ភ្នំពេញ៖ និស្សិត និងអតីតនិស្សិតនៃសាកលវិទ្យាល័យ Zaman បានទទួលជោគជ័យយ៉ាងត្រចះត្រចង់ នៅក្នុងកម្មវិធីប្រកួតប្រជែងសំណេរអនាគតកម្ពុជា លើកទី៤ ដែលរៀបចំដោយក្រុមហ៊ុន Supreme Paper ។ «ផលិតផលរបស់ប្រទេសកម្ពុជា» គឺជាប្រធានបទសម្រាប់ការប្រកួតនៅឆ្នាំនេះ ដោយតម្រូវឲ្យបេក្ខជន សរសេរអត្ថបទពីផលិតផលមួយ ដែលតំណាងឱ្យអត្តសញ្ញាណប្រទេសកម្ពុជា។ បេក្ខជនដែលមានអត្ថបទល្អបំផុតចំនួន៥រូប ត្រូវបានជ្រើសរើសសម្រាប់ជ័យលាភី តាមរយៈការធ្វើបទបង្ហាញ ដែលបានប្រព្រឹត្តទៅកាលពីថ្ងៃទី២៣ ខែសីហា កន្លងទៅ។ ជាលទ្ធផល និស្សិតពីសាកលវិទ្យាល័យ Zaman ដណ្តើមបានចំណាត់ថ្នាក់លេខ១ លេខ២ និងលេខ៣ ពីការប្រជែងនេះ។
លោក ភួង សុដានីត ជ័យលាភីលេខ១ ពីកម្មវិធីនេះ និងជានិស្សិតបានបញ្ចប់ការសិក្សាពីសាកលវិទ្យាល័យហ្សាម៉ាន់ជំនាញសំណង់ស៊ីវិល បានឲ្យដឹងថារូបគេបានបានជ្រើសរើសយក «ស្រាស» ធ្វើជាផលិតផលតំណាងឱ្យប្រទេសកម្ពុជា»។ បើតាមលោក សុដានីត រូបគេមិនត្រឹមតែសរសេរអំពីផលិតផលមួយដែលតំណាងប្រទេសកម្ពុជាប៉ុណ្ណោះទេ លោកក៏ត្រូវរចនានិមិត្តសញ្ញាផលិតផលរបស់ខ្លួន ដើម្បីដាក់ពាក្យចូលរួមប្រកួតកម្មវិធីសំណេរនេះដែរ។ លោក ភួង សុដានីតបន្តថា៖«ខ្ញុំជាប់ចំណាត់ថ្នាក់លេខ១ ក្នុងកម្មវិធីនេះ ប្រហែលដោយសារខ្ញុំមានជំនាញផ្នែកសរសេរផង និងផ្នែកនិយាយជាសាធារណៈផង ព្រោះពីមុន ខ្ញុំក៏ធ្លាប់ចូលរួមប្រកួតនិយាយជាសាធារណៈ និងឈ្នះជាជ័យលាភីដែរ»។
រូបភាព(Supreme Writing)៖ ស្រាសខ្មែរ ដែលជាគំនិតរបស់បេក្ខជន ភួង សុដានីត
ចំណែក ជ័យលាភីលេខ២ បានទៅ កញ្ញា ឌុំ រីដា ដែលជានិស្សិតឆ្នាំទី៣ ជំនាញទំនាក់ទំនងអន្តរជាតិ និងវិទ្យាសាស្ត្រនយោបាយ នៅសាកលវិទ្យាល័យហ្សាម៉ាន់។ កញ្ញា រីដា បានជ្រើសរើសយក «កក់ខ្មែរ» ដែលអាចច្នៃជាផលិតផលផ្សេងៗ រួមមានកន្ទេលជាដើមនោះ ធ្វើជាផលិតផលតំណាងប្រទេសកម្ពុជា។ ជ័លាភីលេខ២ដដែល ឲ្យដឹងទៀតថា អត្ថបទរបស់ខ្លួន ត្រូវបានជ្រើសរើស ដោយសារតែផលិតផលកក់ខ្មែរនេះ មានលក្ខណៈសាមញ្ញ និងខុសប្លែកពីគេ។ ម្យ៉ាងវិញទៀត អត្ថបទដែលនាងសរសេរ ក៏មានចំណុចទាក់ទាញល្អៗ តួយ៉ាងការសរសេរមានភាពប្រទាក់ក្រឡាគ្នា ពីគំនិតមួយទៅគំនិតមួយទៀត ហើយការប្រើប្រាស់វេយ្យាករណ៍ក៏មានលក្ខណៈត្រឹមត្រូវ។ នេះជាការបញ្ជាក់របស់ កញ្ញា ឌុំ រីដា។
រូបភាព(Supreme Writing)៖ កក់ខ្មែរ ដែលជាគំនិតរបស់ កញ្ញាឌុំ រីដា
លោក កែវ ដារាមង្គល ជាជ័យលាភីលេខ៣ នៅក្នុងកម្មវិធី ហើយលោក ក៏ជាអតីតនិស្សិតនៃសាកលវិទ្យាល័យហ្សាម៉ាន់ដែរ។ លោក កែវ ដារាមង្គល បានជ្រើសរើសយក «ការ៉េមត្នោត» ធ្វើជាផលិតផលតំណាងជាតិ ដោយលោកគិតថា ផលិតផលការ៉េមនេះថ្មី មិនធ្លាប់មានទាល់តែសោះ ទាំងនៅក្នុងប្រទេស ក៏ដូចជាបណ្ដាប្រទេសនានា។ ការ៉េមត្នោតនេះ ទៀតសោត គ្មានជាតិស្ករ និងអាចជាទីពេញនិយម សម្រាប់អ្នកដែលចូលចិត្តញ៉ាំការ៉េម។
រូបភាព៖ ជ័យលាភីទាំង៣រូប ក្នុងការប្រកួតសំណេរអនាគតកម្ពុជា
គួរបញ្ជាក់ថា ប្រាក់រង្វាន់ក្នុងកម្មវិធីសំណេរអនាគតកម្ពុជានេះ សរុបដល់១១លានរៀល ដោយជ័យលាភីលេខ១ ទទួលបានប្រាក់រង្វាន់ចំនួន៤លានរៀល លេខ២ ទទួលបាន៣លានរៀល និងលេខ៣ ទទួលបានប្រាក់រង្វាន់២លានរៀល៕
រូបភាព៖ សាកលវិទ្យាធិការហ្សាម៉ាន់ ទទួលពានដែលមានបេក្ខជនបេក្ខនារីចូលរួមច្រើនជាងគេ
(អត្ថបទពាណិជ្ជកម្ម)