Salah យល់ព្រមពន្យាកិច្ចសន្យាជាមួយ Liverpool រហូតឆ្នាំ២០២៣

កីឡាអន្តរជាតិ

អន្តរជាតិ

Salah យល់ព្រមពន្យាកិច្ចសន្យាជាមួយ Liverpool រហូតឆ្នាំ២០២៣

02, Jul 2018 , 10:39 pm

រូបភាព

ដោយ: ទេព ពិទូរ្យ

Mohamed Salah បានយល់ព្រមពន្យាកិច្ចសន្យារយៈពេល ៥ឆ្នាំទៀតជាមួយ Liverpool បន្ទាប់ពីបង្ហាញខ្លួនមួយរដូវកាលនៅលើទឹកដីអង់គ្លេសដ៏គួរឲ្យភ្ញាក់ផ្អើល។ នេះបើតាមការផ្សាយរបស់គេហទំព័រផ្លូវការបស់ Liverpool ។

ខ្សែប្រយុទ្ធអន្តរជាតិអេហ្ស៊ីបវ័យ ២៦ ឆ្នាំរូបនេះ បានផ្លាស់ពីRoma ទៅកាន់ទឹកដី Anfeld ក្នុងតម្លៃ ៣៤លានផោន (៤៤.៧៧លានដុល្លារ) កាលពីរដូវកាលមុន។ ការបង្ហាញខ្លួនឲ្យក្រុមរហស្សនាមហង្សក្រហមមួយរដូវកាលដំបូងរូបគេអាចរកគ្រាប់បាល់ស៊ុតបញ្ចូលទីសរុប ៤៤ គ្រាប់ក្នុងការបង្ហាញខ្លួន ៥២ ប្រកួត និងក្លាយម្ចាស់ស្បែកជើងមាស (Golden Boot) ប្រចាំក្របខណ្ឌ Premier League ទៀតផង។

កិច្ចព្រមព្រៀងថ្មីរយៈពេល៥ឆ្នាំ មានន័យថាអតីតសមាជិកកីឡាកររបស់ Chelsea ត្រូវជាប់កិច្ចសន្យាជាមួយ Liverpool រហូតដល់ឆ្នាំ ២០២៣ ហើយក្លិបនេះក៏មិនបានបញ្ចេញតម្លៃទិញផ្តាច់កុងត្រា (release clause) របស់រូបគេដែរ។

ជុំវិញការចុះកិច្ចព្រមព្រៀងនេះ លោក Jurgen Klopp អ្នកចាត់ការទូទៅ Liverpool បាននិយាយថា៖«នេះជាការបង្ហាញយ៉ាងច្បាស់ពីការជឿជាក់របស់ Salah មកលើ Liverpool និងជំនឿរបស់យើងទៅលើ Salah ដូចគ្នា»។

ក្រៅពីជាអ្នកស៊ុតបញ្ចូលទីច្រើនជាងគេនៅអង់គ្លេសប្រចាំរដូវកាល ២០១៧-២០១៨ កន្លងទៅ Salah ក៏បានក្លាយជាម្ចាស់ពាន PFA Player of the Year ឆ្នាំ២០១៨ ពានកីឡាករល្អបំផុតប្រចាំទ្វីបអាហ្វ្រិក និងឈ្នះពានជាច្រើនទៀត៕