ភ្នំពេញ៖ ភាគទុនិកថ្មីរបស់គ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី នឹងនាំមកនូវទាំងប្រភពទុន និងជំនាញដែលនឹងជួយធ្វើឲ្យ អេ អឹម ខេ កាន់តែរីកចម្រើនមួយកម្រិតទៀត។ ភាគទុនិកថ្មីរបស់ អេ អឹម ខេ គឺធនាគារពាណិជ្ជ និងសន្សំសៀងហៃ (The Shanghai Commercial & Savings Bank, Ltd.) ហៅកាត់ថា អេស ស៊ី អេស ប៊ី ដែលមានដើមកំណើតនៅទីក្រុងសៀងហៃ ប្រទេសចិន។
បច្ចុប្បន្នធ នាគារ អេស ស៊ី អេស ប៊ី មានការិយាល័យកណ្តាល នៅទីក្រុងតៃប៉ិ និងបុត្រសម្ព័ន្ធនៅទីក្រុងហុងកុង និងសៀងហៃ។ ការសម្រេចចិត្តទទួលយកភាគទុនិកថ្មី ដោយសារតែទី១. ភាគទុនិកចាស់ចំនួនបីរបស់ អេ អឹម ខេ ផុតកំណត់អាណត្តវិនិយោគ។ ទី២. ដោយសារតែបេសកកម្ម និងទស្សនវិស័យរបស់ អេស ស៊ី អេស ប៊ី និង អេ អឹម ខេ មានលក្ខណៈដូចគ្នាស្ទើរតែទាំងស្រុង គឺជួយដល់ប្រជាពលរដ្ឋក្រីក្រភាគច្រើន ក្នុងគោលបំណងធ្វើឲ្យប្រសើរឡើង នូវជីវភាពរស់នៅរបស់ពួកគេ តាមរយៈការផ្តល់សេវាមីក្រូហិរញ្ញវត្ថុសមស្រប និងឋិតថេរ។
នៅពេលបច្ចុប្បន្ននេះ អេ អឹម ខេ មានភាគទុនិកចំនួន៥គឺ Agora Microfinance N.V. (AMNV), Rural Impulse Fund II S.A. SICAV-FIS (RIF II), Société de Promotion et de Participation pour la Coopération Economique S. A. (PROPARCO) មូលនិធិអភិវឌ្ឈន៍កម្ពុជា-ឡាវ (CLDF) និងសមាគមបុគ្គលិក អេ អឹម ខេ (AMK-SA)។ ប៉ុន្តែភាគទុនិកចំនួនបី នឹងត្រូវផុតកំណត់អាណត្តវិនិយោគជាមួយ អេ អឹម ខេ គឺ RIF II PROPARCO និងCLDF ។
ទន្ទឹមនេះដែរ មានភាគទុនិកជាច្រើន ចាប់អារម្មណ៍វិនិយោគជាមួយ អេ អឹម ខេ ប៉ុន្តែ អេ អឹម ខេ បានជ្រើសរើសយក អេស ស៊ី អេស ប៊ី ព្រោះធនាគារនេះ មានបទពិសោធន៍ និងអាយុកាលជាង១០០ឆ្នាំ លើវិស័យហិរញ្ញវត្ថុ និងមានជំនាញប្រកបដោយវិជ្ជាជីវៈ ដែលអាចជួយឲ្យ អេ អឹម ខេ អនុវត្តការងារកាន់តែប្រសើរ។ ជាពិសេសធនាគារ អេស ស៊ី អេស ប៊ី មានបេសកកម្ម និងទស្សនវិស័យដូចគ្នានឹង អេ អឹម ខេ។
លោក គា បូរាណ ប្រធាននាយកប្រតិបត្តិ អេ អឹម ខេ បានលើកឡើងដូច្នេះថា៖ «វាជាឱកាសរបស់ អេ អឹម ខេ ដែលយើងជ្រើសរើសយក អេស ស៊ី អេស ប៊ី ព្រោះយើងនៅតែមានជំនឿយ៉ាងមុតមាំថា ប្រព័ន្ធធនាគារមួយ ដែលមានភាពរឹងមាំ គឺត្រូវការម្ចាស់ភាគហ៊ុន ដែលមានប្រភពទុនធំ ហើយ អេស ស៊ី អេស ប៊ី គឺជាធនាគារមួយ ដែលមានភាពស័ក្តសម អាចនាំ អេ អឹម ខេ អភិវឌ្ឍទៅជំហានបន្ទាប់ទៀត»។ លោកបានបន្តទៀតថា នៅពេលដែលយើងមានប្រភពទុនធំ មានអ្នកជំនាញចាំជួយ នោះ អេ អឹម ខេ នឹងមានឱកាសកាន់តែច្រើន ក្នុងការពង្រីកអាជីវកម្មរបស់ខ្លួន ពោលគឺការធ្វើឲ្យផលិតផល និងសេវាកម្មរបស់កាន់តែមានភាពសម្បូរបែបជូនដល់អតិថិជនទូទៅ ជាពិសេសប្រជាជននៅតំបន់ជនបទមានឱកាសគ្រប់ៗគ្នាក្នុងការប្រើប្រាស់ផលិតផល និងសេវាហិរញ្ញវត្ថុ អេ អឹម ខេ ដើម្បីធ្វើឲ្យជីវភាពរបស់ពួកគាត់មានភាពប្រសើរឡើង។ លោក គា បូរាណ បន្ថែមទៀតថា៖«យើងសូមកោតសរសើរ ដល់ធនាគារ អេស ស៊ី អេស ប៊ី ដែលបានគាំទ្របេសកកម្មស្នូលរបស់ អេ អឹម ខេ និងជួយគាំទ្រដល់ក្រុមថ្នាក់ដឹកនាំដែលមានស្រាប់ នឹងជួយដល់កិច្ចការងាររបស់យើង ក្នុងការជួយដល់ចំណែកទីផ្សារ ដែលរកចំណូលមានកម្រិតនៅកម្ពុជា»។
លោក John Yung សមាជិកក្រុមប្រឹក្សាភិបាល EVP & CIO នៃធនាគារ អេស ស៊ី អេស ប៊ី បានមានប្រសាសន៍ថា អេ អឹម ខេ គឺតំណាងឲ្យធនាគារ អេស ស៊ី អេស ប៊ី ដែលមានការិយាល័យនៅក្រៅប្រទេស។ លោក John Yung បញ្ជាក់ថា៖ «យើងមានសេចក្តីរីករាយ ដែលបានចាប់ដៃគូជាមួយ អេ អឹម ខេ ក្នុងការអភិវឌ្ឍនៅកម្ពុជាទៅថ្ងៃអនាគត។ យើងពិតជាចាប់អារម្មណ៍ចំពោះបេសកកម្មសង្គម របស់ អេ អឹម ខេ និងប្តេជ្ញាចិត្តនៅតែបន្ត និងពង្រឹងវាឲ្យកាន់តែរឹងមាំថែមទៀត។
ជាមួយនឹងក្តីប្រាថ្នាដើម្បីជួយដល់សង្គម គាំទ្រលើវិស័យឧស្សាហកម្ម និងលើកកម្ពស់ពាណិជ្ជកម្មអន្តរជាតិ ដែលជាការងារស្នូលរបស់ អេស ស៊ី អេស ប៊ី ដើម្បីបម្រើដល់អតិថិជនដែលពុំមានលទ្ធភាពប្រើប្រាស់សេវាធនាគារ ហើយជាមូលហេតុដែលធ្វើឱ្យធនាគារ អេស ស៊ី អេស ប៊ី រីកចម្រើនដល់សព្វថ្ងៃនេះ។ នេះបើតាមលោក John Yung ដដែល ដោយបន្តបញ្ជាក់ដូច្នេះ៖ «ធនាគារ អេស ស៊ី អេស ប៊ី បានមើលឃើញពីភាពដូចគ្នារវាង អេស ស៊ី អេស ប៊ី ពេលយើងចាប់ផ្តើមជាធនាគារដំបូង និង អេ អឹម ខេ នាពេលបច្ចុប្បន្ន។ ធនាគារ អេស ស៊ី អេស ប៊ី មានការជឿជាក់ លើទស្សនវិស័យ បេសកកម្ម គុណតម្លៃ និងយុទ្ធសាស្ត្ររបស់ អេ អឹម ខេ ដែលជាមូលដ្ឋានគ្រឹះបន្ថែម សម្រាប់ អេស ស៊ី អេស ប៊ី ក្នុងការជំរុញឱ្យគ្រឹះស្ថានមីក្រូហិរញ្ញវត្ថុ អេ អឹម ខេ កាន់តែរីកចម្រើន។ យើងមានសេចក្តីរំភើបរីករាយចំពោះភាពជាដៃគូនេះ ហើយយើងសង្ឃឹមថានឹងបង្កើតទំនាក់ទំនងប្រកបដោយភាពជោគជ័យរយៈពេលវែង ជាមួយ គ្រឹះស្ថានមីក្រូហិរញ្ញវត្ថុ អេ អឹម ខេ លើគ្រឹះនៃគុណតម្លៃស្នូលរបស់ខ្លួន»។
លោក Tanmay Chetan ប្រធានក្រុមប្រឹក្សាភិបាល និងជាប្រធានអគ្គនាយក នៃគ្រឹះស្ថានមីក្រូហិរញ្ញវត្ថុអាហ្គូរ៉ាបាន មានប្រសាសន៍ថា បុគ្គលិក ថ្នាក់គ្រប់គ្រង ក្រុមប្រឹក្សាភិបាល និងម្ចាស់ភាគហ៊ុន អេ អឹម ខេ ទាំងអស់ មានសេចក្តីសោមនស្សរីករាយ ស្វាគមន៍ធនាគារ អេស ស៊ី អេស ប៊ី ជាដៃគូភាគទុនិកថ្មី។ លោកបន្តទៀតថា ម្ចាស់ភាគហ៊ុនសព្វថ្ងៃនេះមានជំនឿចិត្តយ៉ាងមុតមាំថា នៅថ្ងៃអនាគត អេ អឹម ខេ នឹងទទួលបានជោគជ័យ ដោយសារតែជំនាញ និងបទពិសោធន៍ផ្នែក ធនាគាររបស់ អេស ស៊ី អេស ប៊ី។ ជាពិសេសធនាគារ អេស ស៊ី អេស ប៊ី បានចាប់អារម្មណ៍ក្នុងការអភិវឌ្ឍសង្គមកម្ពុជា ដែលជាបេសកកម្ម អេ អឹម ខេ។ ម្យ៉ាងទៀតនោះម្ចាស់ភាគហ៊ុនថ្មី នឹងនាំយកដើមទុនវិនិយោគក្នុងរយៈពេលវែងដែលនាំភាពរីកចម្រើនដល់ អេ អឹម ខេ ទៅកម្រិតបន្ទាប់ទៀត។ នេះបបើតាមការរំពឹងទុករបស់លោក Tanmay Chetan ដែលបន្ថែមទៀតថា៖« យើងពិតជាមានអារម្មណ៍រំភើបយ៉ាងខ្លាំង ដែលបានចាប់ដៃគូជាមួយម្ចាស់ភាគហ៊ុនថ្មី ពីអ្វីដែលនាំមកដល់ អេ អឹម ខេ នឹងការចូលរួមអភិវឌ្ឍសេដ្ឋកិច្ចនៅកម្ពុជា»។
អំពី អេ អឹម ខេ
អេ អឹម ខេ គឺជាគ្រឹះស្ថានមីក្រូហិរញ្ញវត្ថុ ដែលឈានមុខគេ លើវិសាលភាពប្រតិបត្តិការ និងចំនួនអតិថិជនប្រាក់កម្ចី។ គិតត្រឹមខែឧសភា ឆ្នាំ២០១៨នេះ អេ អឹម ខេ មានបុគ្គលិកសរុបជាង ២.៦០០នាក់ អតិថិជនចំនួនជាង ៧៨ម៉ឺននាក់ ជាមួយនឹងផលប័ត្រប្រាក់កម្ចីជាង ២៣០លានដុល្លារអាមេ រិក និងប្រាក់បញ្ញើជាង ១២៦លានដុល្លារអាមេរិក មានការិយាល័យប្រតិបត្តិការចំនួន ១៥០ កន្លែង និងមានភ្នាក់ងារជាង ៣.៥០០កន្លែងនៅទូទាំងប្រទេស។ អេ អឹម ខេ មានផលិតផល និងសេវាកម្មជាច្រើន កំពុងផ្តល់ជូនអតិថិជនដូចជា សេវាប្រាក់កម្ចី ប្រាក់សន្សំ ផ្ទេរប្រាក់ សេវាទូទាត់វិក្កយបត្រ ធានារ៉ាប់រងខ្នាតតូច ធនាគារចល័ត សេវាបើកប្រាក់បៀវត្សរ៍ ម៉ាស៊ីនដក និងដាក់ប្រាក់ដោយស្វ័យប្រវត្តិ (ATMs/CDMs)។
អំពី អេស ស៊ី ប៊ី ស៊ី
ធនាគារពាណិជ្ជកម្ម និងសន្សំសៀងហៃ ត្រូវបានបង្កើតឡើងនៅទីក្រុងសៀងហៃ ឆ្នាំ១៩១៥ ក្នុងគោលបំណងលើកកម្ពស់សង្គម គាំទ្រផ្នែកឧស្សាហកម្ម និងពាណិជ្ជកម្មអន្តរជាតិ។ ធនាគារ អេស ស៊ី អេស ប៊ី ត្រូវបានទទួលស្គាល់យ៉ាងទូលំទូលាយ ពីសំណាក់សហគ្រាសធុនតូច និងមធ្យម ទូទាំងពិភពលោក អំពីសេវាហិរញ្ញប្បទានពាណិជ្ជកម្ម និងសេវាផ្ទេរប្រាក់ក្រៅប្រទេសប្រកបដោយប្រសិទ្ធភាព។ ជាមួយបុត្រសម្ព័ន្ធនៃធនាគារពាណិជ្ជសៀងហៃ អិលធីឌី ធនាគារ អេស ស៊ី អេស ប៊ី គ្រប់គ្រងទ្រព្យសកម្មសរុបចំនួន ជាង ៥៨ពាន់លានដុល្លារ និងដើមទុនជាង ១,៣ ពាន់លានដុល្លារអាមេរិក និងមូលធនរបស់ម្ចាស់ភាគហ៊ុនសរុបជាង ៥,៥ពាន់លានដុល្លារអាមេរិក។
ធនាគារ អេស ស៊ី អេស ប៊ី មានបុគ្គលិកជាង ៤.០០០នាក់ និងមានការិយាល័យប្រតិបត្តិការចំនួន ៤៤៧ទូទាំងពិភពលោក។ អេស ស៊ី អេស ប៊ី មាន ៦៩សាខានៅតៃវ៉ាន់ ដែលមានបុគ្គលិកជាង ២.៤០០នាក់ និងមាន ៣សាខាផ្សេងទៀតនៅហុងកុង វៀតណាម និងសិង្ហបុរី និងមានការិយាល័យតំណាងចំនួន ៣ នៅប្រទេសថៃ កម្ពុជា និងឥណ្ឌូនេស៊ី។ យើងមានការិយាល័យប្រតិបត្តិការចំនួន ៤៥សាខានៅហុងកុង និង៧សាខាទៀត នៅក្រៅប្រទេសដូចជា៖ Shanghai, Shenzhen, Shanghai Pilot Free Trade Zone, London, New York, San Francisco, and Los Angeles៕
(អត្ថបទពាណិជ្ជកម្ម)