ភ្នំពេញ៖ គេហទំព័រ Realesate.com.kh ដែលមានអ្នកចូលទស្សនាច្រើនជាងគេបំផុតនៅកម្ពុជា នៅថ្ងៃទី៤ ខែកញ្ញា បានរៀបចំសន្និសីទសារព័ត៌មានស្តីពី ការរៀបចំពិព័រណ៍អចលនទ្រព្យឆ្នាំ២០១៨របស់ខ្លួន។ ពិព័រណ៍អចលនទ្រព្យឆ្នាំ២០១៨ នឹងប្រព្រឹត្តទៅ នៅថ្ងៃទៅ ១៩ និងទី២០ ខែតុលាខាងមុខ នាសណ្ឋាគារណាហ្គាវើល។ នេះជាពិព័រណ៍អចលនទ្រព្យលើកទី២ ដែលត្រូវបានរៀបចំឡើងដោយក្រុមហ៊ុន Realesate.com.kh បន្ទាប់ពីពិព័រណ៍អចលនទ្រព្យលើកទី១ ដែលបានរៀបចំកាលពីឆ្នាំ២០១៧ ទទួលបានជោគជ័យគួរជាទីមោទក។
លោក Tom O’Sullivan នាយកប្រតិបត្តិរបស់ក្រុមហ៊ុន RealEsate.com.kh បានគូសបញ្ជាក់ថា គោលបំណងរបស់ពិព័រណ៍អចលនទ្រព្យនៅថ្ងៃទី១៩ និង ២០ ខែតុលា ខាងមុខនេះ គឺដើម្បីលើកកម្ពស់វិស័យអចលនទ្រព្យនៅកម្ពុជា ទាំងសម្រាប់ទីផ្សារក្នុងស្រុក និងលើឆាកអន្តរជាតិ។ ពិព័រណ៍នេះ ក៏នឹងក្លាយជាវេទិកាអចលនទ្រព្យដ៏ងាយស្រួល សម្រាប់អតិថិជនក្នុងស្រុក និងក្រៅស្រុក និងវិនិយោគិនអចលទ្រព្យ អាចទស្សនា និងស្វែងយល់ពីគម្រោងអភិវឌ្ឍន៍ធំៗនៅក្នុងតំបន់តាមរយៈព្រឹត្តិការណ៍ធំមួយនេះ។ លោក Tom O’Sullivan បន្ថែមដូច្នេះ៖«យើងកំពុងប្រមូលផ្ដុំនូវគម្រោងអភិវឌ្ឍន៍ថ្មីៗល្អៗ ព្រមទាំងក្រុមហ៊ុនផ្សេងៗដែលមានឥទ្ធិពល និងដើរតួសំខាន់នៅក្នុងទីផ្សារកម្ពុជា»។
គួររំលឹកផងថា ពិព័រណ៍ចុងក្រោយបំផុតនៅក្នុងខែតុលាឆ្នាំ២០១៧ មានអ្នកចូលរួមជាង ៤,០០០នាក់ ហើយក្នុងរយៈពេល២ថ្ងៃ អចលនទ្រព្យបានលក់នៅនឹងកន្លែង ស្មើទឹកប្រាក់ជាង ២០លានដុល្លារ។ ភាពជោគជ័យបានជំរុញឲ្យមានតម្រូវការដ៏ច្រើន ពីសំណាក់ភ្នាក់ងារ អភិវឌ្ឍន៍ និងអ្នកស្វែងរកអចលនទ្រព្យ ពោលគឺធ្វើយ៉ាងណា ឲ្យពិព័រណ៍អចលទ្រព្យវិលត្រឡប់មកវិញ នៅក្នុងឆ្នាំ២០១៨នេះ។
បើតាមនាយកប្រតិបត្តិរបស់ក្រុមហ៊ុន RealEsate.com.kh មានមនុស្សជាង៤០០០នាក់ហើយ បានចុះឈ្មោះរួចរាល់ ដើម្បីចូលរួមពិព័រណ៍ឆ្នាំនេះ។ លោក O’Sullivan រំពឹងថា ពិព័រណ៍អចលនទ្រព្យលើកទី២នេះ នឹងអាចទាក់ទាញអ្នកចង់ទិញផ្ទះ និងអ្នកវិនិយោគអចនទ្រព្យយ៉ាងហោចណាស់៦,០០០នាក់។
ជាមួយនឹងគម្រោងអភិវឌ្ឍន៍អចលនទ្រព្យជាង ៣០គម្រោង ក្នុងរយៈពេល២ថ្ងៃ ពិព័រណ៍អចលទ្រព្យកម្ពុជាឆ្នាំ២០១៨ នឹងបង្ហាញនូវឱកាសវិនិយោគអចលនទ្រព្យដែលល្អបំផុត នៅទូទាំងប្រទេស។ អ្នកចូលរួមទស្សនា និងអ្នកទិញអចលនទ្រព្យទាំងក្នុងស្រុក និងក្រៅស្រុក រួមទាំងវិនិយោគិនជាតិ និងអន្តរជាតិ នឹងមានវត្តមាននៅក្នុងពិសេសនេះ។
លើសពីនេះ អំឡុងពេលនៃការតាំងពិព័រណ៍ អ្នកចូលរួមនឹងមានឱកាសចូលរួមសិក្ខាសាលាជាច្រើនទាក់ទងនឹងទីផ្សារអចលនទ្រព្យ កាតព្វកិច្ចផ្លូវច្បាប់នៃកម្មសិទ្ធិលើអចលនទ្រព្យ និងការសម្រេចចិត្តបានត្រឹមត្រូវនៅពេលទិញអចលនទ្រព្យនៅកម្ពុជាជាដើម។ សិក្ខាសាលានេះនឹងធ្វើឡើងជា៣ភាសា គឺភាសាខ្មែរ អង់គ្លេស និងភាសាចិន ជាមួយនឹងការបកប្រែសម្រាប់ភ្ញៀវផងដែរ។
អ្នកទស្សនាអាចចូលរួមបានដោយឥតគិតថ្លៃផងដែរ ក្នុងអំឡុងពេលពិព័រណ៍រយៈពេល២ថ្ងៃនេះ ដើម្បីស្វែងយល់ពីប្រធានបទជាច្រើនដូចជា ការណែនាំអំពីការវិនិយោគអចលនទ្រព្យ ច្បាប់កម្មសិទ្ធិ ច្បាប់ពន្ធដារ ការអភិវឌ្ឍហេដ្ឋារចនាសម្ព័ន្ធ ជាពិសេសគោលនយោបាយផ្លូវមួយខ្សែក្រវ៉ាត់មួយ ការប្រៀបធៀបទីផ្សារ និងទស្សនវិស័យ ចំពោះកំណើនសេដ្ឋកិច្ចរបស់ប្រទេស។ ការពិភាក្សា និងសំណួរចម្លើយ ជាមួយអ្នកចូលរួមក៏នឹងជាផ្នែកសំខាន់មួយនៃកាលវិភាគរបស់សិក្ខាសាលានេះផងដែរ៕
(អត្ថបទពាណិជ្ជកម្ម)