លោក អូបាម៉ា និងភរិយាបានចំណាត់ថ្នាក់លេខមួយជា «បុរស និងស្ត្រីគួរឲ្យកោតសរសើរជាងគេ» ឆ្នាំ២០១៨

អន្តរជាតិ

លោក អូបាម៉ា និងភរិយាបានចំណាត់ថ្នាក់លេខមួយជា «បុរស និងស្ត្រីគួរឲ្យកោតសរសើរជាងគេ» ឆ្នាំ២០១៨

31, Dec 2018 , 8:39 am

រូបភាព

ដោយ: ថ្មីៗ

លោកស្រី មីឆែល អូបាម៉ា (Michelle Obama) ជាប់ឈ្មោះជាស្ត្រីគួរឲ្យកោតសរសើរបំផុត ខណៈស្វាមីលោកស្រី បារ៉ាក់ អូបាម៉ា ក៏ជាប់ឈ្មោះជាបុរសដែលគួរឲ្យកោតសរសើរប្រចាំឆ្នាំ ២០១៨ដែរ។ នេះបើតាមការស្ទង់មតិរបស់ Gallup Poll ចេញផ្សាយនៅសប្តាហ៍នេះ។

ការឈានមកកាន់តំណែងលេខរៀងទីមួយជា«ស្ត្រីគួរឲ្យកោតសរសើរ» របស់អតីតស្រី្តទីមួយ មីឆែល អូបាម៉ា នេះគឺជំនួសលោកស្រី ហ៊ីឡារី គ្លីនតុន ដែលធ្លាប់ជារដ្ឋមន្ត្រីការបរទេសផង ស្ត្រីទីមួយផង និងជាបេក្ខជនប្រធានាធិបតីផង។ គ្លីនតុនធ្លាក់ទៅលេខរៀងទីបី ហើយចំណាត់ថ្នាក់ទីពីរបានទៅលោកស្រី Oprah Winfrey ដែលជាតារាសម្តែងនិងដឹកនាំកម្មវិធី The Oprah Winfrey Show ។

លោកស្រី គ្លីនតុន បានកាន់កាប់លេខរៀងមួយទីមួយរយៈពេល ១៧ឆ្នាំជាប់គ្នា ហើយលោកស្រីជាមនុស្សតែម្នាក់គត់ដែលស្ថិតក្នុងក្នុងលំដាប់ថ្នាក់ខ្ពស់ជាងគេ ២២ដងមកហើយ។ ប៉ុន្តែបើតាម Gallup ការប្រែប្រួលចំណាត់ថ្នាក់នៅឆ្នាំនេះគឺដោយសារលោកស្រី គ្លីនតុនចាប់ផ្តើមដកខ្លួននិងចំណាយពេលវេលាឯកជនច្រើន។

ឯលោកស្រី មីឆែល ចាប់ផ្តើមចេញមុខកាន់តែខ្លាំងក្នុងសកម្មភាពសាធារណៈ និងជជែកវែកញែកដោយចំហពីជីវិត និងបញ្ហានយោបាយបច្ចុប្បន្នង។ សៀវភៅ Becoming របស់លោកស្រីក៏ក្លាយជាសៀវភៅលក់ដាច់និងពេញនិយមបំផុតប្រចាំឆ្នាំដែរ។

ដោយឡែក ស្វាមីលោកស្រី មីឆែល គឺលោក បារ៉ាក់អូបាម៉ា វិញ ក៏ស្ថិតនៅលេខរៀងទីមួយដែរសម្រាប់បុរសដែលគួរឲ្យកោតសរសើរបំផុតនៅឆ្នាំ ២០១៨។ លោកស្ថិតនៅចំណាត់ថ្នាក់ទីមួយនេះអស់រយៈពេលដប់មួយឆ្នាំជាប់ៗគ្នាមកហើយ។

ចំណែកប្រធានាធិបតីបច្ចុប្បន្នលោក ដូណាល់ ត្រាំ ស្ថិតនៅចំណាត់ថ្នាក់ទីពីរ ហើយលោក ចច ដាប៊ិលយូប៊ូស ស្ថិតនៅចំណាត់ទីបី។ អតីតប្រធានាធិបតី ប៊ីល គ្លីនតុន ឯណោះវិញគឺស្ថិតនៅចំណាត់ថ្នាក់ទីប្រាំពីរឯណោះ។

សូមបញ្ជាក់ថា របាយការណ៍ស្ទង់មតិ Gallup Poll ត្រូវបានរៀបចំឡើងរៀងរាល់ឆ្នាំចាប់ពីឆ្នាំ ១៩៤៦មក។ ការស្ទង់មតិនេះធ្វើឡើងដោយការសួរសំណួរបើកទៅកាន់អ្នកចូលរួមថា តើស្ត្រី ឬបុរសណាមួយនៅលើពិភពលោកដែលពួកគេកោតសរសើរខ្លាំងជាងគេ៕