អន្តរជាតិ
ជម្លោះពាណិជ្ជកម្ម៖ ជំនួបចរចាអាមេរិក-ចិន ឈានដល់ថ្ងៃទី៣, រំពឹងមានលទ្ធផលវិជ្ជមាន
×![]()
ដោយ: តន ចាន់រិទ្ធារ៉ា
ជំនួបចរចារវាងអាមេរិក និងចិនដើម្បីស្វែងរកដំណោះស្រាយឈានទៅបញ្ចប់ជម្លោះពាណិជ្ជកម្ម បានឈានចូលថ្ងៃទីបីហើយនៅថ្ងៃទី៩ ខែមករា ពោលគឺច្រើនជាងគម្រោងដើមមួយថ្ងៃ។ ការបន្ថែមពេលចរចាមួយថ្ងៃទៀតនេះ ធ្វើឲ្យមានក្ដីរំពឹងថា មហាអំណាចពិភពលោកទាំងពីរ ទំនងជាសម្រេចបានលទ្ធផលដែលភាគីនីមួយៗទទួលយកបាន ឬកំពុងជជែកគ្នាលើបញ្ហារសើបខ្លះដែលត្រូវការពេលទៀត។ សញ្ញាវិជ្ជមាននេះ ក៏ធ្វើឲ្យតម្លៃប្រេងឡើងថ្លៃមួយក្រឺតដែរ។
ការចរចារវាងមន្ត្រីអាមេរិក និងចិន បានបន្តដល់យប់ថ្ងៃទី៨ ខែមករា ហើយធ្វើឡើងបន្តទៀតនៅថ្ងៃទី៩ ខែមករា។ នេះជាការបញ្ជាក់របស់ការិយាល័យតំណាងពាណិជ្ជកម្មរបស់អាមេរិកនៅថ្ងៃទី៨ ខែមករា។ តាមគម្រោង ជំនួបនៅទីក្រុងប៉េកាំង នឹងបញ្ចប់នៅថ្ងៃទី៨ ខែមករា ប៉ុន្តែការពន្យារពេលដែលមិនប្រាប់មុនបែបនេះ អាចជាសញ្ញាល្អសម្រាប់ការចរចាដើម្បីបញ្ចប់ជម្លោះពាណិជ្ជកម្មរវាងមហាអំណាចសេដ្ឋកិច្ចទាំងពីរ។
ជាការពិត ការចរចាហួសកាលបរិច្ឆេទកំណត់ មិនមែនជារឿងមិនធម្មតាឡើយក្នុងការចរចា ប៉ុន្តែសម្រាប់ករណីអាមេរិក និងចិននេះ វាជារឿងវិជ្ជមានដែលពិភពលោកចង់ឃើញ។ តាំងពីថ្ងៃដំបូងនៃការចរចាមកនោះ ភាគីទាំងពីរមិនសូវនិយាយច្រើនឡើយទាក់ទងដំណើរការជជែកគ្នានេះ។ ជាមួយនឹងការបន្ថែមថ្ងៃចរចានេះ ដំណើរការចរចាដែលតឹងសរសៃក និងចូលរួមដោយភាគីពាក់ព័ន្ធជាច្រើន អាចឈានដល់ការឯកភាពគ្នាលើបញ្ហាណាមួយមិនខាន។
បើតាមទីភ្នាក់ងារព័ត៌មាន Reuters សញ្ញាវិជ្ជមានក្នុងការចរចាបានលេចឡើងលើប្រធានបទសំខាន់ៗជាច្រើនដូចជា ការបង្កើនការទិញផលិតផលកសិកម្ម និងថាមពលរបស់អាមេរិក ក៏ដូចជាការអនុញ្ញាតឲ្យអាមេរិកចូលទីផ្សារចិនកាន់តែទូលាយផង។ យ៉ាងណាមិញ សារព័ត៌មានរដ្ឋចិន China Daily ផ្សាយនៅថ្ងៃទី៨ ខែមករា ថា ប៉េកាំងចង់បញ្ចប់បញ្ហាជាមួយអាមេរិក តែខ្លួនមិននឹងមិនធ្វើសម្បទានដោយគ្មានហេតុផលឡើយ ហើយភាគីទាំងពីរត្រូវតែសម្របតាមគ្នាទៅមក។
អ្វីគួរឲ្យចាប់អារម្មណ៍នោះ តម្លៃប្រេងបានឡើងក្រឺតក្នុងថ្ងៃទី៩ ខែមករា ដែលជាថ្ងៃទីបីនៃការចរចា។ តម្លៃប្រេងឆៅរបស់ West Texas Intermediate បានកើនលើស៥០ដុល្លារអាមេរិកក្នុងមួយបារ៉ែលជាលើកដំបូងក្នុងឆ្នាំ២០១៩ គឺកើនឡើងចំនួន០,៧ភាគរយ។ ចំណែកតម្លៃប្រេងឆៅរបស់International Brent កើនដល់៥៩,១៤ដុល្លារអាមេរិកក្នុងមួយបារ៉ែលដែរ។
សូមបញ្ជាក់ថា អាមេរិក និងចិន មានពេលដល់ថ្ងៃទី២ ខែមីនាដើម្បីសម្រេចឲ្យបានកិច្ចព្រមព្រៀងណាមួយសំដៅបញ្ចប់ជម្លោះពាណិជ្ជកម្មរបស់ខ្លួន។ បើមិនអាចសម្រេចបានតាមកាលបរិច្ឆេទដែលឯកភាពដោយមេដឹកនាំទាំងពីរកាលពីជំនួបនៅអាហ្សង់ទីនទេនោះ លោកប្រធានាធិបតី ដូណាល់ ត្រាំ ប្រកាសហើយថា អាមេរិកនឹងដំឡើងពន្ធនាំចូលពី១០ភាគរយទៅកាន់២៥ភាគរយលើទំនិញតម្លៃ២០០ពាន់ដុល្លាររបស់ចិន៕
Tag:
អាមេរិក
ចិន
ជម្លោះពាណិជ្ជកម្ម
© រក្សាសិទ្ធិដោយ thmeythmey.com
