ភ្នំពេញ៖ លោក គង់ គាំ បានត្រឹមប្រាប់តុលាការថា ការបង្កើតសម្ព័ន្ធភាពរបស់លោក សម រង្ស៊ី និង លោក កឹម សុខា គឺដើម្បីយកឈ្នះគណបក្សកាន់អំណាច។ ឯរឿងលោក កឹម សុខា លួចទៅសហការជាមួយបរទេស ដើម្បីផ្តួលរំលំរដ្ឋាភិបាកម្ពុជានោះ លោក អះអាងថា ពុំបានដឹងទេ។
លោក គង់ គាំ ទីប្រឹក្សាជាន់ខ្ពស់នៃអតីតគណបក្សប្រឆាំង បានចូលទៅបំភ្លឺតាមដីកាកោះ នៅចំពោះមុខលោក គី ឫទ្ធី ចៅក្រមស៊ើបសួរនៃសាលាដំបូងរាជធានីភ្នំពេញ លើសំណុំរឿងរបស់លោក កឹម សុខា។ លោក លើកឡើងថា ចៅក្រមស៊ើបសួរ ហៅលោកទៅសួរ ក៏ព្រោះតែយល់ថា លោក អាចដឹងរឿងច្រើនក្នុងសំណុំរឿងនេះ។
លោក គង់ គាំ ប្រាប់ក្រុមអ្នកកាសែត ក្រោយចេញពីតុលាការ នៅព្រឹកថ្ងៃទី២៣ ខែមករា ឆ្នាំ២០១៩នេះថា សំណួរភាគច្រើនរបស់ចៅក្រមស៊ើបសួរ គឺពាក់ព័ន្ធនឹងជីវិតនយោបាយរបស់លោកផ្ទាល់ និងដំណើរដើមទងនៃការរួបរួមគ្នារវាងគណបក្ស សម រង្ស៊ី និង គណបក្សសិទ្ធិមនុស្ស។
«ចុះលោក ប្រាប់ចៅក្រមស៊ើបសួរយ៉ាងម៉េច?»។ អ្នកកាសែត ដាក់សំណួរនេះ ទៅកាន់លោក គង់ គាំ ហើយលោក ក៏ឆ្លើយថា «ខ្ញុំគ្រាន់តែដឹងថា លោក សម រង្ស៊ី និងលោក កឹម សុខា ចង់បង្កើតគណបក្សសង្គ្រោះជាតិ ដើម្បីមានថាមពល ក្នុងការប្រកួតប្រជែងជាមួយគណបក្សគ្រប់គ្រងអំណាច»។
អ្នកកាសែត ប្រឹងជជីកសួរទៀតថា «ចុះចៅក្រមស៊ើបសួរ មានសួរលោក ពីរឿងលោក កឹម សុខាទេ ដែលថាបានរួមគំនិតជាមួយបរទេស ដើម្បីផ្តួលរំលំរដ្ឋាភិបាលកម្ពុជា?»។ អតីតទីប្រឹក្សាគណបក្សប្រឆាំងរូបនេះ តបថា «អត់បានសួរទេ។ ចៅក្រមស៊ើបសួរ គ្រាន់តែសួរថា ពេលខ្ញុំ ធ្វើការជាមួយលោក កឹម សុខា និង លោក សម រង្ស៊ី បានដឹងអ្វីខ្លះ?»។
ក្រោយ លោក អះអាងដូច្នេះ អ្នកកាសែត ក៏ងាកទៅសួររឿងលោកផ្ទាល់ជាមួយលោក កឹម សុខា វិញម្តង។ «តើលោក គិតថា លោក កឹម សុខា ពិតជាមានទំនាក់ទំនងជាមួយបរទេស ដើម្បីផ្តួលរំលំរដ្ឋាភិបាលមែនទេ?»។ លោក បកស្រាយថា លោក គ្រាន់តែជាទីប្រឹក្សា ដូច្នេះ លោក មិនដឹងគ្រប់រឿង ដូចលោក សម រង្ស៊ី ដែលធ្លាប់ជាប្រធានគណបក្សសង្គ្រោះជាតិឡើយ។
លោក គង់ គាំ ដែលធ្លាប់ជាអ្នកប្រឆាំងនឹងគណបក្សកាន់អំណាច និងធ្លាប់រួមដៃជាមួយលោក សម រង្ស៊ី អស់រាប់ទសវត្សរ៍មកហើយនោះ បានបន្តថា លោក ក៏ពុំបានដឹងដែរ ពីទំនាក់ទំនងរវាងលោក កឹម សុខា ជាមួយបរទេស។ លោក បរិយាយយ៉ាងដូច្នេះថា «ក្រៅតែពីការរួបរួមគ្នាឲ្យមានកម្លាំងសក្តិសម នឹងការប្រជែងយកឈ្នះ-ចាញ់តាមផ្លូវនយោបាយ ខ្ញុំ អត់បានដឹងទាំងអស់ទេ។ អាថ៌កំបាំងរវាងលោក កឹម សុខា និង បរទេស យើងមិនអាចដឹងបានឡើយ»។
លោក គង់ គាំ បញ្ជាក់ចុងក្រោយថា រឿងលោក កឹម សុខា មានតែលោក សម រង្ស៊ី ប៉ុណ្ណោះ ដែលដឹងច្រើនជាងគេ ដូចដែលលោក សម រង្ស៊ី ខ្លួនឯង ធ្លាប់ប្រកាសកន្លងមក។
ពេលឮថាចៅក្រមស៊ើបសួរ កោះហៅលោក គង់ គាំ ទៅសួរក្នុងនាមជាសាក្សីក្នុងសំណុំរឿងរបស់លោក កឹម សុខា លោក សម រង្ស៊ី ដែលកំពុងរស់នៅឯក្រៅប្រទេស ក៏ចេញមុខសុំធ្វើជាសាក្សីជំនួសលោក គង់ គាំ។ លោក អះអាងថា មានតែលោកម្នាក់គត់ ដែលដឹងច្រើនជាងគេនិងស៊ីជម្រៅពីសំណុំរឿងរបស់លោក កឹម សុខា ព្រោះកាលនោះ លោក និង លោក កឹម សុខា តែងធ្វើសេចក្តីសម្រេចសំខាន់ៗជាមួយគ្នា ក្នុងឋានៈជាប្រធាននិងអនុប្រធានគណបក្ស។
ប៉ុន្តែ លោក សម រង្ស៊ី ស្នើសុំថា ការបំភ្លឺរបស់លោក មិនមែនធ្វើឡើងក្នុងសវនាការផ្ទាល់ទេ គឺជាការបំភ្លឺ តាមរយៈការតភ្ជាប់វីដេអូពីបរទេសមក (Video Conference )។ ចៅក្រមស៊ើបសួរ មិនបានមាត់កអី្វនឹងសំណើរបស់លោក សម រង្ស៊ី ឡើយ។
លោក កឹម សុខា ត្រូវបានសមត្ថកិច្ច សម្រុកចូលទៅចាប់ខ្លួនដល់គេហដ្ឋាន ទាំងពាក់កណ្តាលអធ្រាត្រ ក្នុងថ្ងៃទី២ឈានចូលថ្ងៃទី៣ ខែកញ្ញា ឆ្នាំ២០១៧ ហើយក៏បញ្ជូនទៅឃុំនៅពន្ធនាគារត្រពាំងផ្លុង ខេត្តត្បូងឃ្មុំ។ តុលាការ បានចោទលោក ពីបទសន្ទិដ្ឋិភាព ដែលរាប់ចូលក្នុងអំពើក្បត់ជាតិ។ បទចោទនេះ គឺសំដៅលើការសមគំនិតជាមួយបរទេស ដើម្បីផ្តួលរំលំរដ្ឋាភិបាលកម្ពុជា។
ការចាប់ខ្លួននេះ គឺធ្វើឡើង បន្ទាប់ពីមានការបែកធ្លាយវីដេអូវីមួយលើបណ្តាញសង្គម ដែលបង្ហាញពីការថ្លែងសុទ្ទរកថារបស់លោក កឹម សុខា នៅក្រៅប្រទេស តាំងពីអំឡុងឆ្នាំ២០១៣មកម្ល៉េះ។ ក្នុងវីដេអូនោះ លោក កឹម សុខា អះអាងថា លោក មានសាស្ត្រាចារ្យ និងអ្នកជំនាញបរទេសជាដើម ជួយជ្រោមជ្រែងនិងផ្តល់យោបល់ដល់លោក ដើម្បីធ្វើឲ្យមានការផ្លាស់ប្តូរនៅកម្ពុជា។
រហូតដល់អំឡុងខែកញ្ញា ឆ្នាំ២០១៨ ពោលគឺក្រោយជាប់ឃុំក្នុងពន្ធគារបានមួយឆ្នាំ ចៅក្រមស៊ើបសួរ ក៏សម្រេចឲ្យលោក កឹម សុខា នៅក្រៅឃុំជាបណ្តោះអាសន្ន ក្រោមហេតុផលថា បារម្ភពីសុខភាពរបស់លោក។ ប៉ុន្តែ ចៅក្រមស៊ើបសួរ បានដាក់បម្រាមយ៉ាងតឹងតែងចំពោះលោក ដោយមិនឲ្យលោក ធ្វើដំណើរហួសពីព្រំដែនកំណត់ឡើយ និងមិនឲ្យជួបអតីតថ្នាក់ដឹកនាំគណបក្សប្រឆាំង រួមទាំងជនបរទេស ដែលពាក់ព័ន្ធនឹងសំណុំរឿង។
លោក សម រង្ស៊ី រួមទាំងអ្នកប្រឆាំង ចាត់ទុកថា លោក កឹម សុខា មិនទាន់មានសេរីភាពពេញលេញនោះទេ។ ពួកគេ យល់ថា ចៅក្រមស៊ើបសួរ គ្រាន់តែប្តូរលោក កឹម សុខា ពីពន្ធនាគារ យកទៅឃុំក្នុងផ្ទះប៉ុណ្ណោះ។ ពួកគេ បន្តទាមទារឲ្យចៅក្រមស៊ើបសួរ ទម្លាក់បទចោទចេញ ហើយផ្តល់សេរីភាពឲ្យបានពេញលេញជូនលោក កឹម សុខា។
មកដល់ពេលនេះ សំណុំរឿងរបស់លោក កឹម សុខា បានអូសបន្លាយជិតមួយឆ្នាំកន្លះហើយ៕