បោះឆ្នោត៖ អាសនៈគ្រប់ជាន់ថ្នាក់ កើនចំនួនជាបន្តបន្ទាប់

ជាតិ

នយោបាយជាតិ

បោះឆ្នោត៖ អាសនៈគ្រប់ជាន់ថ្នាក់ កើនចំនួនជាបន្តបន្ទាប់

02, Jan 2019 , 8:59 pm

រូបភាព

ដោយ: ថ្មីៗ

អាសនៈសម្រាប់អ្នកតំណាងឲ្យប្រជាពលរដ្ឋខ្មែរ មាន៤កន្លែង គឺអាសនៈក្នុងព្រឹទ្ធសភា អាសនៈក្នុងរដ្ឋសភា អាសនៈនៅរាជធានី ខេត្ត ក្រុង ខណ្ឌ ស្រុក និងអាសនៈនៅឃុំ-សង្កាត់។ អាសនៈទាំងអស់នេះ បានកើនឡើង ពីមួយអាណត្តិទៅមួយអាណត្តិ។

អាសនៈព្រឹទ្ធសភា ក្នុងនីតីកាល៣ មានអាសនៈ៦១ ហើយត្រូវបន្ថែមទៅជា៦២ ក្នុងនីតិកាលទី៤នេះ។ ក្នុងចំណោមសមាជិកព្រឹទ្ធសភាទាំង៦២រូប ៥៨រូប ដែលកើតចេញពីការបោះឆ្នោត គឺមកពីគណបក្សប្រជាជនកម្ពុជា។ សមាជិក២នាក់ ត្រូវបានតែងតាំងដោយព្រះមហាក្សត្រ និង២នាក់ទៀត ដែលមកពីគណបក្សហ្វ៊ុនស៊ិនប៉ិច ត្រូវបានជ្រើសតាំងដោយរដ្ឋសភា។

ចំណែក រដ្ឋសភា ដែលមានអាសនៈ១២៣ក្នុងនីតិកាលទី៥ ត្រូវកើនឡើងដល់១២៥ ក្នុងនីតិកាលទី៦។ សម្រាប់នីតិកាលទី៦ អាសនៈរដ្ឋសភាទាំងអស់ ជារបស់គណបក្សប្រជាជនកម្ពុជា។

រីឯ អាសនៈក្រុមប្រឹក្សាឃុំ-សង្កាត់ ក្នុងអាណត្តិទី៣ មាន១១,៤៥៩ ហើយក្នុងអាណត្តិទី៤ មាន១១,៥៧២ ដោយកើនឡើង១១៣បន្ថែមទៀត។

ចុងក្រោយ អាសនៈដែលគ្រោងបង្កើននោះ គឺអាសនៈក្រុមប្រឹក្សារាជធានី ខេត្ត ក្រុង ស្រុក ខណ្ឌ ដែលនិយាយជាទូទៅថា ក្រុមប្រឹក្សា។ ក្នុងអាណត្តិទី២នេះ អាសនៈក្រុមប្រឹក្សារាជធានី ខេត្ត មាន៣៩៣ ឯអាសនៈក្រុមប្រឹក្សាក្រុង ស្រុក ខណ្ឌ មាន២៩៣១។

នៅថ្ងៃទី៣ ខែមករា ឆ្នាំ២០១៩ រដ្ឋសភា នឹងបើកកិច្ចប្រជុំពេញអង្គ ដើម្បីអនុម័តវិសោធនកម្មច្បាប់ ស្តីពីការបង្កើនអាសនៈក្រុមប្រឹក្សា សម្រាប់អាណត្តិទី៣។ ការធ្វើវិសោធនកម្មនេះ គឺកើតឡើងក្រោយការប្រកាសរបស់ប្រមុខរដ្ឋាភិបាល។

យ៉ាងណាក៏ដោយ ការបន្ថែមអាសនៈថ្មីប៉ុន្មាន សម្រាប់ក្រុមប្រឹក្សា នៅមិនទាន់មានព័ត៌មាននោះទេ។ លោក ឡេង ប៉េងឡុង អ្នកនាំពាក្យរដ្ឋសភា ប្រាប់សារព័ត៌មានថ្មីៗតាមទូរសព្ទថា លុះត្រាតែច្បាប់ ត្រូវបានអនុម័តជាមុនសិន ទើបអាចដឹងបានពីបញ្ហានេះ។

ការបោះឆ្នោតក្រុមប្រឹក្សាអាណត្តិទី៣ នឹងប្រព្រឹត្តទៅនៅថ្ងៃទី២៦ ខែឧសភា ឆ្នាំ២០១៩។ ប្រមុខរដ្ឋាភិបាល ជាអ្នកចេញអនុក្រឹត្យស្តីពីការកំណត់ចំនួនអាសនៈ។

លោក មាស នី អ្នកសិក្សាពីបញ្ហាសង្គម និងជាអ្នកតាមដានស្ថានការណ៍នយោបាយ ដូចជាមិនសូវពេញចិត្តប៉ុន្មានទេ ចំពោះការបង្កើនអាសនៈទាំងនោះ។ លោក យល់ឃើញថា បើការបង្កើនអាសនៈ គ្រាន់តែដើម្បីរកកន្លែងឲ្យសមាជិកបក្សនោះ ប្រសិទ្ធភាពការងារ នៅតែមិនមាន។

តាមរយៈសារព័ត៌មានថ្មីៗ អ្នកវិភាគរូបនេះ បានលើកឡើងយ៉ាងដូច្នេះថា៖«បើយើងចេះតែបង្កើន ដោយគ្មានការសិក្សាស្រាវជ្រាវឲ្យបានច្បាស់ជាមុនទេ វា នឹងចំណាយថវិកាជាតិកាន់តែធំ ហើយប្រព័ន្ធគ្រប់រដ្ឋ នៅតែខ្សោយដដែល»។

លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) ចាត់ទុកការលើកឡើងរបស់អ្នកវិភាគ ថាគ្រាន់តែជាទស្សនៈបុគ្គលប៉ុណ្ណោះ។ លោក បញ្ជាក់ប្រាប់សារព័ត៌មានថ្មីៗបែបនេះថា៖«ការបង្កើនអាសនៈ គឺតម្រូវទៅតាមការកើនឡើងនូវចំនួនប្រជាជន»។

អាសនៈទាំង៤កន្លែង ត្រូវបានគ្រប់គ្រងដោយគណបក្សប្រជាជនកម្ពុជា ស្ទើរតែទាំងអស់។ ការបោះឆ្នោតព្រឹទ្ធសភានីតិកាលទី៤ និង ការបោះឆ្នោតរដ្ឋសភានីតិកាលទី៦ ដែលគ្មានអតីតគណបក្សសង្គ្រោះជាតិចូលរួម ធ្វើឲ្យគណបក្សប្រជាជនកម្ពុជា ទទួលបានអាសនៈទាំងអស់ក្នុងស្ថាប័ននីតិបញ្ញត្តិទាំង២នេះ។

កាលពីមិនទាន់ត្រូវបានរំលាយ គណបក្សសង្គ្រោះជាតិ បានកាន់កាប់អាសនៈ ប្រហាក់ប្រហែលនឹងគណបក្សប្រជាជនកម្ពុជាដែរ។ ប៉ុន្តែ ក្រោយរងការរំលាយ អាសនៈរបស់អតីតគណបក្សសង្គ្រោះជាតិនៅគ្រប់លំដាប់ថ្នាក់ ត្រូវយកទៅបែងចែកឲ្យគណបក្សដទៃ ដោយគណបក្សប្រជាជនកម្ពុជា ទទួលបានច្រើនជាងគេ៕