សម្ដេច ហ៊ុន សែន ប្រាប់ឲ្យកងកម្លាំងបង្ក្រាបអ្នករកស៊ីគេចពន្ធ ហើយឧត្តមសេនីយ៍ក៏ត្រូវបង់ពន្ធឲ្យបានត្រឹមត្រូវ

ជាតិ

នយោបាយជាតិ

សម្ដេច ហ៊ុន សែន ប្រាប់ឲ្យកងកម្លាំងបង្ក្រាបអ្នករកស៊ីគេចពន្ធ ហើយឧត្តមសេនីយ៍ក៏ត្រូវបង់ពន្ធឲ្យបានត្រឹមត្រូវ

24, Jan 2019 , 12:21 pm

រូបភាព

សម្ដេចនាយករដ្ឋមន្រ្តី ហ៊ុន សែន និងលោក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក នៅលើក្បួនរថយន្តផ្សេងគ្នា នៅក្នុងថ្ងៃរម្លឹកខួប២០ឆ្នាំ នៃការបង្កើតបញ្ជាការដ្ឋានកងទ័ពជើងគោក

ដោយ: ធឿន បញ្ញាឬទិ្ធ

ភ្នំពេញ៖ ពីពិធីរម្លឹកខួប២០ឆ្នាំ នៃការបង្កើតបញ្ជាការដ្ឋានកងទ័ពជើងគោក សម្ដេចនាយករដ្ឋមន្ត្រី ហ៊ុន សែន បានប្រាប់ឲ្យកម្លាំងប្រដាប់អាវុធទាំងអស់បង្ក្រាប និងទប់ស្កាត់ការរកស៊ីគេចពន្ធឲ្យបានត្រឹមត្រូវ ដើម្បីពង្រឹងការអនុវត្តច្បាប់ពន្ធដារនៅក្នុងប្រទេសកម្ពុជា។

ថ្លែងចំពោះមុខកងកម្លាំងប្រដាប់អាវុធរាប់ពាន់នាក់ នៅថ្ងៃទី២៤ មករានេះ សម្ដេច ហ៊ុន សែន បានជំរុញឲ្យកងកម្លាំងបង្ក្រាបអ្នករកស៊ីគេចពន្ធខុសច្បាប់ និងអ្នកការពារជនខុសច្បាប់ ដើម្បីធ្វើយ៉ាងណាកុំឲ្យអ្នកខុសច្បាប់ទាំងនោះ បំផ្លាញដល់កិត្តិយសរបស់កងកម្លាំងរាប់ម៉ឺននាក់ផ្សេងទៀត តាមរយៈការរិះគន់ពីប្រជាពលរដ្ឋ។

«ចំណុចនេះ គឺជាចំណុចដែលគ្រប់អង្គភាព មិនថាតែកងកម្លាំងប្រដាប់អាវុធជាក្របខណ្ខក្នុងកងយោធពលភូមិន្ទនោះទេ តែកងកម្លាំងដទៃទៀត ដូចជាកងកម្លាំងនគរបាលជាតិ ក៏ត្រូវតែចូលរួមដើម្បីគាំទ្រឲ្យអង្គភាពប្រមូលចំណូលថវិកាជាតិ ទាំងនៅថ្នាក់ជាតិ និងថ្នាក់ក្រោមជាតិ ខិតខំទប់ស្កាត់ការរកស៊ីគេចពន្ធ ទប់ស្កាត់ឧក្រិដ្ឋកម្មឆ្លងដែន ហើយត្រូវដាក់ទោសទណ្ឌចំពោះអ្នកដែលរកស៊ីខុសច្បាប់ និងអ្នកការពារអ្នករកស៊ីខុសច្បាប់។ ផលប្រយោជន៍វាបានទៅតែមនុស្ស២ឬ៣នាក់ ប៉ុន្តែកងទ័ពរបស់យើងមានច្រើន ដូច្នេះនាយទាហាន នាយទាហានរង និងពលទាហាន មិនត្រូវអត់ឱនឲ្យបុគ្គលមួយចំនួនតូចបំផ្លាញកិត្តិយស និងសេចក្តីថ្លៃថ្នូរកងទ័ពនោះទេ»។ នេះជាការលើកឡើងរបស់សម្ដេច ហ៊ុន សែន។

បន្ទាប់ពីជំរុញឲ្យកងកម្លាំងប្រឹងបំពេញការងារនេះហើយ ប្រមុខរដ្ឋាភិបាល ក៏ងាកមកនិយាយរឿងមន្ត្រីរាជការបង់ពន្ធចូលរដ្ឋវិញម្ដង។ ត្រង់ចំណុចនេះ លោកនាយករដ្ឋមន្ត្រី ហ៊ុន សែន បាននិយាយបែបលើកជាឧទាហរណ៍ថា បើឧត្តមសេនីយ៍ម្នាក់ មានលុយទិញឡានជិះ ហើយសុំមិនបង់ពន្ធថ្លៃឡាននោះ វានឹងធ្វើឲ្យខាតបង់ចំណូលថវិកាជាតិដែរ។ ដូច្នេះបុគ្គលទាំងអស់ ត្រូវបង់ពន្ធឲ្យបានត្រឹមត្រូវទាំងអស់គ្នា ដើម្បីពង្រឹងវប្បធម៌បង់ពន្ធដារ ចូលថវិកាជាតិ។

ក្នុងឯកសណ្ឋានកងទ័ព នាយឧត្តមសេនីយ៍ផ្កាយ៥ផុតលេខរូបនេះ បាននិយាយដូច្នេះថា៖«យើងត្រូវរួមគ្នា ហើយវាមិនមែនតែជាភារកិច្ចដាច់ដោយឡែករបស់ក្រសួងសេដ្ឋកិច្ច និងហិរញ្ញវត្ថុ អង្គភាពគយ អង្គភាពពន្ធដានោះទេ ក៏ប៉ុន្តែត្រូវមានការព្រមអនុវត្តទាំងអស់គ្នា។ ហើយខ្លួនយើងម្នាក់ៗ ក៏ត្រូវបំពេញកាតព្វកិច្ចពន្ធដារដូចគ្នា អស់លោកមានលុយទិញឡាន ត្រូវខិតខំបង់ពន្ធឡាន។ ការសុំរួចពន្ធឡាន គឺជាការកាត់បន្ថយចំណូលជាតិ ហើយឧត្តមសេនីយ៍មួយសុំ(មិនបង់ពន្ធ) ហើយឧត្តមសេនីយ៍ នៅក្នុងជួរទាហាន ហើយឧត្តមសេនីយ៍នៅក្នុងជួរប៉ូលិសក៏សុំ រួចបន្តទៅដល់ថ្នាក់រដ្ឋមន្ត្រី សួរថាតើយើងបានលុយមកពីណា(ចូលពន្ធរដ្ឋ)»។

ការអនុវត្តបង់ពន្ធចំណូលចូលរដ្ឋ គឺជាការបង្កើតលទ្ធភាពដល់រដ្ឋាភិបាល ក្នុងការដំឡើងប្រាក់ខែដល់កងកម្លាំងប្រដាប់អាវុធ មន្ត្រីរាជការស៊ីវិល រួមទាំងលទ្ធភាពសម្រាប់បង្កើនការវិនិយោគ និងរៀបចំហេដ្ឋារចនាសម្ព័ន្ធ ក្នុងដំណើរការអភិវឌ្ឍប្រទេស។ នេះជាការបញ្ជាក់របស់ប្រមុខរដ្ឋាភិបាល៕