ក្លិប PKNS របស់ វឌ្ឍនាកា បង្ហាញកីឡាករ និងឈុតរដូវកាលថ្មីនៅថ្ងៃនេះ

កីឡាជាតិ

ជាតិ

ក្លិប PKNS របស់ វឌ្ឍនាកា បង្ហាញកីឡាករ និងឈុតរដូវកាលថ្មីនៅថ្ងៃនេះ

24, Jan 2019 , 7:59 am

រូបភាព

ដោយ:

ក្លិបបាល់ទាត់ក្របខណ្ឌលីកកំពូលម៉ាឡេស៊ី PKNS FC របស់កីឡាករ ចាន់ វឌ្ឍនាកា នឹងបង្ហាញកីឡាករនិងសម្លៀកបំពាក់ ទ្រង់ទ្រាយធំសម្រាប់ត្រៀមរដូវកាលថ្មី នៅថ្ងៃទី២៤ ខែមករា ឆ្នាំ២០១៩ នៅមហោស្រព PKNS Up Town Shah Alam។ នេះបើតាមសេចក្តីជូនដំណឹងលើទំព័រហ្វេសប៊ុកផ្លូវការរបស់ក្លិបនេះ។

ក្លិប PKNS FC របស់ខ្សែប្រយុទ្ធឆ្នើមកម្ពុជា ចាន់ វឌ្ឍនាកា នឹងបង្ហាញសមាជិកថ្មីទាំង២៧រូបនៃក្រុមឈុតធំ រួមជាមួយសម្លៀកបំពាក់ប្រកួតក្នុងទឹកដីនិងក្រៅទឹកដីសម្រាប់រដូវកាល ២០១៩-២០២០ នៅថ្ងៃនេះ។ ក្នុងចំណោមកីឡាករបរទេសទាំង៥រូប វឌ្ឍនាកា ជាកីឡាករបរទេសចុងក្រោយ ដែលក្លិបនេះបាននាំចូលដើម្បីបំពេញកូតាកីឡាករអាស៊ាន។ រូបគេ ជាកីឡាករកម្ពុជាទី២ ដែលមកប្រកបអាជីពនៅក្របខណ្ឌកំពូលម៉ាឡេស៊ីរដូវកាលនេះ បន្ទាប់ពីកីឡាករខ្មែរ-បារាំង ធារី ចន្ថាប៊ីន ចុះកិច្ចសន្យាលេងឲ្យក្លិប Terengaanu FC។

កីឡាករបរទេស៤រូបផ្សេងទៀតរួមមានកីឡាករកូឡុំប៊ី Romel Oswaldo, Rafael Ramazotti មកពីប្រេស៊ីល, Jonatan Leonel Acosta របស់ប្រេស៊ីល និងកីឡាករអូស្ត្រាលី Zachary Michael Anderson។ ក្រៅពីនេះ ជាកីឡាករម៉ាឡេស៊ី។

កាលពីរដូវកាលមុន PKNS FC បានបញ្ចប់ក្នុងចំណាត់ថ្នាក់លេខ៣ ក្រោយឈ្នះ១០ ស្មើ៥ និងចាញ់៧។ ការប្រកួតបាល់ទាត់ដណ្តើមពានរង្វាន់ក្របខណ្ឌ Malaysia Super League នឹងបើកសករាជថ្មីរបស់ខ្លួននៅដើមខែកុម្ភៈ ឆ្នាំ២០១៩ ដោយគ្រោងបញ្ចប់ក្នុងអំឡុងខែកក្កដា។ មិនខុសពីរដូវកាលមុនៗឡើយ រដូវកាលថ្មីនេះ មានក្លិបចំនួន១២ចូលរួម៕