ចិន ព្រមព្រៀងលើឯកសារគម្រោងអភិវឌ្ឍចំនួន៨ និងសន្យាជួយដល់សេដ្ឋកិច្ចកម្ពុជា

ជាតិ

ចិន ព្រមព្រៀងលើឯកសារគម្រោងអភិវឌ្ឍចំនួន៨ និងសន្យាជួយដល់សេដ្ឋកិច្ចកម្ពុជា

23, Jan 2019 , 8:19 pm

រូបភាព

រូបពីទំព័រហ្វេសប៊ុកសម្ដេច ហ៊ុន សែន

ដោយ: ឡាយ សុភាវតី

ភ្នំពេញ៖ ឯកសារនៃកិច្ចព្រមព្រៀងចំនួន៨ ត្រូវបានរដ្ឋបាលកម្ពុជា និងចិន ចុះហត្ថលេខារួមគ្នាហើយ នៅក្នុងដំណើរទស្សនកិច្ចរបស់សម្ដេចនាយករដ្ឋមន្ត្រី ហ៊ុន សែន នៅក្នុងប្រទេសចិន រយៈពេល៣ថ្ងៃនេះ។ ឯកសារទាំងនោះ គឺសុទ្ធតែជាកិច្ចព្រមព្រៀងចិននិងកម្ពុជា ក្នុងការជួយដល់គម្រោងអភិវឌ្ឍ និងរៀបចំហេដ្ឋារចាសម្ព័ន្ធនៅកម្ពុជា។

ឯកសារកិច្ចព្រមព្រៀង និងអនុស្សារណៈ នៃការយោគយល់គ្នាសំខាន់ៗចំនួន០៨ ក្នុងនោះរួមមាន៖ លិខិតប្តូរសារស្តីពីគម្រោងកែលំអរផ្លូវជនបទ ជំហានទី២ , លិខិតប្តូរសារស្តីពីគម្រោងផ្គត់ផ្គងទឹកជនបទ ជំហានទី២ , លិខិតប្តូរសារស្តីពីគម្រោងការងារវិស្វកម្មសម្រាប់គាំទ្រ ដល់គម្រោងផ្លូវល្បឿនលឿនភ្នំពេញ ខេត្តព្រះសីហនុ , លិខិតបញ្ជាក់ការប្រគល់ ទទួល ស្ទីពីគម្រោងអគារអង្គរក្ស នៃទីស្តីការគណះរដ្ឋមន្ត្រី , លិខិតបញ្ជាក់ការប្រគល់ ទទួលស្តីពីគម្រោងលើកកម្រិតផ្លូវជាតិលេខ៧ ដែលរងការខូចខាតដោយទឹកចំនន់ , លិខិតបញ្ជាក់ការប្រគល់ ទទួល ស្តីពីគំរោង ជួសជុលប្រាសាទតាកែវ , កិច្ចព្រមព្រៀងឥណទានសម្បទាន សម្រាប់គម្រោងអភិវឌ្ឍន៍អាងរក្សាទឹកក្នុងខេត្តព្រះវិហារ និងចុងក្រោយគឺកិច្ចព្រមព្រៀងស្តីពីការជំរុញកិច្ចសហប្រតិបត្តិការវិនិយោគ ក្រោមយុទ្ធសាស្ត្រចតុកោណ និងគំនិតផ្តួចផ្តើមខ្សែក្រវ៉ាត និងផ្លូវ ។

ក្រៅពីចុះហត្ថលេខាលើឯកសារទាំងនេះ រដ្ឋាភិបាលប្រទេសចិន បានផ្តល់នូវជំនួយជិត៦០០លានដុល្លារ ហើយថែមទាំងបានដំឡើងកូតាអង្ករកម្ពុជានាំចូលមកចិន រហូតដល់៤សែនតោនទៀតផង។

មិនត្រឹមតែផ្ដល់ជំនួយដល់កម្ពុជានេះទេ ប្រមុខដឹកនាំចិន ទាំងប្រធានាធិបតីចិនលោក ស៊ី ជីនភីង , នាយករដ្ឋមន្ត្រីចិន លោក លី ខឹឈាំង និងលោកប្រធានរដ្ឋសភា វ៉ាង យ៉ាង សុទ្ធតែបានសន្យាជួយដល់សេដ្ឋកិច្ចកម្ពុជា តាមរយៈការពង្រីកនូវកិច្ចសហប្រតិបត្តិលើវិស័យសំខាន់ៗដូចជា កសិកម្ម, ពាណិជ្ជកម្ម ,វិនិយោគ, ទេសចរណ៍ និងហេដ្ឋារចនាសម្ព័ន្ឋជាដើម ។

តាមរយៈកិច្ចសហប្រតិបត្តិការទាំងនេះ ប្រទេសទាំងពីរ ប្ដេជ្ញាជំរុញទំហំពាណិជ្ជកម្មឲ្យកើនឡើងដល់១០ពាន់លានដុល្លារនៅឆ្នាំ ២០២៣។ បន្ថែមពីនេះកម្ពុជា ប្រកាសត្រៀមខ្លួនជាស្រេចរួចហើយ ដើម្បីជំរុញគម្រោងផ្លូវ១ខ្សែក្រវាត់១ ដែលជាគំនិតផ្ដួចផ្ដើមរបស់ចិន ទទួលបានជោគជ័យផងដែរ៕