អន្តរជាតិ
យោធា«ហ្កាបុង»ធ្វើរដ្ឋប្រហារស្តាប្រជាធិបតេយ្យ ខណៈប្រធានាធិបតីកំពុងព្យាបាលជំងឺនៅបរទេស
× យោធាហ្កាបុងនៅថ្ងៃទី៧ ខែមករា បានធ្វើរដ្ឋប្រហារដណ្ដើមអំណាចពីប្រធានាធិបតី Ali Bongo ដែលកំពុងព្យាបាលជំងឺនៅបរទេស។ ក្នុងការប្រកាសតាមវិទ្យុរដ្ឋ យោធាហ្កាបុងបានបង្ហាញការមិនពេញចិត្តរបស់ពួកគេចំពោះសេចក្ដីថ្លែងការណ៍ឆ្នាំថ្មីរបស់លោក Bongo ដែលអះអាងថា សុខភាពរបស់លោកកំពុងតែល្អប្រសើរហើយ។
សំឡេងកាំភ្លើង បានឮសូរក្នុងរដ្ឋធានីលីប្រីវីល ហើយរថក្រោះ និងរថយន្តកងទ័ព បានបើកលើវិថីនានាក្នុងទីក្រុង ខណៈក្រុមយោធាបានចូលគ្រប់គ្រងវិទ្យុរដ្ឋដើម្បីប្រកាសពីការធ្វើរដ្ឋប្រហារ។ ក្នុងសេចក្ដីខ្លីមួយនៅថ្ងៃទី៧ ខែមករា យោធាហ្កាបុងបានប្រកាសបង្កើតក្រុមប្រឹក្សាស្រោចស្រង់ជាតិ ដែលមានគោលដៅស្ដាប្រជាធិបតេយ្យក្នុងរដ្ឋអាហ្វ្រិកសម្បូរប្រេងមួយនេះ។
បើតាមសារព័ត៌មាន BBC ក្រុមយោធាហ្កាបុង បានឆ្លៀតឱកាសដណ្ដើមអំណាចពីប្រធានាធិបតី Ali Gabon ដែលកំពុងស្ថិតក្នុងប្រទេសម៉ារ៉ុកដើម្បីព្យាបាលជំងឺ។ អវត្តមានពីប្រទេសជាងពីរខែ លោក Bongo បានចេញមុខបកស្រាយក្នុងសេចក្ដីថ្លែងការណ៍ឆ្នាំថ្មី ដោយបានទទួលស្គាល់ពីការធ្លាក់ចុះសុខភាពរបស់លោក ប៉ុន្តែស្ថានភាពជំងឺកំពុងតែធូរស្រាល។ ពេលថ្លែងការណ៍នោះ លោក Bongo មានវ័យ៥៩ឆ្នាំ និយាយមិនច្បាស់ ហើយមិនបានកម្រើកដៃស្ដាំទេ។
ទោះជាប្រធានាធិបតីរូបនេះបានពន្យល់ហើយក្ដី យោធាហ្កាបុងមិនពេញចិត្តឡើយ តែបង្កើតជាការសង្ស័យកាន់តែខ្លាំងថែមទៀតលើសមត្ថភាពដឹកនាំប្រទេសរបស់លោក។ ក្រុមគ្រួសារលោក Bongo បានគ្រប់គ្រងហ្កាបុងជាង៥០ឆ្នាំមកហើយ ដោយលោក Bongo ឡើងកាន់តំណែងបន្តពីឪពុករបស់លោក Omar ដែលស្លាប់ក្នុងឆ្នាំ២០០៩ ។ ជ័យជម្នះការបោះឆ្នោតឆ្នាំ២០១៦ របស់លោក Bongo ពោរពេញដោយភាពមិនប្រក្រតីជាច្រើន និងការតវ៉ាហិង្សាដែរ។
ដោយឡែក ក្រុមយោធាដែលធ្វើរដ្ឋប្រហារវិញ ទំនងជាក្រុមតូចមួយប៉ុណ្ណោះ។ ក្រុមនេះបានអំពាវនាវឲ្យកងទ័ពដទៃទៀតកាន់កាប់ប្រព័ន្ធដឹកជញ្ជូន អាកាសយានដ្ឋាន និងឃ្លាំងអាវុធដើម្បីភាពល្អប្រសើររបស់ប្រទេស៕
Tag:
អាហ្វ្រិក
ហ្កាបុង
Ali Bongo
© រក្សាសិទ្ធិដោយ thmeythmey.com