ជាតិ
រដ្ឋមន្ត្រីក្រសួងវប្បធម៌ពន្យល់ពីមូលហេតុដែលអាយស៊ីស៊ី-អង្គរ មានអាយុលើសអាយស៊ីស៊ីនៅប្រទេសដទៃ
× កិច្ចប្រជុំបច្ចេកទេសលើកទី៣១ និងកិច្ចប្រជុំពេញអង្គលើកទី២៥ របស់គណៈកម្មាធិការអន្ដរសម្របសម្រួលការគាំពារ និងអភិរក្សតំបន់រមណីយដ្ឋានប្រវត្តិសាស្ដ្រអង្គរ ហៅកាត់ថា អាយស៊ីស៊ី-អង្គរ បានបិទបញ្ចប់ហើយ នៅរសៀលថ្ងៃទី៥ ធ្នូ។ មានចំណុចជាច្រើន ត្រូវបានលើកយកមកជជែកគ្នា ដើម្បីសិក្សាពីបញ្ហាប្រឈម និងផលប៉ះពាល់ ទាំងការងារអភិរក្ស និងអភិវឌ្ឍន៍រមណីយដ្ឋានអង្គរ ដូចជាកំណើនភ្ញៀវទេសចរ មកកាន់ខេត្តសៀមរាបជាដើម។
ក្រៅពីការងារខាងលើ ក៏មានការចោទសួរ ពីតួនាទីរបស់គណៈកម្មាធិការអន្ដរជាតិមួយនេះ ថានឹងបន្ដយន្តការរបស់ខ្លួន ក្នុងរមណីយដ្ឋានអង្គរដល់ពេលណា ខណៈដែលវាមានរយៈពេល ២៥ឆ្នាំមកហើយនោះ។ ឆ្លើយតបនឹងសំណួររបស់អ្នកសារព័ត៌មាន លោកស្រី ភឿង សកុណា ពន្យល់ថាជាធម្មតាគណៈកម្មាធិការមួយនេះ តែងមានកិច្ចប្រជុំរាល់១០ឆ្នាំ ដើម្បីពិភាក្សាថានឹងបន្តទៅណាទៀត។ តែសម្រាប់កម្ពុជា មានលក្ខណៈពិសេសត្រង់ថា ឧទ្យានអង្គរ បានក្លាយជាគំរូរបស់យន្តការអន្ដរជាតិ ដែលចាប់ផ្តើមពីចំណុចសូន្យ ប្រែក្លាយទៅជារមណីយដ្ឋានមួយ ដែលមានលទ្ធផលគួរជាទីមោទក។
«សព្វថ្ងៃ យើងមានដៃគូចូលរួមរាប់រយប្រទេស អ្នកជំនាញការរាប់ពាន់នាក់ ធ្វើការដើម្បីបេតិកភណ្ឌពិភពលោកអង្គរ អាចប្រមូលជំនួយពីបរទេសរាប់រយលានដុល្លារ។ ដូច្នេះលទ្ធផលនៃភាពជោគជ័យនេះ ធ្វើឱ្យបរទេសនៅតែចង់ចូលរួមជាមួយយើង។ ធម្មតាទេ តែធ្វើការហើយទទួលបានលទ្ធផលច្រើន គួរមិនចង់ចាកចេញទេ»។ នេះជាពន្យល់បន្ថែមរបស់លោកស្រី ភឿង សកុណា។
គួររម្លឹកថា គណៈកម្មាធិការអន្ដរជាតិ អាយស៊ីស៊ី-អង្គរ គឺជាយន្តការអន្ដរជាតិ ដើម្បីកៀងគរធនធានថវិកា ជំនាញបច្ចេកទេស និងធនធានមនុស្ស ពីសហគមន៍អន្ដរជាតិ ដើម្បីជួសជុល អភិរក្ស និងលើកតម្លៃប្រាសាទនានា ក៏ដូចជាការអភិវឌ្ឍរមណីយដ្ឋានបេតិកភណ្ឌពិភពលោកអង្គរ ដែលមានភាពធំធេង និងត្រូវការធនធានច្រើនដើម្បីអនុវត្តកាតព្វកិច្ចនេះ។ ក្នុងដំណើរការរបស់ខ្លួន គណៈកម្មាធិការ អាយស៊ីស៊ី-អង្គរ បានរៀបចំកិច្ចប្រជុំបច្ចេកទេសចំនួន ៣១ដង និងកិច្ចប្រជុំពេញអង្គចំនួន ២៥ដងរួចមកហើយ ហើយដែលថវិការាប់រយលានដុល្លារ ត្រូវបានប្រើប្រាស់ និងអ្នកជំនាញបច្ចេកទេសជាតិរាប់រយនាក់ បានទទួលការបណ្ដុះបណ្តាល និងបន្ដវេនយ៉ាងរឹងមាំ ដើម្បីធានានូវការអភិរក្សប្រកបដោយចីរភាពនៃតំបន់អង្គរ៕
© រក្សាសិទ្ធិដោយ thmeythmey.com