អន្តរជាតិ
លោកស្រី អេនជេលីណា ជូលី បង្ហាញតម្រុយចង់ឈរឈ្មោះជាប្រធានាធិបតីឆ្នាំ ២០២០
× ក្នុងបទសម្ភាសជាមួយកម្មវិធី«ថ្ងៃនេះ»របស់វិទ្យុអង់គ្លេស BBC លោកស្រី អេនជេលីណា ជូលី (Angelina Julie) បានបង្ហាញតម្រុយថា លោកស្រីអាចនឹងចូលប្រឡូកក្នុងឆាកនយោបាយ។ អ្វីដែលគួរកត់សម្កាល់ បេសកជនពិសេសអង្គការសហប្រជាជាតិរូបនេះ ក៏មិនបដិសេធដែរពីការចូលរួមប្រកួតជែងយកតំណែងប្រធានាធិបតីអាមេរិកនៅក្នុងឆ្នាំ ២០២០។
«ប្រសិនជាអ្នកសួរខ្ញុំ ២០ឆ្នាំមុន ខ្ញុំប្រហែលជាត្រូវសើច។ ខ្ញុំមិនដឹងថាខ្ញុំសក្តិសមនឹងកិច្ចការនយោបាយឬអត់ទេ។ ប៉ុន្តែមកដល់ឥឡូវ ខ្ញុំនិយាយលេងសើចថា ខ្ញុំមិនដឹងថា ខ្ញុំនៅមានរឿងត្រូវលាក់បាំងទៀតឬអត់ឡើយ»។ នេះជាការចម្លើយរបស់លោកស្រី ជូលី ពេលពិធីករ Justin Webb សួរថា លោកស្រីពិចារណាចូលធ្វើនយោបាយ ឬអត់។
ក្នុងតំណែងជាតំណាងពិសេសទីភ្នាក់ងារជនភៀសខ្លួនអង្គការសហប្រជាជាតិ លោកស្រី ជូលី ទទួលស្គាល់ថា ខ្លួនមានលទ្ធភាពធ្វើការងារនយោបាយ និងមានបទពិសោធន៍នយោបាយច្រើនដែរ។
«ខ្ញុំមានលទ្ធភាពធ្វើការងារជាមួយរដ្ឋាភិបាល ហើយខ្ញុំក៏អាចធ្វើការងារជាមួយទាហាន ហើយខ្ញុំអង្គុយនៅទីកន្លែងមួយដែលអាចធ្វើការងារបានច្រើន ដោយមិនចាំបាច់មានតំណែង មិនចាំបាច់ថាជាខ្ញុំ ឬជាគោលនយោបាយរបស់ខ្ញុំឡើយ។ ដូច្នេះ សម្រាប់ពេលនេះ ខ្ញុំនឹងរក្សាភាពស្ងៀមស្ងាត់សិន»។ លោកស្រីពន្យល់បន្ថែមដូច្នេះ។
ពេលលោកស្រី ជូលី និយាយចប់ភ្លាម លោក Webb សរុបសេចក្តីភ្លាមថា ការបកស្រាយខាងលើមានន័យថា លោកស្រីអាចស្ថិតក្នុងបញ្ជីបេក្ខជនបក្សប្រជាធិបតេយ្យសម្រាប់ការបោះឆ្នោតប្រធានាធិបតីឆ្នាំ ២០២០ បាន។ មិនបានបដិសេធទេ លោកស្រី ជូលី គ្រាន់តែតបវិញបែបស្ទាក់ស្ទើរថា៖ « អរគុណ» ហើយសើចប៉ុណ្ណោះ។
លោកស្រី ជូលី ដែលជាតារាសម្តែងហូលីវូដដ៏ល្បីលើពិភពលោកផងនោះ ត្រូវបានតែងតាំងជាតំណាងពិសេសរបស់ទីភ្នាក់ងារអង្គការសហប្រជាជាតិនៅឆ្នាំ ២០១២ ហើយលោកស្រីក៏កំពុងធ្វើការងារជាសកម្មជនដ៏សកម្មដែលធ្វើការងារលើបញ្ហាជាច្រើនក្នុងនោះមានសិទ្ធិមនុស្ស ជនភៀសខ្លួន និងហិង្សាផ្លូវភេទជាដើម៕
Tag:
អេនជេលីណា ជូលី
អាមេរិក
© រក្សាសិទ្ធិដោយ thmeythmey.com