ភ្នាក់ងារទេសចរណ៍កូរ៉េខាងជើង អំពាវនាវទេសចរបរទេសទៅកម្សាន្តនៅប្រទេសខ្លួនឱកាសចូលឆ្នាំសកល

អន្តរជាតិ

ភ្នាក់ងារទេសចរណ៍កូរ៉េខាងជើង អំពាវនាវទេសចរបរទេសទៅកម្សាន្តនៅប្រទេសខ្លួនឱកាសចូលឆ្នាំសកល

31, Dec 2018 , 3:30 pm

រូបភាព

ដោយ:

ខណៈរដ្ឋាភិបាលកូរ៉េខាងជើង កំពុងតែបន្តបើកចិត្ត និងបេះដូងផ្សារភ្ជាប់ខ្លួនជាមួយនឹងសហគមន៍អន្តរជាតិ ភ្នាក់ងារទេសចរណ៍រដ្ឋកូរ៉េខាងជើង ក៏បានអំពាវនាវដល់ភ្ញៀវទេសចរបរទេសឲ្យទៅកម្សាន្តនៅក្នុងប្រទសខ្លួន ជាពិសេសក្នុងថ្ងៃចូលឆ្នាំសកលជាមួយនឹងការរៀបចំកម្មវិធីពិសេសៗ។

ភ្នាក់ងារទេសចរណ៍រដ្ឋកូរ៉េខាងជើង នៅថ្ងៃ៣០ ធ្នូ បានចេញផ្សាយកម្មវិធីទេសចរណ៍មួយ ដោយបានផ្សព្វផ្សាយឲ្យភ្ញៀវទេសចរបទេសចូលទៅធ្វើដំណើរកម្សាន្តនៅក្នុងប្រទេសខ្លួន នាឱកាសនៃការប្រារព្ធពិធីបុណ្យឆ្លងឆ្នាំសកល។ នេះបើយោងតាមការចុះផ្សាយរបស់ភ្នាក់ងារព័ត៌មាន Yonhap។

តាមប្រភពព័ត៌មានដដែលនោះ កម្មវិធីទេសចរណ៍កម្សាន្តដែលរៀបចំដោយភ្នាក់ងាររដ្ឋកូរ៉េខាងជើង នឹងធ្វើឡើងក្នុងក្រុងព្យុងយ៉ាង និងតំបន់ទេសចរណ៍ដែលមានភាពទាក់ទាញរបស់ប្រទេសរួមទាំងវិមានគីម អ៊ីលស៊ុង។ កម្មវិធីនេះដែរ នឹងត្រូវប្រព្រឹត្តឡើងចាប់ពីថ្ងៃ២៩ ធ្នូ ដល់ថ្ងៃទី៥ មករា ឆ្នាំ២០១៩។

សម្រាប់ Yonhap ដែលជាភ្នាក់ងារព័ត៌មានតាមដានព្រឹត្តិការណ៍កូរ៉េខាងជើងច្រើនបំផុតនោះ នេះ គឺជារឿងដ៏កម្រមួយហើយ ដែលភ្នាក់ងារទេសចរណ៍រដ្ឋកូរ៉េខាងជើង ផ្សព្វផ្សាយពាណិជ្ជម្មពីកម្មវិធីឆ្លងឆ្នាំ ដោយដាក់គោលដៅទៅលើភ្ញៀវបរទេស។ នេះ ហាក់បង្ហាញថា កូរ៉េខាងជើង ព្យាយាមធ្វើឲ្យមានលំហូរនៃរូបិយវត្ថុអន្តរជាតិ ខណៈដែលប្រទេស ស្ថិតនៅក្នុងដំណាក់កាលទណ្ឌកម្មសេដ្ឋកិច្ចធ្ងន់ធ្ងរ។

សូមជម្រាបផងដែរថា ឆ្នាំ២០១៨ ត្រូវបានចាត់ទុកថា ជាព្រឹត្តិការណ៍ពិសេសមួយសម្រាប់កូរ៉េខាងជើង និងសហគមន៍អន្តរជាតិ។ នោះ ក៏ព្រោះតែកូរ៉េខាងជើង បានងាកមកផ្សារភ្ជាប់ជាមួយនឹងសហគមន៍អន្តរជាតិ និងជាពិសេសនោះ បានប្តេជ្ញាចិត្តក្នុងការបញ្ឈប់អភិវឌ្ឍកម្មវិធីនុយក្លេអ៊ែរទៀតផង។

ប៉ុន្មានឆ្នាំចុងក្រោយនេះ កូរ៉េខាងជើង ត្រូវបានក្រុមប្រឹក្សាសន្តិសុខរបស់អង្គការសហប្រជាជាតិដាក់ទណ្ឌកម្មជាបន្តបន្ទាប់ ក្នុងគោលដៅបំបិទប្រភពសេដ្ឋកិច្ចដើម្បីទ្រទ្រង់រដ្ឋាភិបាលកូរ៉េខាងជើង ដែលបានបំពាននឹងបម្រាមរបស់សហគមន៍អន្តរជាតិក្នុងការបាញ់សាកល្បងអាវុធនុយក្លេអ៊ែរម្តងហើយម្តងទៀត៕