កីឡាជាតិ
ជាតិ
ក្បួនដង្ហែជ័យលាភីមេដាយមាសអាស៊ី នឹងប្រព្រឹត្តទៅនៅល្ងាចថ្ងៃទី៣ ខែកញ្ញា
ជ័យលាភីមេដាយកីឡាអាស៊ី ខាន់ ចេសា និងសាលី អ៊ូមើត
×![]()
ដោយ: រួបរួម
កម្ពុជាមិនទាន់បញ្ចប់បេសកកម្មរបស់ខ្លួននៅ Asian Games លើកទី១៨ នៅឥណ្ឌូណេស៊ីឡើយ ប៉ុន្តែ កម្ពុជារកបានកំណត់ត្រាដ៏អស្ចារ្យរួចទៅហើយក្នុងព្រឹត្តិការណ៍ប្រចាំទ្វីបអាស៊ីមួយនេះ តាមរយៈការឈ្នះមេដាយមាស២ និងសំរឹទ្ធ១ ។
កីឡាការិនីខ្មែរ-អាមេរិក ខាន់ ចេសា បានឈ្នះមេដាយមាសលើវិញ្ញាសា Newaza ទម្ងន់ក្រោម៤៩គីឡូក្រាមនៃប្រភេទកីឡាជឺជិតស៊ី (Jiu-Jitsu) មុនពេលដែលកីឡាករម៉ូតូទឹក (JetSki) សាលី អ៊ូមើត ឈ្នះមេដាយមាសលើវិញ្ញាសា Ski Modified និងមេដាយសំរឹទ្ធលើវិញ្ញាសា Runabout 1100 Stock។
សម្តេចនាយករដ្ឋមន្ត្រី ហ៊ុន សែន ត្រៀមទទួលម្ចាស់ជ័យលាភី និងប្រតិភូកីឡាកម្ពុជា នៅវិមានសន្តិភាពនាល្ងាចថ្ងៃទី៣ ខែកញ្ញា ឆ្នាំ២០១៨ ពោលគឺមួយថ្ងៃក្រោយការបិទបញ្ចប់ព្រឹត្តិការណ៍ Asian Games លើកទី១៨ ។ បើតាមការអះអាងរបស់លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) ក្បួនដង្ហែនឹងចេញពីអាកាសយានដ្ឋានអន្តរជាតិភ្នំពេញ ម៉ោង១៧ និង៣៥នាទី ឆ្ពោះទៅវិមានសន្តិភាព ជាមួយនឹងម៉ូតូកិត្តិយសអមចំនួន៦គ្រឿង។
យោងតាមអនុក្រឹត្យរបស់រដ្ឋាភិបាលចុះកាលពីឆ្នាំ២០១៣ ជ័យលាភីមេដាយមាស ខាន់ ចេសា និង សាលី អ៊ូមើត នឹងទទួលបានប្រាក់រង្វាន់ម្នាក់ៗចំនួន៨០លានរៀល ហើយ អ៊ូមើត ទទួលបាន២៤លានរៀលបន្ថែមទៀតសម្រាប់មេដាយសំរឹទ្ធ។ គ្រូបង្វឹករបស់អត្តពលិកទាំង២ទទួលម្នាក់ៗ៨០លានរៀល រីឯគ្រូជំនួយបាន៧០ភាគរយ។
បន្ថែមពីនេះ ជ័យលាភីក៏ត្រូវទទួលប្រាក់ឧបត្ថម្ភផ្ទាល់ពីសម្តេចនាយករដ្ឋមន្ត្រី ហ៊ុន សែនផងដែរ ។ កន្លងមក សម្តេចប្រកាសឧបត្ថម្ភ១ម៉ឺនដុល្លារអាមេរិកសម្រាប់មេដាយមាស ៥០០០ដុល្លារអាមេរិកសម្រាប់មេដាយប្រាក់ និង៣០០០ដុល្លារអាមេរិកសម្រាប់មេដាយសំរឹទ្ធ៕
Tag:
Asian Games
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
