ឃាតកម្មអ្នកកាសែត Khashoggi៖លោក ត្រាំ ថា អាមេរិកឈរខាងអារ៉ាប៊ីសាអូឌីត

អន្តរជាតិ

ឃាតកម្មអ្នកកាសែត Khashoggi៖លោក ត្រាំ ថា អាមេរិកឈរខាងអារ៉ាប៊ីសាអូឌីត

21, Nov 2018 , 9:29 pm

រូបភាព

លោក ដូណាល់ ត្រាំ ចាប់ដៃរជ្ជទាយាទអារ៉ាប៊ីសាអូឌីត (រូបភាព AP)

ដោយ: តន ចាន់រិទ្ធារ៉ា

ប្រធានាធិបតី ដូណាល់ ត្រាំ នៅថ្ងៃទី២០ ខែវិច្ឆិកា បានប្រកាសថា អាមេរិកនឹងនៅតែជាដៃគូឥតងាករេរបស់អារ៉ាប៊ីសាអូឌីត ទោះជាសម្ព័ន្ធមិត្តមួយនេះរងការរិះគន់ខ្លាំងលើសំណុំរឿងឃាតកម្មអ្នកកាសែត Jamal Khashoggi ក្ដី។ ទោះជាទទួលស្គាល់ថា រជ្ជទាយាទ Mohammed bin Salman អាចជាអ្នកបញ្ជាក្ដី លោក ត្រាំ នៅតែអះអាងថា ទំនាក់ទំនងរវាងអាមេរិក និងអារ៉ាប៊ីសាអូឌីតគឺជារឿងសំខាន់ជាងសំណុំរឿងនេះទៅទៀត។

អាមេរិកនៅឈរខាងអារ៉ាប៊ីសាអូឌីត។ នេះជាអត្ថន័យក្នុងសេចក្ដីថ្លែងការណ៍របស់ប្រធានាធិបតីអាមេរិក ដូណាល់ ត្រាំ ថ្ងៃទី២០ ខែវិច្ឆិកា ជុំវិញឃាតកម្មដ៏ឃោរឃៅលើអ្នកសារព័ត៌មានរបស់កាសែត Washington Post លោក Jamal Kashoggi ។ រដ្ឋបាលលោក ត្រាំ បានរងសម្ពាធខ្លាំង និងត្រូវបានស្នើឲ្យចាត់វិធានការប្រឆាំងអារ៉ាប៊ីសាអូឌីត និងរកមុខអ្នកនៅពីក្រោយការស្លាប់របស់លោក Khashoggi ឲ្យឃើញ។

ក្នុងសេចក្ដីថ្លែងការណ៍ដែលផ្សាយដោយសេតវិមាន លោក ត្រាំ បានប្រើពាក្យទំនងជាទៅលើលទ្ធភាពដែលរជ្ជទាយាទអារ៉ាប៊ីសាអូឌីត Mohammed bin Salman (MBS) អាចជាប់ពាក់ព័ន្ធករណីឃាតកម្មនៅខាងក្នុងស្ថានកុងស៊ុលអារ៉ាប៊ីសាអូឌីតប្រចាំទីក្រុងអ៊ីស្តង់ប៊ុល។ លោកថា ទ្រង់ MBS ទំនងជាជាប់ទាក់ទង ឬមិនជាប់ទាក់ទងរឿងនេះ ប៉ុន្តែគេអាចមិនដឹងការពិតទាំងអស់នៅជុំវិញករណីឃាតកម្មនេះ។

ទោះជាយ៉ាងណាក៏ដោយ ប្រធានាធិបតីអាមេរិកបញ្ជាក់ច្បាស់ថា ទំនាក់ទំនងរបស់អាមេរិក គឺនៅជាមួយអារ៉ាប៊ីសាអូឌីត ហើយអាមេរិកនៅតែមានបំណងធ្វើជាដៃគូឥតប្រែដដែល។ លោក ត្រាំ មិនសូវនិយាយអ្វីច្រើនឡើយបន្ទាប់ផ្ទុះឡើងករណីឃាតកម្មលើលោក Kashoggi ទោះជាមានភស្តុតាងជាច្រើនបានភ្ជាប់ករណីនេះទៅថ្នាក់ដឹកនាំជាន់ខ្ពស់ក្រុងរីយ៉ាដក្ដី។ ទីភ្នាក់ងារចារកម្មកណ្ដាល CIA ក៏ជឿថា ទ្រង់ MBS ជាអ្នកបញ្ជាឲ្យសម្លាប់អ្នកកាសែតអារ៉ាប៊ីសាអូឌីតរូបនេះទៅទៀត។

ជាមួយគ្នានេះ លោក ត្រាំ រៀបរាប់ពីគុណសម្បត្តិរបស់អារ៉ាប៊ីសាអូឌីតនាពេលកន្លងមកដូចជាការរុញច្រានការពង្រីកឥទ្ធិពលអ៊ីរ៉ង់នៅមជ្ឈិមបូព៌ា និងបានទិញអាវុធពីអាមេរិកដល់ទៅ៤៥០ពាន់លានដុល្លារ ព្រមទាំងបានវិនិយោគជាមួយអាមេរិកលើវិស័យជាច្រើនផង។ លោក ត្រាំ បន្តថា ដោយសារអារ៉ាប៊ីសាអូឌីត ក៏ជួយទប់ទល់តម្លៃប្រេងឆៅកុំឲ្យឡើងថ្លៃដែរ ខណៈប្រទេសនេះជាអ្នកផលិតប្រេងធំជាងគេរបស់ពិភពលោក។

ទោះជាយ៉ាងណា លោក ត្រាំ ក៏ទទួលស្គាល់ពីសម្ពាធខាងក្នុងអាមេរិក ជាពិសេសពីសំណាក់រដ្ឋសភាគ្រប់គ្រងដោយបក្សប្រជាធិបតេយ្យ ដែលចង់ឲ្យរដ្ឋបាលលោកដាក់ទណ្ឌកម្មលើរជ្ជទាយាទអារ៉ាប៊ីសាអូឌីត និងចាត់វិធាការផ្សេងទៀតលើក្បាលម៉ាស៊ីនដឹកនាំក្រុងរីយ៉ាដ។ លោក ត្រាំ បានឆ្លើយវិញថា លោកនឹងពិចារណាចំណាត់ការដែលបង្ហាញចំពោះមុខលោក តែត្រូវស្របតាមគោលការណ៍សន្តិសុខ និងសុវត្ថិភាពរបស់អាមេរិក៕