ត្រាំ ចំអកឲ្យនាយករដ្ឋមន្ត្រីឥណ្ឌាដែលសង់បណ្ណាល័យនៅអាហ្វហ្គានីស្ថាន

អន្តរជាតិ

ត្រាំ ចំអកឲ្យនាយករដ្ឋមន្ត្រីឥណ្ឌាដែលសង់បណ្ណាល័យនៅអាហ្វហ្គានីស្ថាន

03, Jan 2019 , 8:39 pm

រូបភាព

ដោយ: ថ្មីៗ

ប្រធានាធិបតីអាមេរិក ដូណាល់ ត្រាំ ដើមឆ្នាំ ២០១៩នេះ បានចំអកឲ្យនាយករដ្ឋមន្ត្រីឥណ្ឌា នារិន្ទ្រា ម៉ូឌី ដែលចំណាយលុយសាងសង់បណ្ណាល័យនៅអាហ្វហ្គានីស្ថាន។ ក្រៅពីប្រៀបធៀបការចំណាយសង់បណ្ណាល័យជាមួយការចំណាយរបស់អាមេរិកក្នុងសង្គ្រាមអាហ្វហ្គានីស្ថាន លោក ត្រាំ ក៏អះអាងថែមថា សង់បណ្ណាល័យគ្មានប្រយោជន៍ឡើយព្រោះគ្មានអ្នកណាអាន។

ក្នុងកិច្ចប្រជុំគណៈរដ្ឋមន្ត្រីសម្រាប់ដើមឆ្នាំ ២០១៩ នៅថ្ងៃពុធទី ២ ខែមករា ប្រធានាធិបតី ដូណាល់ ត្រាំ បានលើកយកបញ្ហាការចូលរួមរបស់ឥណ្ឌាក្នុងការដោះស្រាយបញ្ហាអាហ្វហ្គានីស្ថានមកពិភាក្សា ស្របពេលដែលទ័ពអាមេរិកនៅទីនោះយ៉ាងតិច ៥០០០នាក់នឹងត្រូវដកចេញផង។

មិនត្រឹមតែអួតអាងថា លោកមានទំនាក់ទំនងល្អជាមួយនាយករដ្ឋមន្ត្រីឥណ្ឌាលោក នារិន្ទ្រា ម៉ូឌី ប្រមុខរដ្ឋអាមេរិករូបនេះបានឆ្លៀតចម្អកឲ្យ មេដឹកនាំឥណ្ឌា ដែលបានបន្តប្រាប់លោកផ្ទាល់ ពីជំនួយរបស់ឥណ្ឌាក្នុងការសាងសង់បណ្ណាល័យមួយនៅអាហ្វហ្គានីស្ថានដែរ។

ទីភ្នាក់ងារព័ត៌មាន AFP ផ្សាយថា លោក ត្រាំ បាននិយាយពេញៗមាត់ថា ឥណ្ឌាចំណាយលុយឥតប្រយោជន៍លើការសង់បណ្ណាល័យនៅអាហ្វហ្គានីស្ថាន ហើយលុយប៉ុណ្ណោះស្មើនឹងអាមេរិកចំណាយលើសង្គ្រាមនៅអាហ្វហ្គានីស្ថានត្រឹមប្រាំម៉ោងប៉ុណ្ណោះ។

«អ្នកដឹងទេថា វាដូចជាអ្វី? វាប្រហែលស្មើនឹងអ្វីដែលយើងចំណាយប្រាំម៉ោងប៉ុណ្ណោះ។ ហើយយើងអាចនិយាយបានថា អរគុណណាស់សម្រាប់បណ្ណាល័យមួយ ខ្ញុំមិនដឹងថា អ្នកណាប្រើប្រាស់បណ្ណាល័យនេះទេនៅអាហ្វហ្គានីស្ថាន»។ ប្រធានាធិបតីអាមេរិកនិយាយបែបនេះ។

យ៉ាងណាក៏ដោយ លោក ត្រាំ មិនបាននិយាយឲ្យច្បាស់ថាលោកកំពុងសំដៅលើគម្រោងមួយណារបស់រដ្ឋាភិបាលឥណ្ឌានៅអាហ្វហ្គានីស្ថានឡើយ។ ប៉ុន្តែឥណ្ឌាបានចូលរួមចំណែកយ៉ាងសំខាន់ក្នុងការផ្តល់ជំនួយដល់មិត្តជិតខាងរបស់ខ្លួន ហើយក៏ប្តេជ្ញាជួយ បីពាន់លានដុល្លារដល់ក្រុងកាប៊ុលដោះស្រាយបញ្ហា ចាប់ពីអាមេរិកឈានពានឆ្នាំ ២០០១ ដើម្បីកម្ចាត់របបដឹកនាំរបស់ក្រុមតាលីបង់ដែរ។

គម្រោងធំៗរបស់ឥណ្ឌាគឺផ្តោតលើការសាងសង់ឡើងវិញវិទ្យាល័យដ៏ល្បីឈ្មោះមួយនៅក្រុងកាប៊ុល និងផ្តល់អាហារូបករណ៍ចំនួន ១០០០កន្លែងដល់សិស្សអាហ្វហ្គនីស្ថានរៀងរាល់ឆ្នាំផងដើម្បីធានាថា អាហ្វហ្គានីស្ថានអាចមានធនធានមនុស្សគ្រប់គ្រាន់ជួយស្តារប្រទេសជាតិនិងអភិវឌ្ឍប្រទេសជាតិបាន។

ក្នុងពេលសម្ពោធវិមានសភាអាហ្វហ្គានីស្ថានដែលសង់ដោយជំនួយឥណ្ឌាឆ្នាំ ២០១៥ លោក ម៉ូឌី បានប្រកាសដែរថា ឥណ្ឌានឹងលើកកម្ពស់កម្មវិធីដែលជួយបង្កើតអំណាចយុវជនអាហ្វហ្គានីស្ថាន តាមរយៈការបំពាក់បំប៉ន់ជំនាញបច្ចេកទេស និង ការអប់រំសម័យទំនើបផងដែរ។

ត្រឡប់មកវិញ ក្រៅពីចម្អកឲ្យឥណ្ឌា ដូណាល់ ត្រាំ ក៏បានការពារការសម្រេចចិត្តដកទ័ពចេញពីអាហ្វហ្គានីស្ថានរបស់លោកផងដែរ ក្រោយមានការរិះគន់ច្រើន។ លោកបានទាញយកសង្គ្រាមសូវៀតនៅអាហ្វហ្គានីស្ថានជាឧទាហរណ៍ដោយពន្យល់ថា សូវៀតដួលរលំដោយសារក្ស័យធននឹងសង្គ្រាមដប់ឆ្នាំ នៅអាហ្វហ្គានីស្ថានពី ១៩៧៩ដល់១៩៨៩នោះ។ ដូច្នេះហើយលោក ត្រាំ និយាយដោយចំហថា ជម្រើសដកទ័ពចេញ និងវិនិយោគលុយកាន់តែតិចនៅក្នុងសង្គ្រាមបរទេសជារឿងត្រឹមត្រូវ៕