អន្តរជាតិ
ឥណ្ឌា សម្ពោធស្ពានដែលឲ្យយន្តហោះចម្បាំងចុះចតបាន រូបភាពពី Twitter នាយករដ្ឋមន្រ្តីឥណ្ឌា
× នាយករដ្ឋមន្ត្រីឥណ្ឌា ណារិន្ទ្រា ម៉ូឌី នៅថ្ងៃទី២៥ ខែធ្នូ បានបើកសម្ពោធស្ពានវែងជាងគេរបស់ឥណ្ឌាដែលដើរតួជាស្ពានសម្រាប់រថយន្តផង និងមានផ្លូវរថភ្លើងផង។ ស្ពាន Bogibeel ស្ថិតក្នុងរដ្ឋ Assam ជារដ្ឋក្រីក្រមួយរបស់ឥណ្ឌា ដែលនឹងជួយពង្រឹងសមត្ថភាពការពារជាតិ ពិសេសតំបន់ព្រំដែនជាប់ចិន។ រថក្រោះធ្ងន់ៗអាចបើកបរលើស្ពាននេះដោយស្រួល ហើយយន្តហោះចម្បាំងក៏អាចចុះចតបានដូចគ្នាដែរ។
ភ្ជាប់ត្រើយខាងជើងទៅត្រើយខាងត្បូងទន្លេ Brahmaputra ស្ពាន Bogibeel ចំណាយពេលសាងសង់ជិតពីរទសវត្សរ៍ និងចំណាយទឹកប្រាក់ចំនួនជាង៨០០លានដុល្លារ។ ស្ពានដែលស្ថិតក្បែរទីក្រុង Dibrugarh នៃរដ្ឋ Assam ជាមួយផ្នែកមួយនៃគម្រោងការពារជាតិរបស់រដ្ឋាភិបាលក្រុងញូវដែលី នៅតំបន់ព្រំដែនជាមួយចិន ដែលជាសត្រូវចាស់។ ស្ពាននេះ នឹងជួយបង្កើនល្បឿនពង្រាយទ័ពទៅកាន់រដ្ឋ Arunachal Pradesh ជាទីដែលឥណ្ឌាធ្លាប់ប្រយុទ្ធជាមួយចិនកាលពីឆ្នាំ១៩៦២ ។
បើតាមសារព័ត៌មានឥណ្ឌា Times of India ស្ពាននេះមានពីរជាន់ ដោយជាន់ក្រោមជាផ្លូវរថភ្លើងមានពីរខ្សែ ឯជាន់លើជាផ្លូវសម្រាប់ការធ្វើដំណើររបស់យានយន្តមានបីគន្លង ហើយមានសមត្ថភាពគ្រប់គ្រាន់ក្នុងទ្រទម្ងន់យុទ្ធោបករណ៍ធុនធ្ងន់បាន។ មានន័យថា រថក្រោះធ្ងន់ជាងគេរបស់ឥណ្ឌាដែលមានទម្ងន់៦០តោន អាចបើកបរលើស្ពានបានដោយស្រួល។ លើសពីនោះ យន្តហោះចម្បាំងក៏អាចប្រើប្រាស់ស្ពានេះ ជាផ្លូវរត់បានដែរ។
ក្រោយបើកដំណើរការ រយៈពេលធ្វើដំណើរតាមរថភ្លើងពីទីក្រុង Dibrugarh ទៅកាន់ទីក្រុង Itanagar ក្នុងរដ្ឋ Arunachal Pradesh នឹងកាត់បន្ថយចំនួន៧៥០គីឡូម៉ែត្រឯណោះ។ ការធ្វើដំណើរពីរដ្ឋធានីញូវដែលីទៅកាន់ Dibrugarh ក៏នឹងចំណេញពេល៣ម៉ោងដែរ ខណៈការធ្វើដំណើររាល់ដង ត្រូវចំណាយពេលដល់៣៧ម៉ោង។
Arunachal Pradesh ជារដ្ឋមួយក្នុងចំណោមរដ្ឋទាំង២៩របស់ឥណ្ឌា និងស្ថិតនៅឦសានជាប់ព្រំដែនជាមួយចិន។ ក្នុងសង្គ្រាមព្រំដែនឆ្នាំ១៩៦២ ឥណ្ឌាបានបាត់បង់ទឹកដីមួយចំនួនក្នុងរដ្ឋនេះទៅឲ្យចិន។ ដូចនេះ ស្ពាន Bogibeel មានតួនាទីសំខាន់ផ្នែកយុទ្ធសាស្ត្រសម្រាប់ឥណ្ឌា។
សូមបញ្ជាក់ថា ស្ពានវែងលំដាប់ទី១ របស់ឥណ្ឌាមួយនេះ កើតចេញពីកិច្ចព្រមព្រងឆ្នាំ១៩៨៥ រវាងក្រុងញូវដែលី និងក្រុមផ្ដាច់ខ្លួននៅរដ្ឋ Assam ដើម្បីបញ្ចប់យុទ្ធនាការបង្ហូរឈាមក្នុងរដ្ឋមួយនេះ។ នៅចន្លោះរដ្ឋទាំងពីរនេះ ក៏មានស្ពានវែងជាងគេរបស់ឥណ្ឌាមួយទៀត គឺស្ពាន Dhola-Sadiya ប្រវែង៩.១គីឡូម៉ែត្រ ដែលជាប្រភេទស្ពានសុទ្ធសាធ គ្មានផ្លូវរថភ្លើងឡើយ ហើយមានគោលដៅយុទ្ធសាស្ត្រក្នុងការពង្រឹងការការពារជាតិដែរ៕
Tag:
ឥណ្ឌា
ណារិន្ទ្រា ម៉ូឌី
© រក្សាសិទ្ធិដោយ thmeythmey.com