ជាតិ
រដ្ឋាភិបាល ដកហូតឯកសារមិនប្រក្រតីជាង៣ម៉ឺនក្បាលពីជនបរទេស និងបណ្ដេញជនខុសច្បាប់ជាង៣ពាន់នាក់
× ភ្នំពេញ៖ រដ្ឋាភិបាល បានដកហូតឯកសារកម្ពុជា មិនប្រក្រតីពីជនបរទេស ជាង៣ម៉ឺនឯកសារ ដែលស្មើ៩០ភាគរយ នៃចំនួនជនបរទេស ដែលកំពុងរស់នៅក្នុងប្រទេសកម្ពុជា ។ ចំណែកជនបរទេសខុសច្បាប់ ដែលរដ្ឋាភិបាលបណ្ដេញចេញនោះ មានចំនួនជាង៣០០០នាក់។
ឯកសារដែលសមត្ថកិច្ចប្រមូលបានពីជនបរទេស ប្រមាណជាង៣ម៉ឺនក្បាលនោះ រួមមានសៀវភៅគ្រួសារ សៀវភៅស្នាក់នៅ អត្ដសញ្ញាណប័ណ្ណ សំបុត្រកំណើត លិខិតឆ្លងដែនជាដើម។
ឯកសារទាំងនេះ គឺដកហូតបានពីជនបរទេស១០សញ្ញាតិ ប៉ុន្តែក្នុងនោះជនជាតិវៀតណាមច្រើនជាងគេ ពោលគឺ៩០ភាគរយ។ នេះបើតាមលោក គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្ដោប្រវេសន៍ ក្រសួងមហាផ្ទៃ ដែលបានផ្ដល់កិច្ចសម្ភាសដល់អ្នកសារព័ត៌មាន ក្រោយកិច្ចប្រជុំការងារ ដកហូតឯកសាររដ្ឋបាលកម្ពុជាមិនប្រក្រតី ដែលជនបរទេសកំពុងកាន់កាប់ និងការទទួលពាក្យសុំជាជនបរទេសអន្ដោប្រវេសន្ដ។
លោក គៀត ច័ន្ទថារិទ្ធ បានបន្ថែមថា រដ្ឋាភិបាល បានផ្ដល់ពេលវេលា៦ខែទៀត ឲ្យក្រសួងមហាផ្ទៃ បន្តយុទ្ធនាការដកហូតឯកសារកម្ពុជាមិនប្រក្រតីដែលកាន់កាប់ដោយជនបរទេស ដើម្បីបញ្ចប់បញ្ហាខុសច្បាប់នេះ ឲ្យរួចរាល់ជាស្ថាពរនាពេលខាងមុខ។ កាលពីខែសីហា ឆ្នាំ២០១៧ រដ្ឋាភិបាល បានចេញអនុក្រឹត្យស្ដីពីការលុបចោល និងដកហូតឯកសាររដ្ឋបាលកម្ពុជាមិនប្រក្រតី ដែលជនបរទេសកំពុងកាន់កាប់ប្រើប្រាស់។
ងាកមកបញ្ហាជនអន្តោប្រវេសន្តខុសច្បាប់វិញ អាជ្ញាធរកម្ពុជា បានបង្ក្រាបនិងបណ្ដេញចេញជាង៣០០០នាក់ កាលពីឆ្នាំ២០១៨ ដែលភាគច្រើនពួកគេប្រព្រឹត្តបទល្មើសដូចជាការចាប់ជំរិត និងបោកប្រាស់តាមប្រព័ន្ធអ៊ីនធឺណិត (ប្រព័ន្ធទូរគមនាគម៍) ,ល្បែងតាមអនឡាញ និងរស់នៅខុសច្បាប់ ដោយផុតកាលបរិច្ឆេទកំណត់ជាដើម។ គិតតាំងពីឆ្នាំ២០១៤ រហូតមកដល់ពេលនេះ កម្ពុជា បានបណ្ដេញជនបរទេស ជាង១៥,០០០នាក់ហើយ ដោយក្នុងនោះជនជាតិចិន និងវៀតណាមច្រើនជាងគេ។ នេះបើតាមលោក គៀត ច័ន្ទថារិទ្ធ៕
Tag:
គៀត ច័ន្ទថារិទ្ធ
សុខ ផល
អន្តោប្រវេសន៍
© រក្សាសិទ្ធិដោយ thmeythmey.com