អន្តរជាតិ
The Sun Daily
×![]()
ការជក់បារីនៅតាមភោជនីយដ្ឋាន (រួមទាំងប្រភេទភោជនីយដ្ឋានហាលវាល) ត្រូវបានហាមឃាត់ទាំងស្រុងនៅក្នុងប្រទេសម៉ាឡេស៊ី ចាប់ពីថ្ងៃទី១ខែមករាឆ្នាំ២០១៩នេះតទៅ។ 
បើយោងតាមប្រសាសន៍របស់អគ្គនាយកសុខាភិបាលនៃក្រសួងសុខាភិបាលម៉ាឡេស៊ី លោក ណ អ៊ីស្ហាម អាប់ឌុលឡា ( Noor Hisham Abdullah) ការអនុវត្តការហាមប្រាមនេះ ត្រូវធ្វើឡើងស្របតាមការធ្វើវិសោធនកម្មច្បាប់គ្រប់គ្រងផលិផលថ្នាំជក់ឆ្នាំ២០១៨ ដែលការពារសុខុមាលភាពសាធារណៈពីផ្សែងបារី។
សារព័ត៌មាន Channel News Asia បានស្រង់ប្រសាសន៍លោកអគ្គនាយកដដែល ដែលពន្យល់នៅក្នុងសេចក្តីថ្លែងការណ៍មួយថា៖«សាធារណជនត្រូវបានបង្ខំមិនឲ្យជក់បារីនៅតាមបណ្តាអាហារដ្ឋាន ទោះជាទីកន្លែងទាំងនោះ មាន ឬមិនមានបំពាក់ម៉ាស៊ីនត្រជាក់ក៏ដោយ។ ត្រង់នេះមានន័យថា បំរាមទាំងនេះត្រូវអនុវត្តនៅគ្រប់កន្លែងអាហារដ្ឋានគ្រប់ប្រភេទ ទោះនៅក្នុងបន្ទប់ ឬនៅខាងក្រៅហាលវាលក៏ដោយ»។
មន្ត្រីជាន់ខ្ពស់នៃក្រសួងសុខាភិបាលម៉ាឡេស៊ីបញ្ជាក់ថា បំរាមការជក់បារីនៅតាមអាហារដ្ឋាននេះ ក៏គ្របដណ្តប់ដល់ហាងចល័តតូចៗ ដែលសណ្តោងតាមយានយន្ត ហាងនៅលើនាវា និងនៅលើរថភ្លើងផងដែរ។
ទន្ទឹមនឹងការរំឭក ដល់ម្ចាស់អាហារដ្ឋានឲ្យដាក់តាំងស្លាកសញ្ញាហាមជក់បារី និងយកចានគោះកន្ទុយបារីចេញឲ្យអស់ លោក Noor Hisham Abdullah ក៏បានប្រាប់ឲ្យដឹងផងដែរថា អ្នកដែលត្រូវជាប់ចោទពីបទជក់បារីនៅក្នុងតំបន់ហាមឃាត់ អាចត្រូវពិន័យជាប្រាក់រហូតដល់ ១ម៉ឺនរីងហ្គីត ឬ២៤៥០ដុល្លារ ឬក៏អាចត្រូវផ្តន្ទាទោសឲ្យជាប់ពន្ធនាគាររហូតដល់២ឆ្នាំ។ លើសពីនេះ បើតាមការអះអាងរបស់មន្ត្រីក្រសួងសុខាភិបាលដដែល រាល់ម្ចាស់អាហារដ្ឋានដែលមិនបានដាក់តាំងស្លាកសញ្ញា ហាមជក់បារី ក៏ត្រូវពិន័យជាប្រាក់ ៣ពាន់រីងហ្គីត ឬត្រូវជាប់ពន្ធនាគារ៦ខែ ហើយថា បើសិនជាម្ចាស់អាហារដ្ឋានណាដែលផ្តល់ទីតាំងដល់ការជក់បារី ពួកគេនឹងត្រូវពិន័យជាប្រាក់ចំនួន៥០០០រីងហ្គីត ឬត្រូវផ្តន្ទាទោសដាក់ពន្ធនាគារ១ឆ្នាំ៕
Tag:
ម៉ាឡេស៊ី
បារី
No Smoking
© រក្សាសិទ្ធិដោយ thmeythmey.com
