តំណាងរាស្ត្របក្សកាន់អំណាចបង់ក្លាដែសប្រញាប់ស្បថចូលកាន់តំណែង ឯបក្សប្រឆាំងនិងសហគមន៍អន្តរជាតិថ្កោលទោស

អន្តរជាតិ

តំណាងរាស្ត្របក្សកាន់អំណាចបង់ក្លាដែសប្រញាប់ស្បថចូលកាន់តំណែង ឯបក្សប្រឆាំងនិងសហគមន៍អន្តរជាតិថ្កោលទោស

03, Jan 2019 , 5:09 pm

រូបភាព

លោកស្រីនាយករដ្ឋមន្ត្រីសៀក ហាស៊ីណា និយាយទៅកាន់អ្នកកាសែតក្រោយបិទមណ្ឌលបោះឆ្នោតថ្ងៃអាទិត្យទី ៣០ ធ្នូ (AFP)

ដោយ: ថ្មីៗ

តំណាងរាស្ត្របក្សប្រឆាំងបង់ក្លាដែសពហិកាចូលរួមក្នុងពិធីស្បថចូលកាន់តំណែងនៃសមាជិកសភានៅថ្ងៃព្រហស្បតិ៍ដោយបន្តទាត់ចោលលទ្ធផលបោះឆ្នោតដែលហ៊ុមព័ទ្ធដោយភាពមិនប្រក្រតីនិង ហិង្សាបង្ហូរឈាមផង។ ក្រៅពីពហិការបស់បក្សប្រឆាំង សហគមន៍អន្តរជាតិក៏ថ្កោលទោសការបោះឆ្នោតនិងទាមទារឲ្យមានការស៊ើបអង្កេតលើករណីមិនប្រក្រតីនេះដែរ។

ក្រោយបានទទួលជ័យជម្នះក្នុងការបោះឆ្នោតសាកលកាលពីចុងសប្តាហ៍មុន សមាជិកបក្សកាន់អំណាចសម្ព័ន្ធ Awami ប្រញាប់ប្រញាល់ស្បថចូលកាន់តំណែងជាតំណាងរាស្ត្រជាផ្លូវការនៅថ្ងៃព្រហស្បតិ៍ទី ៣ ខែមករានេះ។

បើតាមទីភ្នាក់ងារព័ត៌មាន AFP សមាជិកគណបក្សប្រឆាំងដ៏ធំជាតិនិយមបង់ក្លាដែស (BNP) នាំគ្នាពហិកាចូលរួមក្នុងពិធីស្បថចូលកាន់តំណែងនេះ ដោយពួកគេបន្តទាត់ចោលលទ្ធផលបោះឆ្នោត ហើយក៏ទាមទារឲ្យមានការស៊ើបអង្កេតលើករណីបោះឆ្នោតនេះដែរ។

តាមលទ្ធផលបោះឆ្នោតកាលពីថ្ងៃអាទិត្យ សម្ព័ន្ធបក្សកាន់អំណាចរបស់លោកស្រីនាយករដ្ឋមន្ត្រី សៀក ហាស៊ីណា (Sheikh Hasina) ឈ្នះបានអាសនៈច្រើនរហូតដល់ ២៩១ ក្នុងចំណោមអាសនៈសរុប ៣០០។ ប៉ុន្តែការបោះឆ្នោតនេះពោរពេញដោយភាពមិនប្រក្រតីច្រើន ហើយក៏មានអំពើហិង្សាបង្ហូរឈាមរហូតដល់មានអ្នកស្លាប់ច្រើននាក់ទៀត។

ដោយឡែក ការបោះឆ្នោតនិងលទ្ធផលបោះឆ្នោតរងការថ្កោលទោសខ្លាំងពីសហគមន៍អន្តរជាតិ។ អង្គការឃ្លាំមើលសិទ្ធិមនុស្សដែលមានទីស្នាក់ការនៅអាមេរិកនោះបានចាត់ទុកការបោះឆ្នោតនៅបង់ក្លាដែសនោះថាជា យុទ្ធនាការពោរពេញដោយហិង្សា ការគំរាមកំហែងនិងបង្ក្រាបក្រុមប្រឆាំង ជាពិសេសការប្រើប្រាស់ច្បាប់ដើម្បីសង្កត់សង្កិនឬរឹតត្បិតសិទ្ធិសេរីភាពតែម្តង។

ស្ថាប័នសិទ្ធិមនុស្សនេះក៏បានទាមទារឲ្យមានការរៀបចំការស៊ើបអង្កេតឯករាជ្យ និងគ្រប់ជ្រុងជ្រោយមួយដើម្បីស្វែងរកបញ្ហានៅពីក្រោយហិង្សា និងភាពមិនប្រក្រតីផង។

ក្រៅពីស្ថាប័នសិទ្ធិមនុស្ស បណ្តប្រទេសប្រជាធិបតេយ្យធំៗជាច្រើនមានអាមេរិក និងសមាជិកសហភាពអឺរ៉ុប បានចេញមុខថ្កោលទោសលទ្ធផលបោះឆ្នោត និងទាមទារឲ្យមានការស៊ើបអង្កេតឯករាជ្យលើករណីបោះឆ្នោតនេះដែរ។

សូមបញ្ជាក់ថា ជ័យជម្នះភ្លូកទឹកភ្លូកដីក្នុងការបោះឆ្នោតរបស់បក្សកាន់អំណាច ដែលហ៊ុមព័ទ្ធដោយភាពមិនប្រក្រតីនិងបង្ហូរឈាមគ្នាធ្ងន់ធ្ងរនោះកំពុងធ្វើឲ្យឲ្យគេចោទប្រកាន់ថា លោកស្រី ហាស៊ីណា ប្រើមធ្យោបាយអាក្រក់ដោយបំបិទសំឡេងក្រុមប្រឆាំង និងសង្កត់សង្កិនសិទ្ធិសេរីភាពបញ្ចេញមតិតាមរយៈការប្រើប្រាស់ច្បាប់ប្រឆាំងសារព័ត៌មានផង។

ក្រោយទទួលជ័យជម្នះ លោកស្រី នឹងក្លាយជានាយករដ្ឋមន្ត្រីជាថ្មីទៀតសម្រាប់អាណត្តិទីបួន។ ហាស៊ីណា បានដឹកនាំបង់ក្លាដែសអាណត្តិទីមួយចាប់ពីឆ្នាំ ១៩៩៦ដល់ឆ្នាំ ២០០១ ហើយនៅឆ្នាំ ២០០៨លោកស្រីបានឈ្នះឆ្នោតដឹកនាំប្រទេសជាថ្មីរហូតដល់ពីរអាណត្តិ មុនឈ្នះឆ្នោតចុងសប្តាហ៍មុន៕