ខ្សែបម្រើជប៉ុន Fumiya Kogure បានចុះកិច្ចសន្យារយៈពេល១ឆ្នាំលេងឲ្យក្លិបសូលទីឡូអង្គរ សម្រាប់រដូវកាលឆ្នាំ២០១៩-២០២០។ កីឡាករវ័យ២៩ឆ្នាំរូបនេះ ធ្លាប់លេងឲ្យក្លិបក្នុងក្របខណ្ឌលីកកំពូលជប៉ុន និងសិង្ហបុរី។ ហើយជាអតីតយុវជនជម្រើសជាតិរបស់ជប៉ុនថែមទៀតផង។ ក្លិបមានមូលដ្ឋាននៅខេត្តសៀមរាបមួយនេះ ក៏បានផ្លាស់ប្តូរគ្រូបង្វឹកថ្មីផងដែរ។
អតីតយុវជនជម្រើសជាតិជប៉ុន Fumiya Kogure ដែលធ្លាប់ប្រកបអាជីពនៅលីកជប៉ុន J-League 1 បានចុះកិច្ចសន្យាលេងឲ្យក្លិបសូលទីឡូអង្គរ។ ក្លិបមានមូលដ្ឋាននៅខេត្តសៀមរាបមួយនេះ រំពឹងថា តាមរយៈកីឡាករពាក់អាវលេខ១០រូបនេះ នឹងធ្វើឲ្យការប្រកួតដណ្តើមពានរង្វាន់លីកកំពូលកាន់តែមានភាពស្វិតស្វាញ ពិសេសជួយឲ្យក្លិបទទួលបានលទ្ធផលល្អក្នុងរដូវកាលថ្មី។
ខ្សែបម្រើវ័យ២៩ឆ្នាំរូបនេះ បានធ្វើជាយុវជនក្លិបក្របខណ្ឌ J-League 2 របស់ជប៉ុន Albirex Niigata ពីឆ្នាំ២០០៨-២០១២។ បន្ទាប់មកកីឡាករកម្ពស់១.៧៧ម៉ែត្ររូបនេះ បានផ្ទេរទៅក្លិប Mito HollyHock នៃក្របខណ្ឌ J-League 1 នៅឆ្នាំ២០១៣ មុនផ្លាស់ទៅកាន់ក្លិបក្របខណ្ឌកំពូលជប៉ុនដូចគ្នា Azul Claro Numazu នៅឆ្នាំ២០១៤។
បើតាមក្លិបសូលទីឡូអង្គរ ម្ចាស់អាវលេខ១០រូបនេះ បានក្លាយជាសមាជិកយុវជនជម្រើសជាតិជប៉ុនតាំងពីអាយុ១៦ឆ្នាំរហូតដល់អាយុ២១ឆ្នាំ។
Fumiya Kogure បានចាកចេញពីក្លិបនៅលើទឹកដីកំណើតមកប្រកបអាជីពនៅលើទឹកដីសិង្ហបុរីនៅឆ្នាំ២០១៥ ដោយចូលរួមជាក្លិបក្របខណ្ឌកំពូលរបស់សិង្ហបុរិ Albirex Niigata Singapore។ សម្រាប់ការចំណាយពេល១ឆ្នាំរួមរស់ជាមួយក្លិបនេះដែររូបគេបានបង្ហាញខ្លួនចំនួន២២លើកនិងរកបានចំនួន៣គ្រាប់។
បន្ទាប់មកកីឡាករមានដើមកំណើតនៅទីក្រុងតូក្យូរូបនេះ បានចាកចេញពីក្លិបខាងលើទៅរួមរស់ជាមួយក្លិប Hougang United នៃក្របខណ្ឌកំពូលរបស់សិង្ហបុរីដូចគ្នា។ ក្រោយរួមរស់បានពីររដូវកាល(២០១៦, ២០១៧)ដោយបានបង្ហាញខ្លួនបាន២១លើកនិងរកបានបួនគ្រាប់ រូបគេបានផ្លាស់ទៅរួមរស់ជាមួយក្លិប Geylang International ក្នុងក្របខណ្ឌដូចគ្នានៅឆ្នាំ២០១៨។
ក្រៅពីខ្សែបម្រើខាងលើ ក្លិបបញ្ចប់ត្រឹមចំណាត់ថ្នាក់លេខ១០នៅឆ្នាំ២០១៨មួយនេះ បានចុះកិច្ចសន្យានាំចូលសមាជិកថ្មីមួយរូបទៀតផងដែរ គឺអ្នកចាំទីជប៉ុន Kota Motoyama។ ទោះបីវាជាការប្រកបអាជីពលើកដំបូងក្នុងក្របខណ្ឌកំពូល តែក្លិបនេះរំពឹងថា រូបគេនឹងសង្គ្រោះបាល់បានល្អ។
បន្ថែមលើនេះ ក្លិបសូលទីឡូអង្គរបានបន្តកិច្ចសន្យារយៈពេល១ឆ្នាំដល់កីឡាករ Kikuchi Yuta និង២ឆ្នាំដល់ខ្សែបម្រើ Unno Tomoyuki ផងដែរ។ ក្លិបរំពឹងថា កីឡាករជប៉ុនទាំងពីររូបនេះ នឹងបង្ហាញសមត្ថភាពដ៏អស្ចារ្យនៅរដូវកាលថ្មី។
ដោយឡែក កាលពីអំឡុងខែធ្នូ ឆ្នាំ២០១៨ កន្លងទៅ ក្លិបសូលទីឡូអង្គរបានតែងតាំងលោក ដារ៉េន ពុំរ៉ូយ (Darren Pomroy) ជនជាតិអង់គ្លេសកាន់សញ្ញាបត្រ UEFA ‘A’ License ជាគ្រូបង្វឹកថ្មី ជំនួសគ្រូបង្វឹកជនជាតិជប៉ុន Yuki Matsuda ដែលបានផុតកិច្ចសន្យាក្រោយចប់រដូវកាលឆ្នាំ២០១៨៕