អន្តរជាតិ
លោក គីម ជុងអ៊ុន ទៅចិនលើកទី៤ មុនគម្រោងនៃជំនួបជាមួយលោក ត្រាំ មេដឹកនាំកូរ៉េខាងជើងចាកចេញពីទីក្រុងព្យុងយ៉ាង។ (រូបភាព KCNA)
× មេដឹកនាំកូរ៉េខាងជើង គីម ជុងអ៊ុន កំពុងស្ថិតនៅឯរដ្ឋធានីប៉េកាំងរបស់សាធារណរដ្ឋប្រជាមានិតចិនដើម្បីធ្វើទស្សនកិច្ច៤ថ្ងៃ។ នេះបើតាមការបញ្ជាក់របស់ទីភ្នាក់ងារព័ត៌មានរដ្ឋចិននៅថ្ងៃទី៨ ខែមករា។ ដំណើរទស្សនកិច្ចលើកទី៤ នេះ ធ្វើឡើង ខណៈពេលដែលកូរ៉េខាងជើង កំពុងជជែកគ្នាជាមួយអាមេរិកដើម្បីរៀបចំជំនួបរវាងលោក គីម និងប្រធានាធិបតី ដូណាល់ ត្រាំ ។
ទស្សនកិច្ចរបស់ប្រមុខដឹកនាំកូរ៉េខាងជើង គីម ជុងអ៊ុន នៅទឹកដីចិន ចាប់ផ្ដើមតាំងពីថ្ងៃទី៧មកម្ល៉េះ និងបញ្ចប់វិញនៅថ្ងៃទី១០ ខែមករា។ នេះជាដំណើរទស្សនកិច្ចលើកដំបូងរបស់លោក គីម ទៅកាន់ចិនក្នុងឆ្នាំ២០១៩ តែជំនួបរវាងលោក និងប្រធានាធិបតីចិន ស៊ី ជិនភីង គឺជាជំនួបលើកទី៤ ហើយ។ ទីភ្នាក់ងារព័ត៌មានរដ្ឋចិន Xinhua ផ្សាយថា ទស្សនកិច្ចរបស់លោក គីម ធ្វើឡើងតាមការអញ្ជើញរបស់លោក ស៊ី ។
ក្នុងដំណើរលើកនេះ មេដឹកនាំកូរ៉េខាងជើងនាំភរិយារបស់ខ្លួនលោកស្រី Ri Sol-ju ទៅជាមួយផងដែរ។ លោក គីម យ៉ុងឈុល មន្ត្រីទទួលការចរចានុយក្លេអ៊ែរជាមួយអាមេរិក, លោក រី យ៉ុងហូ ប្រមុខការទូតកូរ៉េខាងជើង និងរដ្ឋមន្ត្រីការពារជាតិ ណូ ក្វាងឈុល ក៏ស្ថិតក្នុងចំណោមប្រតិភូកូរ៉េខាងជើងដែរ។ ដូចដំណើរទស្សនកិច្ចនៅប៉េកាំងលើកមុនដែរ មេដឹកនាំកូរ៉េខាងជើង និងមន្ត្រីអមដំណើរ បានប្រើប្រាស់រថភ្លើងពិសេសធ្វើដំណើរពីទីក្រុងព្យុងយ៉ាង។
ប្រព័ន្ធផ្សព្វផ្សាយរដ្ឋចិន និងកូរ៉េខាងជើង មិនបានផ្សាយអ្វីទាក់ទងរបៀបវារៈនៃជំនួបនេះទេ។ ប៉ុន្តែជំនួបនេះ ធ្វើឡើងស្របគ្នានឹងការជាប់គាំងដំណើរការរំសាយនុយក្លេអ៊ែរ តែកើតឡើងមុនគម្រោងជំនួបរវាងលោក គីម និងប្រធានាធិបតីអាមេរិក ដូណាល់ ត្រាំ ព្រមទាំងជំនួបមេដឹកនាំអន្តរកូរ៉េផង។ លោក គីម និងលោក ស៊ី បានជួបគ្នាដល់ទៅបីលើក មុននិងក្រោយជំនួបប្រវត្តិសាស្ត្រត្រាំ-គីម នៅសិង្ហបុរីកាលពីឆ្នាំ២០១៨ ។
បើតាមនិន្នាការបែបនេះ ជំនួបនៅប៉េកាំង ទំនងជាផ្ដល់ក្ដីសង្ឃឹមថែមទៀតដល់គម្រោងជួបគ្នារវាងលោក គីម និងលោក ត្រាំ ។ កាលពីចុងសប្ដាហ៍មុន លោក ត្រាំ អះអាងថា ក្រុងព្យុងយ៉ាង និងក្រុងវ៉ាស៊ីនតោន កំពុងចរចាគ្នាពីទីតាំងដែលត្រូវធ្វើជាម្ចាស់ផ្ទះរៀបចំជំនួបលើកទី២ ខណៈទីក្រុងនៅអាស៊ីដូចជា បាងកក ហាណូយ និងអ៊ូឡង់បាទ័រ អាចជម្រើសនាំមុខគេ។
អ្វីគួរឲ្យចាប់អារម្មណ៍នោះ ដំណើរទស្សនកិច្ចរបស់លោក គីម ធ្វើឡើងបន្ទាប់ពីមេដឹកនាំកូរ៉េខាងជើងរូបនេះគំរាមដើរលើផ្លូវផ្សេង បើអាមេរិកនៅតែបន្តដាក់ទណ្ឌកម្មលើខ្លួន នៅពេលការចរចានុយក្លេអ៊ែរជាប់គាំងនោះ។ ជាមួយនឹងការទៅដល់ក្រុងប៉េកាំង៤លើកបែបនេះ ផ្លូវថ្មីដែលលោក គីម លើកឡើង អាចជាការខិតទៅរកចិនកាន់តែខ្លាំងឡើងវិញបន្ទាប់ពីរអាក់រអួលខ្លះដោយសារការសាកល្បងនុយក្លេអ៊ែរ ដែលនេះពិតជាធ្វើឲ្យអាមេរិកបារម្ភមិនតិចឡើយ៕
Tag:
កូរ៉េខាងជើង
ចិន
អាមេរិក
គីម ជុងអ៊ុន
ស៊ី ជិនភីង
ដូណាល់ ត្រាំ
© រក្សាសិទ្ធិដោយ thmeythmey.com