ប្រធានាធិបតីអាមេរិក ដូណាល់ ត្រាំ នៅថ្ងៃទី២៦ ខែធ្នូ បានទៅសួរសុខទុក្ខទាហានអាមេរិកដែលកំពុងឈរជើងនៅអ៊ីរ៉ាក់។ ដំណើរទស្សនកិច្ចលើកដំបូងរបស់លោក ត្រាំ ទៅកាន់តំបន់សង្គ្រាមបែបនេះ ត្រូវធ្វើឡើងយ៉ាងសម្ងាត់បំផុត។ អមដំណើរដោយស្ត្រីទីមួយ មេឡានី ត្រាំ ប្រធានាធិបតីអាមេរិកបាននិយាយការពារការសម្រេចចិត្តដកទ័ពពីស៊ីរី និងអះអាងជាថ្មីថា អាមេរិកលែងឲ្យប្រទេសណាកេងប្រវ័ញ្ចទៀត ហើយក៏លែងធ្វើជាតម្រួតពិភពលោកដូចមុនទៀតដែរ។
ការទៅសួរសុខទុក្ខទាហាននៅតំបន់សមរភូមិដើម្បីលើកទឹកចិត្ត ជាអ្វីដែលប្រធានាធិបតីអាមេរិកមុនៗធ្លាប់ធ្វើឡើង ដោយទម្លាប់នេះមានតាំងពីការវាយប្រហារភេរវកម្មថ្ងៃទី១១ ខែកញ្ញា ឆ្នាំ២០១១ មក។ ប៉ុន្តែលោកប្រធានាធិបតី ដូណាល់ ត្រាំ បានរងរិះគន់ខ្លាំង ព្រោះលោកមិនទាន់ទៅកាន់បន្ទាយទាហានអាមេរិកនៅតំបន់ដែលកំពុងមានការប្រយុទ្ធគ្នាឡើយ ពេលលោកចូលកាន់តំណែងនៅដើមឆ្នាំ២០១៧ មកនោះ។
យ៉ាងណាមិញ លោក ត្រាំ និងភរិយាបានទៅដល់បន្ទាយទ័ពអាកាស Al-Asad នៅភាគខាងលិចអ៊ីរ៉ាក់ ដើម្បីសួរសុខទុក្ខយោធាអាមេរិក។ ទស្សនកិច្ចនេះ ត្រូវរៀបចំឡើងដោយគ្មាននរណាដឹងមុនឡើយ សូម្បីតែអ្នកសារព័ត៌មានប្រចាំសេតវិមានដែលដើរតាមយកព័ត៌មានរបស់ប្រធានាធិបតីអាមេរិក ក៏ដឹងរឿងនេះនៅចុងក្រោយដែរ។ លោក ត្រាំ វិញ បានហៅការហោះហើរនេះ ជាដំណើរសម្ងាត់បំផុត តែលោកក៏មានអារម្មណ៍មិនស្រួលដែរ ដ្បិតយន្តហោះ Air Force One មិនត្រូវបានអនុញ្ញាតឲ្យបើកភ្លើងឡើយ។
ពីទឹកដីអ៊ីរ៉ាក់នៅថ្ងៃទី២៦ ខែធ្នូ លោក ត្រាំ បានការពារគោលនយោបាយរបស់លោកជុំវិញការដកខ្លួនពីសម្ព័ន្ធចម្រុះអន្តរជាតិដើម្បីបោសសម្អាតក្រុមភេរវជនរដ្ឋឥស្លាមនៅស៊ីរី និងសង្គ្រាមនៅមជ្ឈិមបូព៌ាដែលប្រជាជនអាមេរិកគិតថា គ្មានថ្ងៃបញ្ចប់ឡើយ។
មេដឹកនាំអាមេរិករូបនេះព្យាយាមការពារ«នយោបាយតម្កល់ប្រយោជន៍អាមេរិកជាធំ» ដោយនិយាយថា វាជារឿងមិនយុត្តិធម៌ឡើយសម្រាប់អាមេរិកដែលត្រូវលីសែងអម្រែកដ៏ធ្ងន់នេះតែម្នាក់ឯង ខណៈប្រទេសជាច្រើនកេងចំណេញពីអាមេរិក និងប្រើយោធាអាមេរិកដើម្បីការពារពួកគេ។ លោកក៏ត្អូញត្អែរពីការអន្តរាគមន៍របស់អាមេរិកនៅគ្រប់ទីកន្លែងពេញពិភពលោកដែរ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
«យើងទៅឈរជើងនៅពាសពេញពិភពលោក។ យើងទៅដល់ប្រទេសដែលសឹងតែគ្មាននរណាធ្លាប់ឮឈ្មោះអ្វីឡើយ»។ នេះជាការបញ្ជាក់របស់លោក ត្រាំ ទៅកាន់ទាហានអាមេរិកប្រមាណ១០០នាក់។ ចំណែកឯការដកទ័ពពីស៊ីរីវិញ លោកបានប្រាប់អ្នកសារព័ត៌មានថា លោកបានបដិសេធយោបល់របស់ក្រុមឧត្តមសេនីយ៍ដែលចង់ឲ្យអាមេរិកបន្តរក្សាវត្តមានរបស់ខ្លួនទៀត និងថា គ្មានពេលសម្រាប់ការប្រយុទ្ធជាមួយពួកជ្រុលនិយមទៀតហើយ។
ទោះដកទ័ពថ្មើរជើងចេញទាំងស្រុងពីស៊ីរីមែន ទ័ពអាមេរិកនឹងបន្តឈរជើងនៅអ៊ីរ៉ាក់ដដែល។ នេះជាការលើកឡើងរបស់លោក ត្រាំ ដែលចង់ឲ្យទាហានអាមេរិកនៅអ៊ីរ៉ាក់ បំពេញតួនាទីជំនួសវិញ បើស្ថានការណ៍ស៊ីរីនៅថ្ងៃអនាគតតម្រូវឲ្យមានការអន្តរាគមន៍មែននោះ។
អ្វីគួរឲ្យកត់សម្គាល់នោះ អ៊ីរ៉ាក់ដូចជាមិនសូវពេញចិត្តនឹងទស្សនកិច្ចរបស់លោក ត្រាំ ឡើយ ដ្បិតប្រធានាធិបតីអាមេរិកមិនបានចូលសួរសុខទុក្ខម្ចាស់ផ្ទះឡើយ។ តាមគម្រោង លោក ត្រាំ ត្រូវជួបជាមួយនាយករដ្ឋមន្ត្រីអ៊ីរ៉ាក់ Adel Abdul Mahdi ប៉ុន្តែចុងក្រោយបែរជាជជែកតាមទូរសព្ទទៅវិញ។ ការិយាល័យលោក Mahdi ប្រកាសថា អាមេរិក និងអ៊ីរ៉ាក់មិនត្រូវគ្នាជុំវិញទីតាំងជំនួប ដោយលោក Mahdi មិនចង់ជួបលោក ត្រាំ នៅបន្ទាយយោធាអាមេរិកឡើយ។
ក្រោយស្ថិតនៅអ៊ីរ៉ាក់ជាង៣ម៉ោង លោក ត្រាំ ក៏ចាកចេញ និងធ្វើដំណើរឆ្ពោះទៅកាន់អាល្លឺម៉ង់ទៀត ដោយឆៀងចូលសួរសុខទុក្ខយោធាអាមេរិកនៅបន្ទាយទាហាន Ramstein ៕