អន្តរជាតិ
រចនាសម្ព័ន្ធបក្សកុម្មុយនីស្តចិនមានលក្ខណៈដូចម្តេច?
× ចិនជាប្រទេសឯកបក្ស ហើយបក្សកាន់អំណាច គឺបក្សកុម្មុយនីស្តចិន (CPC) ដែលសមាជិកជាង៩០លាននាក់។ បក្សកុម្មុយនីស្តចិនដែលចាប់កំណើតនៅឆ្នាំ១៩២១ មានរចនាសម្ព័ន្ធច្បាស់លាស់តាំងពីថ្នាក់ជាតិ ថ្នាក់តំបន់ ថ្នាក់មូលដ្ឋាន និងនៅតាមក្រសួង-ស្ថាប័នរដ្ឋផងដែរ។ គណៈកម្មាធិការមជ្ឈិម ជាស្ថាប័នមានអំណាចរបស់បក្ស ដែលមានលោក ស៊ី ជិនភីង ជាអគ្គលេខាធិការ។
គណៈកម្មាធិការមជ្ឈិមនៃបក្សកុម្មុយនីស្តចិន ជាស្ថាប័នមានអំណាចខ្ពស់ជាងគេនៅពេលដែលសមាជជាតិ មិនស្ថិតក្នុងពេលប្រជុំ។ ក្រោយសមាជលើកទី១៩ ខែតុលា ឆ្នាំ២០១៧ គណៈកម្មាធិការមជ្ឈិមបក្សកុម្មុយនីស្តចិន មានសមាជិកពេញសិទ្ធិ២០៥នាក់ និងសមាជិកបម្រុង១៧១នាក់។ គណៈកម្មាធិការមជ្ឈិមត្រូវបានកោះប្រជុំពេញអង្គយ៉ាងតិចណាស់ម្ដងក្នុងមួយឆ្នាំដើម្បីត្រួតពិនិត្យសកម្មភាពនានារបស់បក្ស និងគោលនយោបាយសំខាន់ផ្សេងទៀត។
ដោយសារគណៈកម្មាធិការមជ្ឈិមមានសមាជិកច្រើន ពិបាកជួបប្រជុំនោះ ការងារសំខាន់ៗធ្លាក់ទៅលើការិយាល័យនយោបាយនៃគណៈកម្មាធិការមជ្ឈិម។ ស្ថាប័ននេះ មានសមាជិក២៥នាក់ និងមានអំណាចខ្ពស់ជាងគេ ពេលគណៈកម្មាធិការមជ្ឈិមមិនស្ថិតក្នុងពេលប្រជុំរបស់ខ្លួន។ សមាជិកទាំងអស់នៃការិយាល័យនយោបាយ ត្រូវបានជ្រើសរើសដោយគណៈកម្មាធិការមជ្ឈិម ហើយសុទ្ធតែកាន់តំណែងធំៗទាំងក្នុងបក្ស និងក្នុងជួររដ្ឋាភិបាលផង។
គណៈកម្មាធិការអចិន្ត្រៃយ៍ការិយាល័យនយោបាយនៃគណៈកម្មាធិការមជ្ឈិម ប្រមូលផ្ដុំដោយមេដឹកនាំជាន់ខ្ពស់ទាំង៧នាក់ និងជាស្ថាប័នសម្រេចចិត្តខ្ពស់បង្អស់ក្នុងការិយាល័យនយោបាយ។ គណៈកម្មាធិការអចិន្ត្រៃយ៍ តែងជួបប្រជុំញឹកញាប់ និងសម្រេចរាល់ការងារសំខាន់ៗ ដោយមិនចាំបាច់ឆ្លងយោបល់ ឬពិភាក្សាការសម្រេចចិត្តនោះក្នុងកិច្ចប្រជុំការិយាល័យនយោបាយឡើយ។ និយាយឲ្យខ្លី គណៈកម្មាធិការអចិន្ត្រៃយ៍នេះ ជាស្ថាប័នក្ដាប់អំណាចពិតប្រាកដរបស់បក្សកុម្មុយនីស្ត ក៏ដូចជាចិនទាំងមូល។
សមាជិកទាំង៧នាក់តាមលំដាប់អំណាចមានដូចនេះ៖១. អគ្គលេខាធិការគណៈកម្មាធិការមជ្ឈិមបក្ស ស៊ី ជិនភីង និងជាប្រធានាធិបតី, ២. លី ខឹឈាំង (នាយករដ្ឋមន្ត្រី), ៣. លី ចាន់ស៊ូ (ប្រធានសភាតំណាងប្រជាជន), ៤. វ៉ាង យ៉ាង (ប្រធានសភាពិគ្រោះយោបល់), ៥. វ៉ាង ហ៊ូនីង (ប្រធានគណៈកម្មការកែទម្រង់គ្រប់ជ្រុងជ្រោយរបសបក្ស), ៦. ចាវ ឡឺជី (ប្រធានគណៈកម្មការមជ្ឈិមត្រួតពិនិត្យវិន័យរបស់បក្ស) និង៧. ហាន ជឹង (ឧបនាយករដ្ឋមន្ត្រីទី១)៕
Tag:
ស៊ី ជិនភីង
បក្សកុម្មុយនីស្តចិន
© រក្សាសិទ្ធិដោយ thmeythmey.com