ជាតិ
សំរាមនៅភ្នំពេញ មានជិត៣០០០តោន នៅសៀមរាបជាង៣០០តោន និងព្រះសីហនុ ៦០០តោនក្នុងមួយថ្ងៃ រូបពីក្រសួងបរិស្ថាន
× ភ្នំពេញ៖ កាកសំណល់សំរាម បានកើនឡើងជាបន្តបន្ទាប់ ដោយសារតែកំណើនប្រជាពលរដ្ឋ និងការវេចខ្ចប់ទំនិញប្រើប្រាស់ប្រចាំថ្ងៃ។ បច្ចុប្បន្ននេះ កម្ពុជា មានកាកសំណល់សំរាម១ម៉ឺនតោនក្នុងមួយថ្ងៃ ដែលក្នុងនោះនៅរាជភ្នំពេញ មានសំរាមច្រើនជាងគេ។
លោក នេត ភក្ត្រា អ្នកនាំពាក្យក្រសួងបរិស្ថាន បានបញ្ជាក់ថា កម្ពុជា មានការកើនឡើងសំរាម១០ភាគរយក្នុងមួយឆ្នាំ ដោយសារកំណើនប្រជាពលរដ្ឋ ការផ្លាស់ប្តូររបៀបនៃការរស់នៅ និងការវេចខ្ចប់ទំនិញប្រើប្រាស់ប្រចាំថ្ងៃ។ ជាពិសេសការយល់ដឹងពីការញែកសំរាមតាមប្រភេទ និងការគ្រប់គ្រងសំរាម ឲ្យស្របតាមគោលការណ៍បច្ចេកទេស នៅមានកម្រិតនៅឡើយ។
តាមការប៉ាន់ប្រមាណ នៅទូទាំងប្រទេសកម្ពុជា កាលពីឆ្នាំ២០១៧ មានបរិមាណសំរាមសំណល់រឹងទីប្រជុំជន ដែលបានបង្កើតឡើង មានប្រហែលជាង៣,៦៥លានតោនក្នុងមួយឆ្នាំ ឬជាង១ម៉ឺនតោនក្នុងមួយថ្ងៃ ដែលក្នុងនោះក្នុងមួយថ្ងៃ សំរាមនៅខេត្តសៀមរាបពី៣៥០តោន ទៅ៤០០តោន ខេត្តព្រះសីហនុ ពី៦០០តោន តៅ៦៥០តោន និងរាជធានីភ្នំពេញ មានជិត៣ពាន់តោន ដែលសំណល់សំរាមពី៧០ទៅ៨០ភាគរយ នៃបរិមានសំណល់សរុប ត្រូវបានប្រមូលទៅដាក់ទីលាន និងសម្រាប់កែច្នៃ។ នេះបើតាមលោក នេត ភក្ត្រា។
អ្នកនាំពាក្យរូបនេះ បានបញ្ជាក់ថា បរិមាណសំរាមសំណល់រឹង ប្រហែល៤១ភាគរយ (១,៥លានតោនក្នុងមួយឆ្នាំ) នៃបរិមាណសំណល់សរុប ត្រូវបានប្រមូលយកទៅដាក់នៅទីលាន ។ ចំណែកបរិមាណ១១ភាគរយ (៤០ម៉ឺនតោនក្នុងមួយឆ្នាំ) នៃចំនួនសរុប ត្រូវបានកែឆ្នៃ ខណៈសំណល់៤៨ភាគរយទៀត ត្រូវបានដុត ឬបោះចោលតាមទីសាធារណៈ និងប្រភពទឹកនានា។ បើតាមលោក នេត ភក្ត្រា កាកសំណល់រឹង ដែលអាចកែច្នៃបានគ្រប់ប្រភេទ ប្រហែលជា៧០ទៅ៨០ភាគរយនៃបរិមាណសំណល់សរុប។
លោក នេត ភក្ត្រា បានបន្ថែមថា៖«ការវេចខ្ចប់និងទុកដាក់សំរាម មិនត្រឹមត្រូវ បោះចោលសំរាមអនាធិបតេយ្យនៅតាមទីធ្លាសាធារណៈ និងតាមបណ្ដោយផ្លូវនានា នឹងនាំឲ្យមានផលវិបាកជាច្រើនដូចជា ការធ្វឲ្យស្ទះប្រព័ន្ធបង្ហូរទឹកលូ ដែលបង្កឲ្យមានជំនន់ ពេលរដូវភ្លៀង ធ្វើឲ្យបាត់បង់សោភណ្ឌភាពទីក្រុង និងទីប្រជុំជន ជាជម្រកមេរោគ និងបង្កជាតិពុលថែមទៀតផង»។
ក្រសួងបរិស្ថាន នឹងពង្រឹងការអនុវត្តលិខិតបទដ្ឋាន ស្តីពីការគ្រប់គ្រងសំរាមសំណល់រឹងទីប្រជុំជន ដើម្បីពង្រឹងការទទួលខុសត្រូវរបស់ក្រសួង ស្ថាប័ន និងអ្នកពាក់ព័ន្ធនានា។ នេះជាការបញ្ជាក់របស់អ្នកនាំពាក្យក្រសួងបរិស្ថាន ដែលបានអំពាវនាវឲ្យប្រជាពលរដ្ឋ ម្ចាស់រោងចក្រ សហគ្រាស សិប្បកម្ម ភោជនីយដ្ឋាន អាជីវកម្ម និងក្រុមហ៊ុន គ្រប់គ្រងសំណល់រឹង -រាវ និងសំរាមដែលបានបង្កើតឡើង នៅតាមទីតាំងខ្លួនឲ្យបានត្រឹមត្រូវ៕
Tag:
នេត ភក្ត្រា
សំរាម
© រក្សាសិទ្ធិដោយ thmeythmey.com