មន្ត្រីអាមេរិកទៅចិនខែក្រោយដើម្បីចរចា ខណៈបទឈប់បាញ់សល់ជាង៦០ថ្ងៃទៀត

អន្តរជាតិ

មន្ត្រីអាមេរិកទៅចិនខែក្រោយដើម្បីចរចា ខណៈបទឈប់បាញ់សល់ជាង៦០ថ្ងៃទៀត

27, Dec 2018 , 10:19 pm

រូបភាព

ដោយ: តន ចាន់រិទ្ធារ៉ា

ប្រតិភូមន្ត្រីអាមេរិកទទួលពាណិជ្ជកម្មមួយក្រុម នឹងធ្វើដំណើរទៅកាន់ទឹកដីចិននៅដើមខែមករា ឆ្នាំ២០១៩ ដើម្បីចរចាបញ្ចប់ជម្លោះពាណិជ្ជកម្ម។ វានឹងក្លាយជាការចរចាទល់មុខលើកទីមួយរវាងភាគីជម្លោះទាំងពីរ បន្ទាប់ពីថ្នាក់ដឹកនាំកំពូលបានជួបគ្នាកាលពីដើមខែធ្នូនៅអាហ្សង់ទីន និងបានព្រមព្រៀងគ្នាផ្អាកចាត់វិធានការប្រឆាំងគ្នាទៅវិញទៅមករយៈពេល៩០ថ្ងៃទៀតផង។ យ៉ាងណាមិញ គេមិនរំពឹងថា ជំនួបថ្នាក់ក្រោមនេះនឹងមានលទ្ធផលផ្លែផ្កាឡើយ។

ជម្លោះពាណិជ្ជកម្មរវាងអាមេរិក និងចិន ហាក់ស្ងប់ស្ងាត់គួរឲ្យសាទរ ក្រោយប្រធានាធិបតី ដូណាល់ ត្រាំ និងសមភាគីចិន ស៊ី ជិនភីង ជួបគ្នានៅថ្ងៃទី១ ខែធ្នូ នៅអាហ្សង់ទីនក្រៅជំនួបមហាអំណាចសេដ្ឋកិច្ចទាំង២០។ ពេលនោះ មេដឹកនាំអាមេរិក និងចិនឯកភាពគ្នាថា នឹងមិនធ្វើសកម្មភាពដាក់គ្នាទៅវិញទៅមករយៈពេល៩០ ដោយគិតពីថ្ងៃទី១ ខែធ្នូ ឆ្នាំ២០១៨តែម្ដង ហើយទុកពេលនេះ ជជែកគ្នាលើការខ្វែងគំនិតទាំងឡាយ។

សារព័ត៌មានអាមេរិក Bloomberg News ផ្សាយនៅថ្ងៃទី២៦ ខែធ្នូ ថា មន្ត្រីអាមេរិកមួយក្រុមនឹងធ្វើដំណើរទៅកាន់ទីក្រុងប៉េកាំងនៅក្នុងសប្ដាហ៍ថ្ងៃទី៧ ខែមករា ឆ្នាំ២០១៩ ដើម្បីជួបចរចាជាមួយភាគីចិន។ ប្រតិភូនឹងដឹកនាំដោយតំណាងរងទទួលបន្ទុកការចរចាពាណិជ្ជកម្ម Jeffrey Gerrish ឯខាងចិនទំនងដឹកនាំដោយអនុរដ្ឋមន្ត្រីមកពីក្រសួងពាណិជ្ជកម្ម។

គម្រោងជួបគ្នារវាងមន្ត្រីចិន និងអាមេរិកកើតឡើងបន្ទាប់សញ្ញានៃភាពល្អប្រសើរបានលេចចេញខ្លះៗ ខណៈលោក ត្រាំ ក៏មិនបាននិយាយអ្វីដែរពាក់ព័ន្ធជម្លោះពាណិជ្ជកម្មជាមួយចិន។ ទាំងចិន ទាំងអាមេរិកមានពេលដល់ថ្ងៃទី១ ខែមីនា ដើម្បីស្វែងរកច្រកចេញនៃវិបត្តិនេះ។ យ៉ាងណាក្ដី ដោយសារជំនួបខែមករា ជាការចរចាថ្នាក់ក្រោម គេមិនដឹងថា នឹងមានលទ្ធផលយ៉ាងណាឡើយ តែអាចឈានដល់ការឯកភាពជាគោលការណ៍ណាមួយ។

កាលពីសប្ដាហ៍មុន មន្ត្រីអាមេរិក និងចិនបានជជែកតាមទូរសព្ទចំនួន២ដង។ ក្រសួងពាណិជ្ជកម្មចិនអះអាងថា ការចរចារវាងអាមេរិក និងចិន មានដំណើរការទៅមុខលើបញ្ហាដូចជាតុល្យភាពពាណិជ្ជកម្ម និងកម្មសិទ្ធិបញ្ញាជាដើម។ កាលពីថ្ងៃទី១៤ ខែធ្នូ ក្រុងប៉េកាំងក៏ប្រកាសដែរថា ចាប់ផ្ដើមពីថ្ងៃទី១ ខែមករា ឆ្នាំ២០១៩ ខ្លួននឹងផ្អាកការអនុវត្តពន្ធនាំចូលបន្ថែមលើឡាន និងគ្រឿងបរិក្ខាររថយន្តដែលផលិតនៅអាមេរិក។

សូមបញ្ជាក់ថា ជម្លោះពាណិជ្ជកម្មរវាងមហាអំណាចសេដ្ឋកិច្ចទាំងពីរ បានឆាបឆេះក្នុងខែកក្កដា បន្ទាប់ពីរដ្ឋបាលលោក ត្រាំ បានដំឡើងពន្ធលើផលិតផលចិនរាប់រយមុខ។ ការដំឡើងពន្ធទៅមកនេះ ធ្វើទំហំពន្ធដែលដំឡើងដោយភាគីទាំងពីរមានច្រើនជាង៣០០ពាន់លានដុល្លារឯណោះ ហើយវាក៏ធ្វើឲ្យរញ្ជួយទីផ្សារហ៊ុនពិភពលោកផងដែរ។ អាមេរិកចោទចិនថា អនុវត្តពាណិជ្ជកម្មមិនយុត្តិធម៌ លួចបច្ចេកវិទ្យាប្រទេសផ្សេង និងមិនបើកចំហទីផ្សារ៕