អន្តរជាតិ
ទស្សនកិច្ចផ្លេកបន្ទោររបស់លោក ត្រាំ នៅអ៊ីរ៉ាក់ កំពុងបង្ករឿងចម្រូងចម្រាស លោក ដូណាល់ ត្រាំ ចុះហត្ថលេខាលើមួក MAGA របស់យោធាអាមេរិក (រូបភាព CNN)
× ប្រធានាធិបតីអាមេរិក ដូណាល់ ត្រាំ ទើបបញ្ចប់ទស្សនកិច្ចដ៏ខ្លីមួយនៅអ៊ីរ៉ាក់ ដើម្បីសួរសុខទុក្ខទាហានអាមេរិកនៅតំបន់សង្គ្រាម។ ប៉ុន្តែទស្សនកិច្ចសម្ងាត់បំផុតមួយនេះ កំពុងបង្កើតរឿងចម្រូងចម្រាស។ បញ្ហាទីមួយ លោក ត្រាំ បានបញ្ចេញទីតាំង និងអត្តសញ្ញាណរបស់កម្លាំងពិសេស Navy SEAL ដែលជាទូទៅ ជារឿងលាក់ការណ៍បំផុត។ បញ្ហាទីពីរ លោក ត្រាំ បានចុះហត្ថលេខាលើមួក MAGA (Make America Great Again) ដែលជាពាក្យស្លោករបស់លោកក្នុងយុទ្ធនាការបោះឆ្នោត។
ក្នុងដំណើរទស្សនកិច្ចដ៏ភ្ញាក់ផ្អើលទៅកាន់អ៊ីរ៉ាក់នៅថ្ងៃទី២៦ ខែធ្នូ លោកប្រធានាធិបតី ដូណាល់ ត្រាំ បានសួរសុខទុក្ខ និងជជែកជាមួយយោធាអាមេរិកដែលត្រូវបានពង្រាយនៅឯបន្ទាយ Al Asad ។ លោក ត្រាំ ដែលអមដំណើរដោយស្ត្រីទីមួយ មេឡានី ត្រាំ ក៏បានចុះហត្ថលេខាលើមួក MAGA ពណ៌ក្រហម ដែលក្រុមទាហានយកមក ក៏ដូចជាថតរូប និងវីដេអូជាមួយពួកគេផង។ លោកបានបង្ហោះវីដេអូមួយពីសកម្មភាពនៅអ៊ីរ៉ាក់ មុនពេលបន្តដំណើរទៅកាន់បន្ទាយយោធាអាមេរិកនៅអាល្លឺម៉ង់។
តាមរយៈវីដេអូដែលបង្ហោះលើបណ្ដាញសង្គម Twitter របស់លោក ត្រាំ គេឃើញប្រធានាធិបតីរូបនេះបានឈរថតជាមួយកម្លាំងពិសេស Navy Seal ទៀតផង។ បើតាមអ្នកសារព័ត៌មានដែលធ្វើដំណើរជាមួយលោក ត្រាំ សមាជិកកម្លាំងពិសេសដែលឈ្មោះថា Kyu Lee បានប្រាប់លោក ត្រាំ ថា រូបគេជាមេក្រុម Seal Team Five ហើយពេលមួយនោះ ក៏ស្នើតថរូបជាមួយលោក ត្រាំ ផងដែរ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ការបង្ហាញមុខមាត់របស់កម្លាំងពិសេស គឺជារឿងកម្រណាស់។ ជាធម្មតា ទីតាំងឈរជើង និងអត្តសញ្ញាណរបស់កម្លាំងពិសេស ជាការសម្ងាត់បំផុត។ ក្នុងករណីពួកគេត្រូវបានថតក្នុងវីដេអូពេលកំពុងបំពេញភារកិច្ចនៅតំបន់សង្គ្រាមនោះ មុខ និងគ្រឿងសម្គាល់អត្តសញ្ញាណផ្សេងៗ ក៏ត្រូវបិទបាំងទៅទៀត។ ដូច្នេះហើយទើបវីដេអូរបស់លោក ត្រាំ ដែលជាអគ្គមេបញ្ជាការកងទ័ពអាមេរិក បង្កជាការរិះគន់ និងមានការលើកឡើងថា ប្រធានាធិបតីអាមេរិកកំពុងបំពានច្បាប់ស្ដីពីប្រតិបត្តិការសន្តិសុខផង។
អ្នកជំនាញចារកម្មកងទ័ពជើងទឹកអាមេរិក Malcolm Nance បានប្រាប់សារព័ត៌មានNewsweek ថា៖«ការបង្ហាញអត្តសញ្ញាបែបនេះ ទោះធ្វើដោយអគ្គមេបញ្ជាការកងទ័ពក្ដី ជាការឃោសនាដ៏កងរំពង ព្រោះសមាជិកកម្លាំងពិសេស អាចត្រូវបានចាប់ខ្លួនដោយរដ្ឋាភិបាលបរទេស ឬក៏ក្រុមភេរវជន។»
ក្រៅពីធ្វេសប្រហែសបង្ហាញអត្តសញ្ញាណកម្លាំងពិសេសនោះ លោក ត្រាំ ក៏ជួបរឿងចម្រូងចម្រាសមួយទៀត គឺការចុះហត្ថលេខាលើមួក MAGA ។ អំឡុងទស្សនកិច្ចនៅអ៊ីរ៉ាក់និងនៅអាល្លឺម៉ង់ដែរនោះ ទាហានអាមេរិកជាច្រើនបានតម្រង់ជួររង់ចាំលោក ត្រាំ ដើម្បីសុំហត្ថលេខាលើមួកពណ៌ក្រហមដែលមានប៉ាក់ពាក្យឃោសនារបស់លោកផ្ទាល់។ ការណ៍នេះហាក់ដូចជាផ្ទុយច្បាប់អាមេរិកដែលហាមយោធាចូលរួមសកម្មភាពនយោបាយពេលពាក់ឯកសណ្ឋាន។
យ៉ាងណាមិញ លោក ត្រាំ បាននិយាយការពារខ្លួនពាក់ព័ន្ធពាក្យរិះគន់នេះ។ លោកបានបង្ហោះសារលើTwitter នៅថ្ងៃទី២៨ ខែធ្នូ ថា បើទាហានក្មេងៗទាំងនោះចង់បានហត្ថលេខារបស់លោកលើមួក MAGA លោកនឹងឲ្យពួកគេ ដោយមិនបដិសេធអ្វីឡើយ។ ជុំវិញបញ្ហានេះដែរ កងទ័ពអាកាសអាមេរិកប្រចាំអឺរ៉ុបអះអាងថា វាមិនមែនជារឿងខុសឆ្គងឡើយដែលទាហានអាមេរិកយករបស់ផ្ទាល់ខ្លួនឲ្យប្រធានាធិបតីចុះហត្ថលេខាពីលើនោះ៕
Tag:
អាមេរិក
អ៊ីរ៉ាក់
ដូណាល់ ត្រាំ
© រក្សាសិទ្ធិដោយ thmeythmey.com