ម៉ារ៉ាតុនអន្តរជាតិចក្រភពខ្មែរទាក់ទាញអត្តពលិកជាង៣ពាន់នាក់មកពី៥០ប្រទេសចូលរួម

កីឡាជាតិ

ជាតិ

ម៉ារ៉ាតុនអន្តរជាតិចក្រភពខ្មែរទាក់ទាញអត្តពលិកជាង៣ពាន់នាក់មកពី៥០ប្រទេសចូលរួម

04, Aug 2018 , 11:39 pm

រូបភាព

ដោយ:

ព្រលឹមស្រាងៗអត្តពលិកជាតិ និងអន្តរជាតិ ដែលមានពាក់ស្លាកលេខសម្គាល់នៅលើអាវយ៉ាងច្រើនកុះករ បានមកជួបជុំគ្នានៅមុខកសិណអង្គរក្នុងខេត្តសៀមរាប។ ពួកគេមកទីនេះ គឺដើម្បីត្រៀមប្រជែងដណ្តើមជើងឯក ប្រចាំព្រឹត្តិការណ៍រត់ប្រណាំងម៉ារ៉ាតុនអន្តរជាតិចក្រភពខ្មែរនៅឆ្នាំនេះ។ ព្រឹត្តិការណ៍នេះ រៀបចំក្នុងគោលបំណងស្វែងរកមូលនិធិសប្បុរសធម៌ និងទាក់ទាញភ្ញៀវទេសចរ ឲ្យមកទស្សនាតំបន់រមណីយដ្ឋានប្រវត្តិសាស្ត្រអង្គរក្នុងរដូវខ្សត់ខ្សោយភ្ញៀវទេសចរណ៍។

នៅព្រឹកថ្ងៃទី៥ ខែសីហានេះ អត្តពលិកជាតិនិងអន្តរជាតិមកពី៤៩ប្រទេសប្រមាណជាង៣ពាន់នាក់ បានមកជួបជុំគ្នានៅបរិវេណមុខកសិណអង្គរ ដែលជារមណីយដ្ឋានប្រវត្តិសាស្ត្រដ៏អស្ចារ្យក្នុងខេត្តសៀមរាបនៃប្រទេសកម្ពុជា។ ការមកកាន់បរិវេណអង្គរទាំងព្រលឹមស្រាងៗរបស់ពួកគេ គឺដើម្បីរៀបចំខ្លួនត្រៀមប្រជែងដណ្តើមជើងឯក ប្រចាំព្រឹត្តិការណ៍រត់ប្រណាំងម៉ារ៉ាតុនអន្តរជាតិចក្រភពខ្មែរលើកទី៥នៅឆ្នាំនេះ។

ចំនួននេះ មានការកើនឡើងជាង១ពាន់នាក់ បើធៀបនឹងឆ្នាំមុនមានចំនួន២,០៩០នាក់។ ក្នុងចំណោមអត្តពលិកបរទេសជាង១ពាន់នាក់ ភាគច្រើនមកពីតំបន់អាស៊ី ដោយចិនឈរលំដាប់ទី១ ខណៈជប៉ុន និងម៉ាឡេស៊ីឈរជាបន្តបន្ទាប់។ ការកើនឡើងនេះដោយសារខែសីហា ប្រទេសក្នុងតំបន់អាស៊ីមានវិស្សមកាលច្រើនជាងប៉ែកអឺរ៉ុប។ នេះបើយោងតាមការបញ្ជាក់របស់លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា។

ព្រឹត្តិការណ៍រៀបចំដោយក្រសួងទេសចរណ៍ សហការជាមួយគណៈកម្មាធិការជាតិអូឡាំពិកកម្ពុជាមួយនេះ ធ្វើឡើងក្នុងគោលបំណងស្វែងរកមូលនិធិសប្បុរសធម៌ ជួយមន្ទីរពេទ្យកុមារអង្គរ និងអង្គការសប្បុរសធម៌ ពិសេសបំផុសស្មារតីឲ្យប្រជាពលរដ្ឋចេះថែរក្សាបរិស្ថានជុំវិញអង្គរ។ លើសពីនេះ ដើម្បីទាក់ទាញភ្ញៀវទេសចរណ៍ជាតិ និងអន្តរជាតិ ឲ្យមកទស្សនាតំបន់រមណីយដ្ឋានប្រវត្តិសាស្ត្រអង្គរ ដែលបានបន្សល់ទុកដោយបុព្វបុរសខ្មែរ។

លោក វ៉ាត ចំរើន ដែលជាអនុរដ្ឋលេខាធិការក្រសួងទេសចរណ៍ដែរនោះរំពឹងថា តាមរយៈព្រឹត្តិការណ៍នេះ នឹងជួយផ្តល់ការងារ និងចំណូលមួយចំនួនដល់ប្រជាពលរដ្ឋ ដើម្បីដោះស្រាយជីវភាពគ្រួសារប្រចាំថ្ងៃក្នុងរដូវខ្សត់ខ្សោយភ្ញៀវទេសចរណ៍នេះ។

លោក សែម ផល្លា នាយកប្រតិបត្តិព្រឹត្តិការណ៍ម៉ារ៉ាតុន និងពាក់កណ្តាលម៉ារ៉ាតុនអន្តរជាតិនៃក្រសួងទេសចរណ៍បានបញ្ជាក់ថា កងកម្លាំងសន្តិសុខត្រូវបានដាក់ពង្រាយគ្រប់ទីកន្លែងក្នុងបរិវេណអង្គរ ពិសេសតាមគោលដៅរត់ ដើម្បីរក្សាសណ្តាប់ធ្នាប់ សន្តិសុខ និងការពារសុវត្ថិភាពជូនភ្ញៀវទេសចរណ៍ជាតិនិងអន្តរជាតិ ដែលចូលរួមក្នុងព្រឹត្តិការណ៍នេះ។

ការពង្រឹងសន្តិសុខនេះ ដោយសារកាលពីពេលកន្លងទៅ មានភាពចលាចលមួយបានកើតឡើង ដោយមានអត្តពលិកជាជនជាតិចិនមួយចំនួនបាននាំគ្នាលើកបង្ហាញទង់ជាតិតៃវ៉ាន់ ដែលអន្តរជាតិពុំទាន់ទទួលស្គាល់ ពិសេសប្រទេសចិនតែម្តងក្នុងអំឡុងពេលពួកគេកំពុងរត់។ តែស្ថានការណ៍នេះ បានធូរស្រាលឡើងវិញ ក្រោយមានការអន្តរាគមន៍ពីកងកម្លាំងសន្តិសុខ ដែលដាក់ពង្រាយនៅទីនោះ។

លោក សែម ផល្លា បន្ថែមថា ក្រៅពីការពង្រាយកងកម្លាំងដើម្បីរក្សាសន្តិសុខ ស្តង់ពេទ្យចំនួន៣រួមជាមួយឡានសង្គ្រោះ៥គ្រឿង និងស្តង់ទឹកជាច្រើន ត្រូវបានដាក់ពង្រាយផងដែរ ដើម្បីត្រៀមជួយសង្គ្រោះ និងផ្តល់ទឹកដល់អ្នកចូលរួមរត់៕