ត្រីជំនាញរបស់ក្រសួងមហាផ្ទៃ ក្រសួងព័ត៌មាន និងក្រសួងប្រៃសណីយ៍ និងទូរគមនាគមន៍។ មិនថាគេហទំព័រសារព័ត៌មានផ្លូវការ ឬក៏បណ្តាញទំនាក់ទំនងសង្គមនោះទេ សុទ្ធតែអាចប្រឈមនឹងផ្លូវច្បាប់ទាំងអស់ ប្រសិនបើក្រុមជំនាញរបស់ក្រសួងទាំងបី មើលឃើញថា បានផ្សព្វផ្សាយ ឬចែកចាយដំណឹង ដែលបង្កបញ្ហាដល់សង្គម។
វិធានការក្តៅរបស់ក្រសួងមានសមត្ថកិច្ចទាំងបីខាងលើ គឺធ្វើឡើងតាមរយៈប្រកាសរួមគ្នាមួយ កាលពីចុងខែឧសភា កន្លងទៅ។ គោលដៅធំបំផុតនៃប្រកាសនោះ គឺដើម្បីប្រឆាំងនិងទប់ស្កាត់ការផ្សព្វផ្សាយនូវរាល់ខ្លឹមសារព័ត៌មានទាំងអស់ រួមមានអក្សរ សំឡេង រូបភាព វីដេអូ និងទម្រង់ផ្សេងៗទៀត នៅលើគេហទំព័រ និងបណ្តាញទំនាក់ទំនងសង្គម ដែលមានចេតនាបង្កចលាចល ធ្វើឲ្យអន្តរាយដល់សន្តិសុខ សេដ្ឋកិច្ច សណ្តាប់ធ្នាប់សាធារណៈ វិស័យការពារជាតិ ទំនាក់ទំនងជាមួយប្រទេសដទៃ និងបណ្តាលឲ្យមានការរើសអើង រួមទាំងប៉ះពាល់ដល់វប្បធម៌ និងប្រពៃណី។
ប្រកាសដែលមាន១០ប្រការនោះ បានលើកឡើងថា ក្រសួងទាំងបី នឹងចាត់តាំងអង្គភាពជំនាញរៀងៗខ្លួន ឲ្យធ្វើជាសេនាធិការ ដើម្បីងាយស្រួលក្នុងការសហការគ្នា និងតាមដាន សិក្សា ស្រាវជ្រាវ ស្វែងរកនូវការធ្វើអាជីវកម្ម និងការផ្សព្វផ្សាយល្មើសច្បាប់ តាមគេហទំព័រ និងបណ្តាញទំនាក់ទំនងសង្គម ដើម្បីចាត់វិធានការតាមនីតិវិធីច្បាប់៕
Tag:
សារព័ត៌មាន
បណ្តាញសង្គម
ចំណាត់ការ
ក្រសួង
© រក្សាសិទ្ធិដោយ thmeythmey.com