ជប៉ុន ត្រៀមពិគ្រោះជាមួយពលរដ្ឋខ្លួនមុនបើកទ្វារទទួលពលករបរទេស ដើម្បីការពារប្រយោជន៍ក្នុងស្រុក

អន្តរជាតិ

ជប៉ុន ត្រៀមពិគ្រោះជាមួយពលរដ្ឋខ្លួនមុនបើកទ្វារទទួលពលករបរទេស ដើម្បីការពារប្រយោជន៍ក្នុងស្រុក

30, Dec 2018 , 10:19 pm

រូបភាព

ដោយ:

រដ្ឋាភិបាលក្រុងតូក្យូ ត្រៀមរៀបចំវេទិកាពិគ្រោះយោបល់ជាមួយនឹងប្រជាពលរដ្ឋខ្លួនស្តីពីបទបញ្ញត្តិថ្មីសម្រាប់គ្រប់គ្រងពលករបរទេសដែលចូលមកបម្រើការនៅជប៉ុន។ ផែនការរបស់ក្រុងតូក្យូ ធ្វើឡើងថា ដើម្បីធានាមិនឲ្យប៉ះពាល់ដល់ផលប្រយោជន៍របស់ប្រជាជនក្នុងស្រុក ខណៈឆ្នាំ២០១៩ ខាងមុខ ជប៉ុន ក៏គ្រោងបើកទ្វារទទួលកម្មករបរទេសផងនោះ។

បើមិនមានការប្រែប្រួលនោះទេ នៅខែមេសា ឆ្នាំ២០១៩ខាងមុខ ជប៉ុន នឹងចាប់ផ្តើមបើកចំហរទ្វារសម្រាប់កម្មករបរទេស ឬជនអន្តោប្រវេសន៍រាប់ពាន់នាក់មកធ្វើការងារក្នុងប្រទេសខ្លួនដែលកំពុងតែប្រឈមនឹងកង្វះខាតកម្លាំងពលកម្ម។ ឯប្រជាជនក្នុងស្រុកភាគច្រើន គឺជាបុគ្គលិកបច្ចេកជាន់ខ្ពស់។

គម្រោងនេះទើបតែត្រូវបាន សភាជប៉ុន ពិនិត្យឡើងវិញ និងសម្រេចតាមរយៈការបង្កើតបទបញ្ញត្តិថ្មី ដែលបានអនុញ្ញាតលើទិដ្ឋាការដល់ជនអន្តោប្រវេសន៍រហូតដល់ជាង៣០ម៉ឺននាក់។ បទបញ្ញត្តិនេះ បានក្លាយជាក្តីបារម្ភមួយសម្រាប់ប្រជាជនក្នុងស្រុក ពិសេសពាក់ព័ន្ធនឹងកម្លាំងពលកម្ម និងបទល្មើសនានា ដែលអាចកើតតាមរយៈលំហូរពលកម្មនេះ។

ប៉ុន្តែ មុនពេលបទបញ្ញត្តិថ្មីនេះចូលធរមានចាប់ពីខែមេសា ឆ្នាំ២០១៩តទៅ រដ្ឋមន្ត្រីក្រសួងយុត្តិធម៌ជប៉ុន Takashi Yamashita បានប្រកាសបើកទ្វារទទួលការផ្តល់យោបល់ពីសំណាក់សាធារណជន ដើម្បីធ្វើឲ្យដំណើរការនេះអាចធ្វើទៅបានគ្រប់ជ្រុងជ្រោយ ទាំងលើផ្នែកប្រាក់ឈ្នួល និងលក្ខខណ្ឌការងារ។ នេះបើយោងតាមការចុះផ្សាយរបស់សារ Japan Times ។

តាមប្រភពព័ត៌មានដដែលនោះ កន្លងមក កម្មករបរទេសដែលមានចេតនាទៅធ្វើការនៅក្នុងប្រទេសជប៉ុនបានផ្តល់កម្រៃក្រៅផ្លូវការចំនួនណាមួយទៅកាន់អ្នករត់ការដើម្បីទទួលបានឱកាសនេះ។ ក៏ប៉ុន្តែក្នុងបទបញ្ញត្តិថ្មីដែលទើបតែអនុម័ត បើបុគ្គលណាមួយរកឃើញមានករណីបែបនេះកើតឡើងមែន នោះ គេមិនទទួលបានឱកាសទៀតឡើយ។

តាម Japan Times គម្រោងប្រាំឆ្នាំរបស់ជប៉ុន ដែលទើបតែអនុម័តនេះ នឹងបើកទ្វារទទួលស្វាគមន៍ដល់កម្មករបរទេសឲ្យចូលទៅបម្រើការក្នុងវិស័យឧស្សាហកម្ម១៤ប្រភេទ ដែលរួមមានទាំង ការថែទាំ, អ្នកយាម, បដិសណ្ឋារកិច្ច និងវិស័យកសិកម្មនិងសេវាកម្មលើកម្ហូបដើម៕