អន្តរជាតិ
រដ្ឋាភិបាលម៉ាឡេស៊ីថ្មី ប្រកាសដំឡើងប្រាក់ខែអប្បរមាតាមការសន្យាពេលបោះឆ្នោត រូបភាព-AFP
× រដ្ឋាភិបាលម៉ាឡេស៊ីថ្មី ដែលដឹកនាំដោយលោកនាយករដ្ឋមន្ត្រី មហាធៀ មហាម៉ាត់ នឹងដំឡើងប្រាក់បៀវត្សរ៍អប្បបរមាសម្រាប់វិស័យឯកជននៅទូទាំងប្រទេស។ ការដំឡើងនេះ នឹងចូលជាធរមាននៅថ្ងៃទី០១ មករា ឆ្នាំ២០១៩ខាងមុខ។ ការប្រកាសនេះដែរ គឺដើម្បីបំពេញតាមការសន្យាទៅកាន់ប្រជាជនអំឡុងពេលបោះឆ្នោត ឲ្យបានមុនថ្ងៃខួបនៃការបង្កើតរដ្ឋសហព័ន្ធម៉ាឡេស៊ី នាថ្ងៃទី១៦ កញ្ញាខាងមុខ។
ការិយាល័យនាយករដ្ឋមន្ត្រីម៉ាឡេស៊ី នៅថ្ងៃទី ០៥ កញ្ញា ឆ្នាំ២០១៨ បានប្រកាសថា ប្រាក់បៀរវត្សន៍ថ្មី គឺមានចំនួន ២៥៧ដុល្លារ ក្នុងមួយខែ (ប្រហែល១,២២ដុល្លារ ក្នុងមួយម៉ោង)។ ប្រាក់ខែថ្មីនេះ គឺកើនឡើងពី ២៤១ដុល្លារ សម្រាប់តំបន់ឧបទ្វីបម៉ាឡេស៊ី និង២២១,៨១ដុល្លារសម្រាប់តំបន់ភាគខាងកើត។ នេះបើតាមការផ្សាយរបស់ទូរទស្សន៍សិង្ហបុរី Channel NewsAsia ។
សម្ព័ន្ធភាពកាន់អំណាច Pakatan Harapan ដែលបានចូលដឹកនាំរដ្ឋាភិបាលជាលើកដំបូង នៅពីខែឧសភាកន្លងទៅ បានសន្យាធ្វើយ៉ាងណាឲ្យប្រាក់បៀវត្សរ៍នៅទូទាំងប្រទេសមានភាពស្មើគ្នា ក្នុងរយៈពេលត្រឹម ១០០ថ្ងៃប៉ុណ្ណោះ គិតចាប់ពីថ្ងៃខ្លួនដឹកនាំរដ្ឋាភិបាល។ លើសពីនេះ ក្បាលម៉ាស៊ីនដឹកនាំថ្មីនេះ ក៏បានសន្យាដំឡើងប្រាក់ខែអប្បបរមាឲ្យបាន ៣៦១ដុល្លារ ផងដែរ ក្នុងអាណត្តិ៥ឆ្នាំរបស់ខ្លួន។
ទាក់ទិននឹងការដំឡើងប្រាក់ខែនេះ ការិយាល័យនាយករដ្ឋមន្ត្រីម៉ាឡេស៊ី បញ្ជាក់ដូច្នេះថា៖ «ការដំឡើងប្រាក់បៀវត្សរ៍នេះ ជារឿងចាំបាច់បំផុតសម្រាប់ស្ថានភាពសេដ្ឋកិច្ចប្រទេសបច្ចុប្បន្ន។ ហើយយើងក៏ត្រូវគិតគូរម៉ត់ចត់ផងដែរថា កំណើនប្រាក់បៀវត្សរ៍ដ៏ច្រើនលើសលប់ អាចបង្កជាបញ្ហាដល់រោងចក្រ សហគ្រាសនានា និងប៉ះពាល់ដល់ការប្រកួតប្រជែងរបស់ប្រទេសផងដែរ»។
ក្នុងសេចក្ដីថ្លែងការណ៍ដដែល ការិយាល័យលោកនាយករដ្ឋមន្ត្រី មហាធៀ មហាម៉ាត់ បន្តថា ទោះជាយ៉ាងនេះក្ដី ការដំឡើងប្រាក់បៀវត្សរ៍ គឺជារឿងត្រឹមត្រូវណាស់ ក្នុងកាលៈទេសៈនេះ។ ដូច្នេះបណ្ដារោងចក្រ សហគ្រាស ជាពិសេស ម្ចាស់សហគ្រាសធនតូន នឹងមិនត្រូវបិទទ្វារ ដោយសារការចំណាយប្រតិបត្តិការខ្ពស់។ ប្រសិនបើបណ្ដាសហគ្រាសធនតូច បិទទ្វារ ចំនួនភាពអត់ការងារធ្វើ នឹងត្រូវកើនឡើង។
ជាមួយគ្នានេះដែរ រដ្ឋាភិបាល បានអំពាវនាវដល់បណ្ដាសហគ្រាស កុំដំឡើងថ្លៃទំនិញ និងបានបញ្ជាឲ្យក្រសួងពាក់ព័ន្ធទាំងអស់ តាមឃ្លាំមើលឲ្យបានល្អិតល្អន់ចំពោះបញ្ហានេះផងដែរ។
អ្វីគួរឲ្យកត់សម្គាល់នោះ ការិយាល័យនាយករដ្ឋមន្ត្រី ក៏អះអាងដែរថា នឹងគ្មានការផ្គត់ផ្គង់ណាមួយពីរដ្ឋាភិបាល ត្រូវបានផ្ដល់ឲ្យបណ្ដារោងចក្រ សហគ្រាស ដើម្បីគ្រប់គ្រងស្ថានការនេះឡើយ ក៏ព្រោះតែស្ថានភាពចំណូលនិងចំណាយរបស់ជាតិបច្ចុប្បន្ន៕
Tag:
ម៉ាឡេស៊ី
មហាធៀ មហាម៉ាត់
© រក្សាសិទ្ធិដោយ thmeythmey.com