អន្តរជាតិ
ព្រះអង្គម្ចាស់ស៊ុលតង់ម៉ាឡេស៊ីប្រាប់និស្សិតបញ្ចប់ការសិក្សា«កុំឲ្យពើងទ្រូងដោយសារសញ្ញាបត្រខ្ពស់»
×![]()
ដោយ: គី ចំណា
ស្តេចស៊ុលតង់ Ibrahim Sultan Iskandar នៃរដ្ឋ Johor របស់ម៉ាឡេស៊ីបាន ក្រើនរម្លឹកដល់និស្សិតទើបនឹងបញ្ចប់ការសិក្សាថ្មីៗឲ្យដាក់ខ្លួន និងកុំវាយឬកព្រោះខ្លួនកាន់សញ្ញាបត្រខ្ពស់នោះ។ ទ្រង់ដាស់តឿនថា ភាពជោគជ័យរបស់មនុស្សម្នាក់ៗគ្មានផ្លូវកាត់ឡើយ។
ថ្លែងនៅចំពោះមុខនិស្សិតនៅសកលវិទ្យាល័យ Tun Hussein Onn ស្តេចស៊ុលតង់ប្រចាំរដ្ឋ Johor មានបន្ទូលថា ទោះបីជាមានសញ្ញាបត្រមួយចេញពីសកលវិទ្យាល័យរួចហើយក៏ដោយ ប្រសិនបើគេមិនអាចរកការងារធ្វើបានសមរម្យទេនោះ នោះវាក៏គ្មានតម្លៃដែរ។ដូច្នេះហើយគេមិនគួរមានមោទកភាពជ្រុលនឹងសញ្ញាបត្រនោះឡើយ។
បើតាមសារព័ត៌មានម៉ាឡេស៊ី Malaysiankini ព្រះអង្គម្ចាស់ Ibrahim ក៏បានពន្យល់ថា មនុស្សម្នាក់ៗត្រូវ ចាប់ផ្តើមធ្វើការងារពីតូចទៅធំបន្តិចម្តងៗដើម្បីប្រមូលបទពិសោធន៍សំខាន់នានាពីការងារទាំងនោះ។
សម្រាប់ស្តេចស៊ុលតង់នៃរដ្ឋ Johor អង្គនេះ ការសន្សំបទពិសោធន៍ ការខិតខំបង្កើនជំនាញ និងចំណេះដឹងបន្ត គឺជារឿងចាំបាច់ណាស់សម្រាប់និស្សិតដែលរៀបចំដើម្បីឈានទៅរកភាពជោគជ័យក្នុងជីវិតព្រោះវាគ្មានផ្លូវកាត់ឡើយ។
ព្រះអង្គម្ចាស់ស៊ុលតង់មានបន្ទូលបន្ថែមទៀតថា៖« នៅពេលអ្នកកំពុងធ្វើការងារ អ្នកគួរគប្បីរក្សាកេរ្តិ៍ឈ្មោះរបស់អ្នកឲ្យបានល្អ ធ្វើការដោយទំនួលខុសត្រូវ ស្មោះត្រង់ និងបង្កើតការទុកចិត្តដល់អ្នកដទៃនៅជុំវិញខ្លួន»។
ទ្រង់ក៏បានឆ្លៀតរម្លឹកពីការតស៊ូ និងទុក្ខលំបាករបស់មាតាបិតារបស់សិស្សដែលបានលះបង់ដើម្បីការសិក្សារបស់កូនៗផងដែរ។ ជាការដឹងគុណ កូនចៅត្រូវតែបង្ហាញការគោរពជាការតបស្នងគុណចំពោះពួកគាត់វិញនៅពេលអនាគត៕
Tag:
ម៉ាឡេស៊ី
Ibrahim Sultan Iskandar
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
6 ម៉ោង
