អន្តរជាតិ
×![]()
ថ្លែងនៅក្នុងសារអបអរសាទរខួប៤០ឆ្នាំ នៃទំនាក់ទំនងការទូតរវាងសហរដ្ឋអាមេរិក និងចិន នៅថ្ងៃទី០១ ខែមករា ប្រធានាធិបតីចិន ស៊ី ជិនភីង បានប្រាប់សមភាគីអាមេរិក ដូណាល់ ត្រាំ បែបនេះថា ប្រវត្តិសាស្ត្របង្ហាញថា កិច្ចសហប្រតិបត្តិការជាជម្រើសដ៏ល្អបំផុតសម្រាប់ប្រទេសទាំងពីរ។ ជាមួយគ្នានេះ លោកបានបញ្ជាក់ទៀតថា ឆ្នាំ២០១៩ នឹងពាំនាំយកនូវកាលានុវត្តភាព និងបញ្ហាប្រឈមជាច្រើនទៅដល់ពិភពលោក។
នៅក្នុងសារផ្ញើទៅកាន់លោក ត្រាំ នៅថ្ងៃអង្គារ ប្រធានាធិបតីចិន ស៊ី ជិនភីង បានគូសបញ្ជាក់ថា ទំនាក់ទំនងរវាងសហរដ្ឋអាមេរិកនិងចិន មានឡើង និងមានចុះ ហើយក៏បានបង្កើតដំណើរការទៅមុខជាប្រវត្តិសាស្ត្រជាច្រើនផងដែរ ក្នុងរយៈពេលបួនទសវត្សរ៍មកនេះ។
យោងតាមទីភ្នាក់ងារព័ត៌មានចិន Xinhua លោកបានបន្ថែមទៀតថា ការណ៍នេះបានផ្តល់ផលប្រយោជន៍យ៉ាងធំធេងដល់ប្រជាជនរបស់ប្រទេសទាំងពីរ ហើយព្រមទាំងបានផ្តល់វិភាគទានយ៉ាងច្រើនក្រៃលែងដល់សន្តិភាព, ស្ថិរភាព និងវិបុលភាពពិភពលោកថែមទៀតផង។
ទន្ទឹមនឹងគ្នានេះ មេដឹកនាំចិនដ៏មានឥទ្ធិពលរូបនេះ បានគូសបញ្ជាក់ទៀតថា ក្នុងឆ្នាំ២០១៨ ចិនបានជំរុញឲ្យមានវិធានដ៏សំខាន់សម្រាប់ធ្វើកំណែទម្រង់ដល់ទៅជាង ១០០ ឯណោះ។ លោកបានលើកឡើងបែបនេះ៖ «ជំហាននៃកំណែទម្រង់របស់យើងនឹងទៅមុខជានិច្ច ហើយទ្វារសេដ្ឋកិច្ចរបស់យើងនឹងបើកចំហកាន់តែធំទូលាយជាងមុន»។
បច្ចុប្បន្ននេះ សហរដ្ឋអាមេរិក និងចិន កំពុងផ្អាកសង្គ្រាមពាណិជ្ជកម្មសិន។ គោលបំណងនៃការបង្កើតបទឈប់បាញ់រយៈពេល៩០ថ្ងៃ ដែលបានចាប់ផ្តើមកាលពីដើមខែធ្នូកន្លងមកនោះ គឺដើម្បីទុកពេលសម្រាប់ការចរចារវាងរកច្រកចេញពីបញ្ហាជម្លោះពាណិជ្ជកម្មដ៏តានតឹងមួយនេះ។
ត្រឡប់មកវិញ នៅក្នុងសារអបអរសាទរដដែលនេះ ទោះបីលោក ស៊ី ជិនភីង ពុំបានលើកឡើងឲ្យចំពីសង្គ្រាមពាណិជ្ជកម្មជាមួយ អាមេរិកក្តី ប៉ុន្តែលោកបានសង្កត់ធ្ងន់ថា ឆ្នាំ២០១៩ នឹងពាំនាំយកនូវកាលានុវត្តភាពនិងបញ្ហាប្រឈមជាច្រើន។ «ខណៈយើងបើកភ្នែក សម្លឹងទៅកាន់ពិភពលោក យើងនឹងឃើញការផ្លាស់ប្តូរដ៏ធំធេង…ហើយវាជាការផ្លាស់ប្តូរ ដែលយើងពុំធ្លាប់បានឃើញពីមុនមក នារយៈពេល១០០ឆ្នាំចុងក្រោយនេះ»។
«បើទោះបីជាស្ថានការណ៍អន្តរជាតិផ្លាស់ប្តូរបែបណាក៏ដោយ ទំនុកចិត្ត និងការសម្រេចចិត្តចុងក្រោយរបស់ចិនក្នុងការការពារសន្តិសុខ និងអធិបតេយ្យភាពជាតិ នឹងពុំផ្លាស់ប្តូរនោះឡើយ។ ហើយម្យ៉ាងវិញទៀត សុច្ឆន្ទៈ និងសេចក្តីស្មោះត្រង់របស់ចិនសម្រាប់រក្សាសន្តិភាពពិភពលោក និងលើកកម្ពស់ការអភិវឌ្ឍន៍រួម ក៏នឹងមិនផ្លាស់ប្តូរផងដែរ»។ នេះជាបកស្រាយបន្ថែមរបស់លោកស៊ី ជីនភីង៕
Tag:
ស៊ី ជិនភីង
សហរដ្ឋអាមេរិក
ដូណាល់ ត្រាំ
ចិន
© រក្សាសិទ្ធិដោយ thmeythmey.com
