ជាតិ
សង្គមជាតិ
លោក នេត សាវឿន បញ្ជាមេបញ្ជាប៉ូលិសទាំង២៥រាជធានី-ខេត្ត ឲ្យបង្ក្រាបគ្រឿងញៀននៅគ្រប់ទីតាំង
× ភ្នំពេញ៖ នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានដាក់វិធានការក្តៅឲ្យស្នងការនគរបាលគ្រប់រាជធានី-ខេត្តទាំងអស់ អនុវត្ត ដោយត្រូវចុះទៅឆែកឆេរ និងបង្ក្រាបគ្រឿងញៀនក្នុងដែនដីរបស់ខ្លួន ជាពិសេស តាមផ្ទះសំណាក់ សណ្ឋាគារ និងក្លឹបកម្សាន្ត។ នេះបើតាមការចុះផ្សាយក្នុងគេហទំព័រអគ្គស្នងការនគរបាលជាតិ។
បើតាមនគរបាលជាតិ នាយកឧត្តមសេនីយ៍ នេត សាវឿន បានដាក់បញ្ជានេះ នៅចំពោះមុខស្នងការនគរទាំង២៥រាជធានី-ខេត្ត ក្នុងកិច្ចប្រជុំអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៣ នាព្រឹកថ្ងៃទី២៨ ខែកញ្ញា ឆ្នាំ២០១៨។
នគរបាលជាតិ បានចុះផ្សាយទៀតថា ក្រោយកិច្ចប្រជុំ នាយឧត្តមសេនីយ៍ មាស វិរិទ្ធ អគ្គលេខាអាជ្ញាធរជាតិប្រយុទ្ធប្រឆាំងគ្រឿងញៀន បានប្រាប់អ្នកកាសែតយ៉ាងដូច្នេះ៖«នាយឧត្តមសេនីយ៍ នេត សាវឿន បានប្រាប់ឲ្យគ្រប់ស្នងការនគរបាលរាជធានី-ខេត្ត និងស្ថាប័នពាក់ព័ន្ធទាំងអស់ ត្រូវចាត់វិធានការឲ្យបានម៉ឺងម៉ាត់បំផុត ចំពោះបញ្ហាគ្រឿងញៀននៅតាមផ្ទះសំណាក់ សណ្ឋាគារ និងក្លឹបកម្សាន្តនានាដោយមិនលើកលែងនោះឡើយ»។
«នាយឧត្តមសេនីយ៍ នេត សាវឿន ក៏បានប្រាប់គ្រប់ស្នងការនគរបាលទាំងអស់ ឲ្យអនុវត្តឲ្យបានដាច់ខាត់នូវប្រតិបត្តិការនេះ ដោយទទួលខុសត្រូវ តាមសមត្ថកិច្ចរបស់ខ្លួន ដើម្បីធ្វើយ៉ាងណាឲ្យគោលនយោបាយការបង្ក្រាបគ្រឿងនេះទទួលបានលទ្ធផលល្អប្រសើរ ខណៈបញ្ហានេះនៅតែមានការព្រួយបារម្ភនៅឡើយ»។ នេះជាសម្តីរបស់នាយឧត្តមសេនីយ៍ មាស វិទ្ធិ ដដែល ដែលត្រូវបាននគរបាលជាតិ ដកស្រង់យកទៅចុះផ្សាយ។
គួរម្លឹកថា រយៈពេល៩ខែ ឆ្នាំ២០១៨នេះ សមត្ថកិច្ច បានបង្ក្រាបបទល្មើសគ្រឿងញៀមជាង៥៦០០ ករណី ឃាត់ជនសង្ស័យជាង១ម៉ឺននាក់ (ស្រីជិត១ពាន់នាក់)៕
Tag:
គ្រឿងញៀន
នេត សាវឿន
© រក្សាសិទ្ធិដោយ thmeythmey.com