ទុនវិនិយោគក្នុងវិស័យសំណង់មានចំនួន ៣ពាន់លានដុល្លារ ក្នុងរយៈពេល៨ខែ

ជាតិ

សេដ្ឋកិច្ច

ទុនវិនិយោគក្នុងវិស័យសំណង់មានចំនួន ៣ពាន់លានដុល្លារ ក្នុងរយៈពេល៨ខែ

02, Sep 2018 , 9:57 am

រូបភាព

ដោយ:

ភ្នំពេញ៖ ទុនវិនិយោគក្នុងវិស័យសំណង់ក្នុងរយៈពេល៨ខែដើមឆ្នាំនេះ ត្រូវបានប៉ាន់ស្មានថាមានទឹកប្រាក់ ២៩៩៦ លានដុល្លារ។ នេះបើតាមការថ្លែងរបស់លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក្នុងពិធីបើកការដ្ឋានសាងសង់ផ្សារទំនើបរបស់ក្រុមហ៊ុនជីបម៉ុង នៅថ្ងៃទី៣០ខែសីហា។

ក្រសួងរៀបចំដែនដី បានចេញលិខិតសាងសង់ចំនួន ១៩៧៣ គម្រោងក្នុងរយៈពេល៨ខែនេះ។ រដ្ឋមន្ត្រីក្រសួងរៀបចំដែនដីលោក ជា សុផារ៉ា បញ្ជាក់ថា ការរីកចម្រើនក្នុងវិស័យសំណង់នៅកម្ពុជា បណ្ដាលមកពីសុខសន្តិភាព និងគោលនយោបាយរបស់រដ្ឋាភិបាល។ លោកថ្លែងដូច្នេះថា៖«ដោយសារគោលនយោបាយរបស់រដ្ឋាភិបាល ដែលបានផ្ដល់ និងបង្កលក្ខណៈលើកទឹកចិត្តគ្រប់បែបយ៉ាង ដើម្បីឲ្យមានការអភិវឌ្ឍលើគ្រប់វិស័យ។ យើងបានបង្កលក្ខណៈរាប់តាំងពីហេដ្ឋារចនាសម្ព័ន្ធ ថាមពល សន្តិសុខសណ្ដាប់ធ្នាប់»។

គួរបញ្ជាក់ថា ក្នុងឆមាសទី១ឆ្នាំនេះ ការបោះទុនក្នុងវិស័យសំណង់ ត្រូវបានប៉ាន់ស្មានថាមានចំនួន ២,១៥ពាន់លានដុល្លារ ដែលតិចជាងខ្លាំង បើធៀបនឹង ៤,៩ពាន់លាននៅក្នុងរយៈដូចគ្នាកាលពីឆ្នាំ២០១៧ ។

ការវិនិយោគក្នុងវិស័យសំណង់នៅក្នុងឆ្នាំ២០១៧ មានចំនួនជាង ៦៤០០ លានដុល្លារអាមេរិក កើនឡើង ២២,៣ភាគរយ៕