អន្តរជាតិ
ប្រធានាធិបតីវៀតណាម ក្រើនរម្លឹកពលរដ្ឋ និងមន្ត្រីកុំត្រេកត្រអរហួសនឹងការលូតលាស់នៃសេដ្ឋកិច្ច
× រដ្ឋាភិបាលក្រុងហាណូយ បានទទួលស្គាល់ថា សេដ្ឋកិច្ចវៀតណាម មានការអភិវឌ្ឍ និងរីកចម្រើនគួរសម្គាល់ក្នុងឆ្នាំ២០១៨ ក៏ប៉ុន្តែ ក្រុងហាណូយ មិនចង់ឲ្យមន្ត្រី និងប្រជាជនខ្លួន ត្រេកត្រអាលខ្លាំងពេកជាមួយនឹងស្ថានភាពមួយនេះ។ ក្រុងហាណូយ ចង់ឲ្យភាគីពាក់ព័ន្ធត្រៀមខ្លួនសម្រាប់បញ្ហាប្រឈម និងផលលំបាកក្នុងវិស័យសេដ្ឋកិច្ច ដែលអាចបង្កពីសង្គ្រាមពាណិជ្ជកម្ម។
លោកប្រធានាធិបតីវៀតណាម Nguyễn Phú Trọng នៅថ្ងៃ២៨ ធ្នូ តាមរយៈកិច្ចប្រជុំរដ្ឋាភិបាលជាមួយនឹងប្រជាជនតាមតំបន់ បានកត់សម្គាល់ថា ការអភិវឌ្ឍសង្គម-សេដ្ឋកិច្ចរបស់វៀតណាមក្នុងឆ្នាំ២០១៨ ប្រកបដោយជោគជ័យខ្ពស់ ក៏ប៉ុន្តែលោកប្រធានាធិបតី អះអាងថា នេះ នៅមិនទាន់គ្រប់គ្រាន់ នៅឡើយនោះទេសម្រាប់ការអភិវឌ្ឍជាតិនាសម័យកាលបច្ចុប្បន្ន។ នេះបើយោងតាម Vietnam News។
លោកប្រធានាធិបតី និងអគ្គលេខាធិការបក្សកុម្មុយនីស្តវៀតណាមផងដែរនោះ បានលើកឡើងថា វៀតណាម នៅមានបញ្ហាប្រឈមជាច្រើន ដែលអាចបង្កមកពីការវិវត្តដែលមិនអាចព្យាករបានក្នុងតំបន់ និងសកល ក៏ដូចជា ហានិភ័យរបស់សេដ្ឋកិច្ចពិភពលោក ជាពិសេសនោះ លើវិស័យហិរញ្ញវត្ថុ រូបិយវត្ថុ និងការនាំចេញ ដែលប៉ះពាល់មកពីសង្គ្រាមពាណិជ្ជកម្មរបស់មហាអំណាច ។
បន្ថែមពីការក្រើនរម្លឹកពីការមិនត្រេកត្រអាលពេកទៅនឹងសមិទ្ធផលរបស់ខ្លួនបច្ចុប្បន្ន ប្រមុខរដ្ឋវៀតណាមរូបនេះ ក៏បានគូសបញ្ជាក់ពីការងារចម្បងក្នុងឆ្នាំ២០១៩ ដែលជាបេសកកម្មអភិវឌ្ឍជាតិ រួមមាន ការធ្វើឲ្យម៉ាក្រូសេដ្ឋកិច្ចវៀតណាមកាន់តែរឹងមាំ, គ្រប់គ្រងឲ្យបាននូវកម្រិតអតិផរណា និងធ្វើឲ្យល្អប្រសើរលើសមត្ថភាពក្នុងការឆ្លើយតបទៅលើការអភិវឌ្ឍទីផ្សារ។
ការរក្សាល្បើន នៃកំណើន និងគុណភាព តាមរយៈការបង្កើនបរិយាកាសវិនិយោគ និងធុរកិច្ច និងជំរុញការប្រកួតប្រជែង គុណភាព ប្រសិទ្ធភាព បរិមាណក្នុងសេដ្ឋកិច្ច ក៏ជាចំណុចអាទិភាព ដែលរដ្ឋាភិបាលវៀតណាម ដាក់ក្នុងគោលនយោបាយជាតិឆ្នាំ២០១៩ផងដែរ។
គួរជម្រាបផងដែរថា ថ្មីៗនេះ វៀតណាម ទទួលបានការវាយតម្លៃខ្ពស់ពីអ្នកជំនាញសេដ្ឋកិច្ចស្តីពីកំណើនសេដ្ឋកិច្ច ដែលមានការលេចធ្លោក្នុងចំណោមបណ្តាប្រទេសក្នុងតំបន់។ កំណើនរបស់វៀតណាម ក៏បានក្លាយជាគំរូមួយដល់ប្រទេសផ្សេងដូចជាកូរ៉េខាងជើង មករៀនសូត្រតាម ខណៈម៉ាឡេស៊ី ក៏ព្រមានពលរដ្ឋខ្លួនឲ្យប្រឹងប្រែងដូចពលរដ្ឋវៀតណាម បើមិនចង់ឲ្យវៀតណាម វ៉ាខ្លួនតាមរយៈកំណើន និងទំហំសេដ្ឋកិច្ច៕
Tag:
វៀតណាម
សេដ្ឋកិច្ច
Ngyen Phu Trong
© រក្សាសិទ្ធិដោយ thmeythmey.com