អន្តរជាតិ
រដ្ឋាភិបាលមីយ៉ាន់ម៉ា ប្រាប់យោធាឲ្យកម្ទេចក្រុមឧទ្ទាមនៅ Rakhine
× រដ្ឋាភិបាលមីយ៉ាន់ម៉ា នៅថ្ងៃទី៧ ខែមករា បានណែនាំឲ្យយោធាធ្វើប្រតិបត្តិការបោសសម្អាតក្រុមឧទ្ទាម ដែលអុកឡុកនៅរដ្ឋ Rakhine ។ ការណែនាំនេះ ធ្វើឡើងក្នុងជំនួបកម្ររវាងរដ្ឋាភិបាលស៊ីវិល និងក្រុមឧត្តមសេនីយ៍ដ៏មានឥទ្ធិពល។ Rakhine ដែលនៅភាគខាងលិចមីយ៉ាន់ម៉ា បានក្លាយទីប្រយុទ្ធរវាងយោធាមីយ៉ាន់ម៉ា និងក្រុមឧទ្ទាម Arakan Army នៅពេលថ្មីៗនេះ ដែលធ្វើឲ្យបាត់បង់ជីវិតទាំងសងខាង និងជនស៊ីវិលរាប់ពាន់នាក់ត្រូវភៀសខ្លួន។
រដ្ឋាភិបាលស៊ីវិលមីយ៉ាន់ម៉ា បានជួបជាមួយមេទ័ពកំពូលៗនៅថ្ងៃទី៧ ខែមករា ដើម្បីជជែកពីសន្តិសុខជាតិ និងកិច្ចការបរទេស។ ការប៉ះទង្គិចរវាងក្រុមឧទ្ទាម Arakan Army និងក្រុមយោធានៅឯរដ្ឋ Rakhine គឺជាប្រធានបទសំខាន់ ខណៈការវាយប្រហារលើប៉ុស្តិ៍ប៉ូលិសចំនួន៤ ពីសំណាក់ក្រុមឧទ្ទាមសម្លាប់ប៉ូលិស១៣នាក់ ហើយប្រជាជនជាច្រើនក៏ត្រូវចាកចោលផ្ទះសម្បែងរកទីសុវត្ថិភាពដូចជាវត្តអារាម និងជំរំភៀសខ្លួន។
អ្នកនាំពាក្យរដ្ឋាភិបាលមីយ៉ាន់ម៉ា Zaw Htay និយាយថា ទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី ប្រធានាធិបតី វីន ម្ញីន និងមន្ត្រីជាន់ខ្ពស់រដ្ឋាភិបាលដទៃទៀត បានជួបជាមួយក្រុមមេទ័ពដែលដឹកនាំអគ្គមេបញ្ជាការ មីន អ៊ុងឡាំង ។ ក្នុងជំនួបនេះ លោក Zaw Htay បញ្ជាក់ថា ការិយាល័យប្រធានាធិបតីក៏បង្គាប់ឲ្យយោធាចាត់វិធានការប្រឆាំងក្រុម Arakan Army ក្នុងរដ្ឋ Rakhine តែម្ដង។
រដ្ឋ Rakhine ភាគលិចនេះ ក៏ជាទីដែលក្រុមយោធាធ្វើយុទ្ធនាការប្រឆាំងក្រុមឧទ្ទាមមួយទៀត ដែលមកពីសហគមន៍មូស្លីមតាំងពីឆ្នាំ២០១៧ មក។ ជនភាគតិចមូស្លីមរ៉ូហ៊ីងយ៉ារាប់សែននាក់ បានភៀសខ្លួនទៅកាន់បង់ក្លាដែសក្បែរខាងដើម្បីគេចពីការប្រយុទ្ធគ្នា។ មន្ត្រីរដ្ឋាភិបាលក្រុងណៃពិដោខាងលើក៏បានចោទក្រុម Arakan Army ដែលមកពីសហគមន៍ពុទ្ធសាសនិកថា មានជាប់ពាក់ព័ន្ធជាមួយក្រុមឧទ្ទាមមូស្លីមរ៉ូហ៊ីងយ៉ា។
Arakan Army គឺជាចលនាប្រដាប់អាវុធមួយក្នុងចំណោមចលនាក្រុមភាគតិចជាច្រើននៅមីយ៉ាន់ម៉ា។ ក្រុមនេះប្រយុទ្ធតស៊ូដើម្បីតាមទាមទារស្វ័យភាពកាន់តែពីរដ្ឋាភិបាលសហភាពមីយ៉ាន់ម៉ាក្នុងរដ្ឋ Rakhine ។ ការប៉ះតង្គិចជាមួយយោធា តែងកើតឡើងជាញឹកញយ ខណៈរដ្ឋមួយនេះមិនស្ថិតក្នុងបទឈប់បាញ់ឯកតោភាគីរបស់យោធាមីយ៉ាន់ម៉ាឡើយ។ សម្រាប់ការវាយប្រហារលើប៉ុស្តិ៍កាលពីសប្ដាហ៍មុន ក្រុមមួយនេះអះអាងថា យោធាប្រើទីតាំងប៉ូលិសដើម្បីវាយប្រហារខ្លួន ទើបខ្លួនសងសឹកវិញ។
បង្កើតឡើងក្នុងឆ្នាំ២០០៩ Arakan Army បានពង្រីកខ្លួនជាបន្តបន្ទាប់ ហើយសព្វថ្ងៃនេះអាចមានចំនួនខ្ទង់ពាន់នាក់ឯណោះ។ យ៉ាងណាមិញ អ្នកនាំពាក្យរដ្ឋាភិបាលមីយ៉ាន់ម៉ាបានប្រាប់ប្រជាជននៅ Rakhine កុំគាំទ្រក្រុមឧទ្ទាមួយនេះឲ្យសោះ។ លោក Zaw Htay រំឭកថាឲ្យប្រជាជនគិតគូរឲ្យវែងឆា្យពីអនាគតរបស់ពួកគេ និងអនាគតកូនចៅជំនាន់ក្រោយផងដែរ៕
Tag:
មីយ៉ាន់ម៉ា
អ៊ុងសាន ស៊ូជី
Rakhine
© រក្សាសិទ្ធិដោយ thmeythmey.com