កីឡាជាតិ
ជាតិ
ខាន់ ចេសា៖ មេដាយមាសមិនមែនសម្រាប់តែខ្ញុំឡើយ តែសម្រាប់ពលរដ្ឋខ្មែរ និងគ្រួសាររបស់ខ្ញុំ កីឡាការិនី ខាន់ ចេសា ក្រោយឈ្នះកីឡាការិនីអេមីរ៉ាតអារ៉ាប់រួម Mahra Alhinaai ១០០-០ នៅវគ្គផ្តាច់ព្រ័ត្រ
× វ័យ១៦ឆ្នាំ កីឡាការិនីខ្មែរ-អាមេរិក ខាន់ ចេសា បាននាំមេដាយមាសទីមួយជូនកម្ពុជា ពីព្រឹត្តិការណ៍កីឡាអាស៊ី (Asian Games) នៅឥណ្ឌូណេស៊ី លើប្រភេទកីឡាជឺជិតស៊ូ (Jiu-jitsu) ទម្ងន់ក្រោម៤៩កីឡូក្រាម កាលពីថ្ងៃទី២៤ ខែសីហា។
កីឡាការិនីខ្មែរ-អាមេរិករូបនេះ រំភើបរហូតស្រក់ទឹកភ្នែក ក្រោយឈ្នះមេដាយមាសពីការប្រកួតកីឡាប្រចាំទ្វីបអាស៊ី សម្រាប់កម្ពុជា។ កីឡាការិនីដែលមានឪពុកជាជនជាតិខ្មែរ ហើយម្តាយមានសញ្ជាតិអាមេរិក-ម៉ិកស៊ិកនោះ អះអាងថា ខ្លួនប្រកួតពោរពេញទៅដោយទំនុកចិត្ត ហើយនាងចង់ផ្ញើសារថា ស្ត្រីក៏ខ្លាំងដូចបុរសដែរ។ តាមជោគជ័យដ៏ធំធេងនេះ ចេសា រំពឹងថា នឹងធ្វើគេស្គាល់កីឡាជឺជិតស៊ូ កាន់តែច្រើនថែមទៀត។
តាមរយៈបណ្តាញសង្គម Instagram របស់ខ្លួន ខាន់ ចេសា បានបង្ហាញពីមោទកភាពដែលបានក្លាយជាស្ត្រីដំបូងបំផុតដែលឈ្នះមេដាយមាសពីកីឡាអាស៊ី និងបានតំណាងឲ្យកម្ពុជា។ «ខ្ញុំពិតជាសប្បាយចិត្តណាស់ចំពោះការប្រកួតរបស់ខ្ញុំ។ ខ្ញុំរីករាយដែលបានឈ្នះមេដាយមាស ប៉ុន្តែមិនមែនសម្រាប់ខ្ញុំឡើយ តែសម្រាប់ពលរដ្ឋកម្ពុជា និងគ្រួសាររបស់ខ្ញុំ»។
កីឡាការិនីដែលរស់នៅសហរដ្ឋអាមេរិករូបនេះ បានអះអាងថា ខ្លួនមានបទពិសោធន៍ដ៏អស្ចារ្យទាំងនៅកម្ពុជា និងឥណ្ឌូណេស៊ី ហើយរំពឹងនឹងមានវត្តមានម្តងទៀត៕
Tag:
ជឺជីតស៊ូ
ខាន់ ចេសា
Asian Games
© រក្សាសិទ្ធិដោយ thmeythmey.com