មន្ត្រីយោធាជានខ្ពស់អាល្លឺម៉ង់បានផ្តល់យោបល់ថា បើសិនជាអាមេរិកដកកងទ័ពចេញពីអាហ្វហ្គានីស្ថាន កងទ័ពអាល្លឺម៉ង់អាចនឹងរងគ្រោះថ្នាក់។ ដូច្នេះ វាគ្មានហេតុផលអ្វីដែលអាល្លឺម៉ង់ត្រូវបន្តរក្សាកងទ័ពខ្លួននៅរដ្ឋខ្ទេចខ្ទាំដោយសារភ្លើងសង្គ្រាមអាស៊ីកណ្តាលនេះឡើយ។
ក្នុងបទសម្ភាសជាមួយសារព័ត៌មានអាល្លឺម៉ង់ Tagesspiegel នៅថ្ងៃព្រហស្បតិ៍ទី ២៧ធ្នូ អតីតនាយសេនាធិការកងទ័ពអាល្លឺម៉ង់លោក Harald Kujat បានព្រមានថាការដកទ័ពរបស់អាមេរិកពីអាហ្វហ្គានីស្ថានជារឿងគ្រោះថ្នាក់សម្រាប់អាល្លឺម៉ង់ ហើយអាល្លឺម៉ង់ប្រហែលជានឹងមិនបន្តចូលរួមប្រតិបត្តិការយោធានៅទីនោះទៀតឡើយ។
បើតាមទីភ្នាក់ងារព័ត៌មាន Press Tv អ៊ីរ៉ង់ លោក Kujat បាននិយាយដូច្នេះ៖« ប្រសិនជាអាមេរិកបន្ថយកងទ័ពដែលមានចំនួនតិចតួចកំពុងឈរជើងនៅអាហ្វហ្គានីស្ថានពិតមែននោះ វាគ្មានហេតុផលអ្វីដែលយើងត្រូវបន្តប្រតិបត្តិការទៀតឡើយ»។
អាល្លឺម៉ង់មានកងទ័ពប្រហែល ១១០០នាក់នៅអាហ្វហ្គានីស្ថាន ហើយភាគច្រើននៃកងទ័ពនេះឈរជើងនៅទីក្រុងភាគខាងជើង Mazar-i-Sharif និងជាផ្នែកមួយនៃប្រតិបត្តិការយោធារបស់បក្សសម្ព័ន្ធយោធាណាតូផង។ កងទ័ពទាំងនោះដើរតួនាទីសំខាន់ក្នុងបង្វឹក និងប្រឹក្សាយោបល់ដល់កងកម្លាំងសន្តិសុខអាហ្វហ្គានីស្ថានប្រឆាំងនឹងក្រុមភេរវជនផងដែរ។
យ៉ាងណាក៏ដោយលោក Kujat បានបន្ថែម លោករំពឹងថា សមាជិកណាតូដ៏ទៃទៀតនឹងបង្កើនវិភាគទានដើម្បីបង្គ្រាប់ចន្លោះប្រហោងនៅពេលដែលអាមេរិកដកកងទ័ពចេញនោះ។
ចុងសប្តាហ៍មុន ប្រធានាធិបតីអាមេរិកលោក ដូណាល់ ត្រាំ បានប្រកាសដកកងទ័ពអាមេរិកយ៉ាងហោចណាស់ ៥០០០ នាក់ក្នុងចំណោមទ័ព ១៤០០០នាក់ចេញពីអាហ្វហ្គានីស្ថាន ក្រោយពេលដែលលោកប្រកាសដកទ័ពទាំងស្រុង ២០០០នាក់ពីស៊ីរីដែរ។ លោកក៏សម្រេចចិត្តដកទ័ពថ្មើរជើងទាំងស្រុងពីស៊ីរីដែរ។ ការសម្រេចចិត្តរបស់លោក ត្រាំ មានការជំទាស់ពីសមាជិកគណៈរដ្ឋមន្ត្រីរបស់លោកផង និងមានការទិតៀនពីក្រុមអ្នកជំនាញសន្តិសុខដូចគ្នា។
ក្រៅពីមន្ត្រីយោធាជាន់ខ្ពស់នេះ មន្ត្រីការបរទេសអាល្លឺម៉ង់ និងអ្នកនយោបាយអាល្លឺម៉ង់ក៏បង្ហាញកង្វល់ចំពោះការប្រកាសដកកងទ័ពអាមេរិកចេញពីអាហ្វហ្គានីស្ថា ហើយក៏រិះគន់ទង្វើរបស់ប្រធានាធិបតីដូណាល់ ត្រាំដែលមិនឲ្យតម្លៃការសហការជាមួយសម្ព័ន្ធមិត្តដើម្បីដោះស្រាយបញ្ហាពិភពលោកដែរ។
រឿងដកទ័ពអាមេរិកចេញពីអាហ្វហ្គានីស្ថានឡើយដែលធ្វើឲ្យអាល្លឺម៉ង់បារម្ភក្នុងកម្រិតមធ្យមប៉ុណ្ណោះ ឯការប្រកាសពីមាត់ប្រធានាធិបតី ត្រាំ ពេលលោកទៅលួចទៅជួបកងទ័ពស្ងាត់ៗនៅអ៊ីរ៉ាក់នៅសប្តាហ៍នេះថា អាមេរិកនឹងលែងជាតម្រួតពិភពលោកនោះទើបធ្វើឲ្យអាល្លឺម៉ង់បារម្ភខ្លាំង។ ប្រធានគណៈកម្មការការបរទេសនៃសភាអាល្លឺម៉ង់ Norbert Rottgen បានទាត់ចោលសម្តីរបស់លោក ត្រាំ ហើយអះអាងថា អាមេរិកជាមហាអំណាចដែលមិនអាចជំនួសបាន និងមានតួនាទីសំខាន់បំផុតក្នុងការរក្សាសណ្តាប់ធ្នាប់ សន្តិសុខ ស្ថិរភាព ការទូត និងតុល្យភាពអំណាចពិភពលោកដែរ៕