កីឡាជាតិ
ជាតិ
លោក Leonardo Vitorino ត្រូវបានតែងតាំងជាគ្រូបង្វឹកក្លិបភ្នំពេញក្រោន
× លោក Leonardo Vitorino ត្រូវបានតែងតាំងឲ្យធ្វើជាគ្រូបង្វឹកក្លិបបាល់ទាត់ភ្នំពេញក្រោន ជំនួសគ្រូបង្វឹកអង់គ្លេសលោក Sean Sainbury ដែលបានចែកផ្លូវគ្នាកាលពីដើមខែតុលា កន្លងទៅ។ សម្រាប់តួនាទីនេះ លោក Leonardo ត្រូវដឹកនាំក្រុមភ្នំពេញក្រោនប្រជែងដណ្តើមជើងឯកក្របខណ្ឌខេមបូឌានលីគ និងពានរង្វាន់សម្តេច ហ៊ុន សែន។
ក្រោយចប់កិច្ចសន្យាជានាយកបច្ចេកទេសជាមួយក្លិប Ceará Sporting Club របស់ប្រេស៊ីល អតីតគ្រូបង្វឹកក្រុមជម្រើសជាតិកម្ពុជាលោក Leonardo Vitorino ត្រូវបានតែតាំងឲ្យដឹកនាំក្លិបបាល់ទាត់ភ្នំពេញក្រោន ក្រោមកិច្ចសន្យារយៈពេល១ឆ្នាំ។ នេះជាការបង្ហាញវត្តមានលើកទី២របស់លោក Leonardo នៅកម្ពុជា។ ចំណែកលោក ស៊ុម វណ្ណា ជាគ្រូជំនួយក្លិបភ្នំពេញក្រោននេះ។
លោក Leonardo ត្រូវបានសហព័ន្ធកីឡាបាល់ទាត់កម្ពុជា តែងតាំងឲ្យធ្វើជាគ្រូបង្វឹកក្រុមជម្រើសជាតិនៅខែមីនា ឆ្នាំ២០១៧។ ប៉ុន្តែក្រោយរួមរស់ជាមួយគ្នាបានប្រមាណ៨ខែ លោក ត្រូវបានសហព័ន្ធសម្រេចបញ្ចប់កិច្ចសន្យាមុនពេលកំណត់នៅខែតុលា ឆ្នាំ២០១៧ ក្រោយដឹកនាំក្រុមទទួលបានលទ្ធផលមិនសូវល្អ។ ក្រោយចប់កិច្ចសន្យានៅកម្ពុជាគ្រូបង្វឹកប្រេស៊ីលរូបនេះ ត្រូវបានតែងតាំងឲ្យធ្វើជានាយកបច្ចេកទេសនៅក្លិប Ceará Sporting Club របស់ប្រេស៊ីលនៅឆ្នាំ២០១៨។
មុនមកដឹកនាំក្រុមជម្រើសជាតិកម្ពុជានៅឆ្នាំ២០១៧ គ្រូបង្វឹកវ័យ៤៥ឆ្នាំរូបនេះ ធ្លាប់ដឹកនាំក្លិប Lanexang United របស់ឡាវនៅឆ្នាំ២០១៦ ក្រោយដឹកនាំក្រុម Buriram United B នៅឆ្នាំ២០១៥។ ក្រៅពីនេះ គ្រូបង្វឹកដែលជោគជាំដោយបទពិសោធដឹកនាំរូបនេះ ធ្លាប់ដឹកនាំក្លិបនៅប្រេស៊ីល សហរដ្ឋអាមេរិក ហ្គាតា និងអង់ហ្គោឡាជាដើម។
គួររំលឹកថា កាលពីពេលកន្លងទៅថ្មីៗក្រោយចប់កិច្ចសន្យាជានាយកបច្ចេកទេសជាមួយក្លិប Ceará Sporting Club របស់ប្រេស៊ីល លោក Leonardo Vitorino បានប្រកាសថា លោកនឹងមកប្រកបអាជីពនៅតំបន់អាស៊ី។ ប៉ុន្តែមិនបានបញ្ជាក់ពីក្លិប ដែលលោក នឹងត្រូវមកដឹកនាំនោះទេ៕
Tag:
បាល់ទាត់
Leonardo Vitorino
ភ្នំពេញក្រោន
© រក្សាសិទ្ធិដោយ thmeythmey.com