ខ្មែរក្រហម
ជាតិ
ចំណុចសំខាន់ៗដ៏គួរឲ្យកត់សម្គាល់នៅក្នុងក្បួនបាតុកម្មប្រឆាំងលោក កឹម សុខា មហាបាតុកម្មដែលបានរៀបចំឡើងនៅព្រឹកថ្ងៃអាទិត្យនេះ គឺមានលក្ខណៈទ្រង់ទ្រាយធំបំផុតដោយមនុស្សរាប់ម៉ឺននាក់បានជួបជុំគ្នានៅមុខទីលានប្រជាធិបតេយ្យ អមដោយបដាជាច្រើនក្នុងគោលដៅជំរុញឲ្យលោក កឹម សុខា ធ្វើការសុំទោសចំពោះជនរងគ្រោះក្នុងរបបខ្មែរក្រហម។បើតាមក្រុមបាតុករក្រោមការដឹកនាំរបស់លោក ជុំ ម៉ី អះអាងថា ប្រធានស្តីទីគណបក្សសង្គ្រោះជាតិរូបនេះ បាននិយាយថា ទួលស្លែងជាគុកសិប្បនិម្មិត។
យោងតាមលោក ជុំ ម៉ី អ្នកចូលរួមមានចំនួនប្រមាណ៣ម៉ឺននាក់ដែលច្រើនជាងការគ្រោងទុក ហើយអ្វីដែលគួរឲ្យកត់សម្គាល់នោះ បណ្តាទូរទស្សន៍នានាបានធ្វើការយ៉ាងសស្រាក់សស្រាំដើម្បីផ្សព្វផ្សាយផ្ទាល់អំពីព្រឹត្តិការណ៍នេះ។
ថ្វីត្បិតសារនៅក្នុងបដាសុទ្ធតែបង្ហាញនូវទុក្ខសោក ការកើតទុកមិនសុខចិត្តចំពោះសម្តីលោក កឹម សុខា ក៏ដោយ ប៉ុន្តែគេមិនបានឃើញនូវសម្រែកទួញសោក និងទឹកភ្នែករបស់ក្រុមបាតុករនាអំឡុងពេលធ្វើបាតុកម្មនោះឡើយ។
ទឹកសុទ្ធត្រូវបានចែកចាយដោយសេរីដល់ក្រុមអ្នកចូលរួម ហើយនៅឱកាសនោះផងដែរ គេសង្កេតឃើញមានក្រុមយុវជនដែលបានឆ្លងកាត់របបខ្មែរមានចំនួនដ៏ច្រើន ពោលគឺប្រហែលជាពាក់កណ្តាលក្នុងចំណោមអ្នកចូលរួមទាំងអស់។
នៅមុនចាកចេញដំណើរឆ្ពោះទៅកាន់ទីស្នាក់ការគណបក្សសង្គ្រោះជាតិ តំណាងក្រុមបាតុករបានអះអាងសារជាថ្មីថា មហាបាតុកម្មនេះ គឺសំដៅប្រឆាំងតែលើបុគ្គលកឹម សុខា តែប៉ុណ្ណោះដោយមិនមានការជំរុញពីគណបក្សនយោបាយណាមួយនោះឡើយ។
អ្នកចូលរួមខ្លះបានបង្ហាញពីឆន្ទះរបស់ខ្លួនក្នុងការប្រឆាំងលោក កឹម សុខា ដោយពួកគេបានអះអាងថា ប្រធានស្តីទីគណបក្សសង្គ្រោះជាតិរូបនេះ គឺជាជនអគតិដែលបំភ្លេចចោលនូវរបបខ្មែរក្រហម ប៉ុន្តែយុវជនមួយចំនួនដែលចូលរួមក្នុងព្រឹត្តិការណ៍នេះបានអះអាងដោយចំហរថា ពួកគេបង្ហាញវត្តមានជាមួយនឹងថ្នូរជាលុយកាក់។
អ្វីដែលគួរឲ្យកត់សម្គាល់នោះ លោក ជុំ ម៉ី បែរបានធ្វើការរិៈគន់ចំៗចំពោះការបង្កើតគណបក្សសង្គ្រោះជាតិ។ លោកលើកឡើងថា៖ «យើងមិនសុខចិត្តទេ រណសិរ្សសង្គ្រោះជាតិបង្កើតយូរហើយ រឿងអីទៅបង្កើតគណបក្សសង្គ្រោះជាតិ?»។ លោកបន្ថែមថា សព្វថ្ងៃមានមន្ទីរពេទ្យ សាលារៀន ផ្លូវថ្នល់អស់ហើយ ហើយអ្វីត្រូវដូរ នេះជាចំណុចមួយដែលធ្វើឲ្យលោកមានការក្តៅក្រហាយ។
នៅតាមដងផ្លូវ មុខវត្ត សាលារៀន មានក្រុមមនុស្សនាំគ្នាលើកបដា ដែលភាគច្រើនជាយុវជន ហើយពួកគេបាននិយាយតាមមេក្រូដើម្បីបង្ហាញពីការប្រឆាំងយ៉ាងខ្លាំងក្លាចំពោះលោក កឹម សុខា។
ក្បួនរបស់រថយន្តរបស់លោក ជុំ ម៉ី ត្រូវបានអមដោយរថយន្ត និងម៉ូតូជាច្រើនពាន់គ្រឿងដែលចំនួននេះច្រើនជាងការកំណត់របស់ក្រសួងមហាផ្ទៃដែលបានអនុញ្ញាត្តឲ្យមានតែ៥០០នាក់ប៉ុណ្ណោះក្នុងការហែរក្បួនតាមផ្លូវ។
ទីស្នាក់ការគណបក្សសង្គ្រោះជាតិនៅផ្លូវត្រឡោកបែក ត្រូវបានបិទទ្វារជិត។ នៅពេលដែលក្បួនបាតុកម្មរបានទៅដល់ លោក ជុំ ម៉ី និងតំណាងបាតុករផ្សេងទៀត បានតម្រូវឲ្យអង្គុយចាំនៅលើផ្លូវទល់មុខទីស្នាក់ការ។ លោក ជុំ ម៉ី លើកដៃសំពះជាប់រហូតជាមួយនឹងអាការៈហេវហត់យ៉ាងខ្លាំង។
នាវេលាម៉ោង៩ និង៣០នាទី បុរសម្នាក់អាវឆ្នូតខ្លី បានណែនាំលោក ជុំ ម៉ី ឲ្យប្រកាសទៅកាន់ថ្នាក់ដឹកនាំគណបក្សសង្គ្រោះជាតិនាំគ្នាចេញមកទទួលញត្តិរបស់ខ្លួន។ ប៉ុន្មាននាទីក្រោយមក លោក ជួន សុវណ្ណ ស្នងការនគរបាលរាជធានីភ្នំពេញ បានចេញមកធ្វើការសម្របសម្រួល។
លោកស្រី មូរ សុខហួរ និងតំណាង៧នាក់ទៀតរបស់គណបក្សសង្គ្រោះជាតិបានចេញទៅទទួលញត្តិពីលោក ជុំ ម៉ី ទាំងញញឹមញញែម។ លោក ជុំ ម៉ី បានអះអាងថា ចំពោះមុខតំណាងគណបក្សសង្គ្រោះជាតិថា មហាបាតុកម្មរបស់លោក មិនជាប់ពាក់ព័ន្ធរឿងនយោបាយឡើយ។
ទោះបីជាយ៉ាងណាក៏ដោយ លោកស្រី មូរ សុខហួរ បានប្រកាសពីជំហរមិនសុំទោសរបស់ កឹម សុខា។ តើបាតុកម្មនេះធ្វើក្រោមរូបភាពនយោបាយ ឬយ៉ាងណា? លោកស្រី មូរ សុខហួរ បានបដិសេធមិនផ្តល់ចម្លើយ៕
© រក្សាសិទ្ធិដោយ thmeythmey.com