អន្តរជាតិ
ឆ្នាំ២០១៩ យោធាចិន ដាក់ផែនការបង្កើនការហ្វឹកហាត់និងត្រៀមលក្ខណៈធ្វើសង្គ្រាម
×![]()
ការត្រៀមលក្ខណៈសម្រាប់ធ្វើសង្គ្រាម និងបង្កើនការហ្វឹកហ្វឹន គឺជាគោលដៅអាទិភាពបំផុតមួយ សម្រាប់យោធាចិន នាឆ្នាំ២០១៩នេះ។ នេះបើយោងតាមការចុះផ្សាយរបស់កាសែតផ្លូវការរបស់កងទ័ពរំដោះប្រជាជនចិន (PLA Daily) នៅថ្ងៃអង្គារ ទី០១ ខែមករា ឆ្នាំ២០១៩។
នៅដើមឆ្នាំ២០១៩នេះ កាសែតយោធាចិន PLA Daily បានគូសបញ្ជាក់នៅក្នុងអត្ថបទវិចារណកថា ថា៖ «ការហ្វឹកហ្វឹនរបស់កងទ័ព និងការត្រៀមលក្ខណៈសម្រាប់ធ្វើសង្គ្រាម គឺជាការងារដ៏ចាំបាច់ និងជាគោលដៅអាទិភាពបំផុតសម្រាប់យោធាចិន។ យើងមិនត្រូវបណ្តែតបណ្តោយឲ្យមានចន្លោះប្រហោងណាមួយកើតឡើងនៅក្នុងផ្នែកទាំងនេះឡើយ»។
«យើងគួរតែត្រៀមលក្ខណៈឲ្យល្អបំផុត សម្រាប់កិច្ចខិតខំប្រឹងប្រែងរបស់យោធាចិន នៅគ្រប់ផ្នែកទាំងអស់ ព្រមទាំងពង្រឹងឲ្យបានគ្រប់ជ្រុងជ្រោយលើសមត្ថភាពប្រយុទ្ធរបស់កងទ័ពយើង ដើម្បីប្រឆាំងទៅនឹងបញ្ហាអាសន្ននានា…ក្នុងគោលដៅធានាថា យើងអាចប្រឈមមុខនឹងបញ្ហាទាំងឡាយ ហើយអាចយកជ័យជម្នះគ្រប់ស្ថានការណ៍ទាំងអស់»។ នេះបើយោងតាមអត្ថបទវិចារណកថាដដែលនេះ។
ក្រៅពីការបង្កើនការហ្វឹកហាត់ និងត្រៀមលក្ខណៈធ្វើសង្គ្រាម ក៏មានផងដែរអាទិភាពផ្សេងៗទៀតមានដូចជា ការដាក់ចេញ និងអនុវត្តផែនការដ៏លម្អិតក្នុងគោលដៅដើម្បីអភិវឌ្ឍសមត្ថភាពយោធា, ជំរុញការធ្វើកំណែទម្រង់និងនវានុត្តន៍ ហើយនិងការពង្រឹងស្មារតីក្រុមនៅក្នុងកងទ័ពរំដោះប្រជាជនចិនផងដែរ។
ប្រធានាធិបតីចិន ស៊ី ជិនភីង ដែលជាអគ្គមេបញ្ជាកាកងទ័ពចិនផងដែរនោះ បានជំរុញឲ្យកងទ័ពចិនរំដោះប្រជាជនចិន ប្រឹងប្រែងពង្រឹងសមត្ថភាពប្រយុទ្ធរបស់ខ្លួន ចាប់តាំងពីលោកបានក្តោបក្តាប់អំណាច កាលពីចុងឆ្នាំ២០១២មកម្ល៉េះ។ ត្រង់ចំណុចនេះ អ្នកជំនាញយល់ឃើញថា ការបង្កើនលំហាត់ហ្វឹកហ្វឹនរបស់ចិន គឺមានគោលបំណងដើម្បីបង្ហាញសាច់ដុំរបស់យោធាចិន ខណៈខ្លួនកំពុងមានភាពតានតឹងស្រាប់ជាមួយក្រុងវ៉ាស៊ីនតោន នៅក្នុងសមុទ្រតៃវ៉ាន់ និងសមុទ្រចិនខាងត្បូង។
យោងតាមសារព័ត៌មានហុងកុង South China Morning Post អតីតអនុរដ្ឋមន្ត្រីការពារជាតិតៃវ៉ាន់ លោក Lin Chong-Pin បានគូសបញ្ជាក់ថា ការដាក់ចេញផែនការថ្មីនេះគឺដើម្បីបង្ហាញពីកម្លាំងដ៏ខ្លាំងក្លារបស់យោធាចិន ទៅដល់គូរប្រជែងរបស់ខ្លួនជាពិសេស សហរដ្ឋអាមេរិក ក្នុងគោលដៅចង់ឲ្យក្រុងវ៉ាស៊ីនតោនងាកមករកផ្លូវដោះស្រាយតាមបែបការទូតវិញ ព្រោះបើមិនដូច្នោះទេ ផលវិបាកនឹងកើតឡើងកាន់តែធំ បើសិនមហាអំណាចយោធាទាំងពីរនេះ ផ្ទុះជម្លោះយោធាជាមួយគ្នានោះ៕
Tag:
ចិន
យោធាចិន
© រក្សាសិទ្ធិដោយ thmeythmey.com
